ಸೃಜನಶೀಲ ಕಲಾವಿದನಿಂದ ಸುಂದರ ಕಲಾಕೃತಿ ಸಾಧ್ಯ

ಕಲಬುರಗಿ: ಛಾಯಾಚಿತ್ರ ಕಲೆ ಯಂತ್ರ ಮುಖೇನ ಸೃಷ್ಟಿಯಾಗುತ್ತದೆ ನಿಜ. ಆದರೆ ಅದರ ಹಿಂದೆ ಸೃಜನಶೀಲ ಕಲಾವಿದನ ಮನಸ್ಸು ಇದ್ದರೆ ಅದು ಒಂದು ಸುಂದರ ಕಲಾಕೃತಿಯಾಗುತ್ತದೆ ಎಂದು ಜಿಲ್ಲಾ ಫೋಟೋಗ್ರಾಫರ್​ ಅಸೋಸಿಯೇಷನ್​ ಅಧ್ಯ ಬಸವರಾಜ ತೋಟದ್​ ಹೇಳಿದರು.

ಕಲಬುರಗಿ ಮಾನಕರ್​ ಲೇಔಟ್​ನಲ್ಲಿರುವ ಬಿಸಿಲು ಆರ್ಟ್​ ಗ್ಯಾಲರಿಯಲ್ಲಿ ಸೋಮವಾರ ಹಮ್ಮಿಕೊಂಡಿದ್ದ ಹವ್ಯಾಸಿ ಛಾಯಾಗ್ರಾಹಕ ಉದಯಕುಮಾರ ಬಗಲಿ ಅವರ ಏಕವ್ಯಕ್ತಿ ಛಾಯಾಚಿತ್ರ ಪ್ರದರ್ಶನ ಉದ್ಘಾಟಿಸಿ ಮಾತನಾಡಿದರು.

ಮುಖ್ಯ ಅತಿಥಿಯಾಗಿದ್ದ ಸಾಹಿತಿ ವೆಂಕಣ್ಣ ದೊಣ್ಣೆಗೌಡ ಮಾತನಾಡಿ, ಛಾಯಾಚಿತ್ರಗಳು ಕಾಲದ ದಾಖಲೆಗಳಾಗಿ ಮಹತ್ವದ ಪಾತ್ರ ವಹಿಸುತ್ತವೆ. ನಿಸರ್ಗದಲ್ಲಿ ಎಲ್ಲವೂ ನಿರಂತರ ಬದಲಾವಣೆಯ ಪ್ರಕ್ರಿಯೆಗೆ ಒಳಗತ್ತಲೇ ಇರುತ್ತದೆ. ಆದರೆ ತಲೆಮಾರುಗಳು ಉರುಳಿದರೂ, ಕಾಲದ ಅಂತರದಲ್ಲಿ, ಸನ್ನಿವೇಶ ಸಂದರ್ಭಗಳಲ್ಲಿ ಬದಲಾದ ಸ್ಥಿತಿಗಳನ್ನು ಛಾಯಾಚಿತ್ರಗಳು ತೋರಿಸುತ್ತವೆ. ಸಾವಿರಾರು ಶಬ್ದಗಳಲ್ಲಿ ವರ್ಣಿಸಲಾಗದ್ದನು ಛಾಯಾಚಿತ್ರ ನೋಟ ಒಂದರಲ್ಲೆ ಎಲ್ಲವನ್ನೂ ಅರಿವಿಗೆ ತಂದುಕೊಡುತ್ತದೆ ಎಂದು ಬಣ್ಣಿಸಿದರು.

ಛಾಯಾ ಚಿತ್ರಕಲೆಯಲ್ಲಿ ಸನ್ನಿವೇಶದ ಆಯ್ಕೆ, ನೆರಳು ಬೆಳಕಿನ ಹೊಯ್ದಾಟ ಬಹಳ ಮುಖ್ಯ ಎಂದು ಕಲಾವಿದ ಗುರುಲಿಂಗ ಅರಳಿ ಹೇಳಿದರು.

ಅಧ್ಯಕ್ಷತೆ ವಹಿಸಿದ್ದ ಬಿಸಿಲು ಆರ್ಟ್​ ಗ್ಯಾಲರಿಯ ಕ್ಯೂರೇಟರ್​, ಹಿರಿಯ ಕಲಾವಿದ ವಿ.ಬಿ.ಬಿರಾದಾರ್​ ಮಾತನಾಡಿ, ಛಾಯಾಚಿತ್ರ ಕಲೆ ಸೌಂದರ್ಯ ಸೃಷ್ಟಿಸುವ ಕಲೆಯಾಗಿದ್ದು, ಸೌಂದರ್ಯ ಎನ್ನುವುದು ನೋಡುಗನ ಭಾವನೆ ಅವಲಂಬಿಸಿರುತ್ತದೆ. ಸೃಜನಶೀಲರು ಕುರೂಪದಲ್ಲೂ ಸೌಂದರ್ಯ ಕಾಣುತ್ತಾರೆ. ಛಾಯಾಚಿತ್ರಣವೂ ಒಂದು ಸೃಜನಶೀಲ ಕಲೆಯಾಗಿದ್ದು, ಛಾಯಾಚಿತ್ರಕಾರರು ಸೌಂದರ್ಯ ಮೀಮಾಂಸಕರಿದ್ದಂತೆ ಎಂದು ಹೇಳಿದರು.

ಕಲಾವಿದ ಮಲ್ಲಿಕಾರ್ಜುನ ಕೊರಳ್ಳಿ ನಿರೂಪಿಸಿದರು, ಕಲಾವಿದ ರಾಜು ಕಾಳೆ ವಂದಿಸಿದರು. ಕಲಾವಿದರಾದ ಸೂರ್ಯಕಾಂತ ನಂದೂರ, ದೌಲತರಾಯ ದೇಸಾಯಿ, ಜಿತೇಂದ್ರ ಕೊಥಲೀಕರ, ನಾರಾಯಣ ಜೋಶಿ, ಮೌನೇಶ ಬಡಿಗೇರ, ಗಿರೀಶ ಕುಲಕರ್ಣಿ. ಡಾ ಶಿವಾನಂದ ಬಂಟನೂರ, ಜಗದೀಶ ಕಾಂಬಳೆ, ವಿಜಯಕುಮಾರ, ಕುಪೇಂದ್ರ ಇತರರಿದ್ದರು. ಮಾರ್ಚ್​ 18ರಂದು ಮಧ್ಯಾಹ್ನ 4ರಿಂದ ರಾತ್ರಿ 8ರವರೆಗೆ ಸಾರ್ವಜನಿಕರು, ಕಲಾಆಸಕ್ತರು, ಕಲಾವಿದರು ಪ್ರದರ್ಶನ ವಿಸಬಹುದು.