ಘಾನಾದಲ್ಲಿ 26 ಹಕ್ಕಿಪಿಕ್ಕಿಗಳ ಬಂಧನ

ಶಿವಮೊಗ್ಗ ಜಿಲ್ಲೆಯ 24 ಹಾಗೂ ದಾವಣಗೆರೆಯ ಚನ್ನಗಿರಿ ತಾಲೂಕು ಗೋಪನಾಳು ಗ್ರಾಮದ ಇಬ್ಬರನ್ನು ಬಂಧಿಸಲಾಗಿದೆ. ಬಂಧಿತರಲ್ಲಿ 12 ಮಂದಿ ಮಹಿಳೆಯರಾಗಿದ್ದಾರೆ. ಇವರೆಲ್ಲರೂ ಘಾನಾದ ಟುಮು ಪ್ರದೇಶದ ‘ವಾ’ ನಗರದಲ್ಲಿ ವಾಸವಾಗಿದ್ದರು. ಶಿವಮೊಗ್ಗದವರು 6 ತಿಂಗಳ ಹಿಂದೆ ಹೋಗಿದ್ದರು, ದಾವಣಗೆರೆಯ ಇಬ್ಬರು 1 ತಿಂಗಳ ಹಿಂದೆ ಅಲ್ಲಿಗೆ ತೆರಳಿದ್ದರು.

ಮೂರು ದಿನಗಳ ಹಿಂದೆ ವ್ಯಾಪಾರ ಮಾಡುತ್ತಿದ್ದ ವೇಳೆ ಅಲ್ಲಿನ ಪೊಲೀಸರು ಕಾರ್ಯಾಚರಣೆ ನಡೆಸಿ, 26 ಜನರನ್ನು ಬಂಧಿಸಿ ಪಾಸ್​ಪೋರ್ಟ್ ಹಾಗೂ ಗಿಡಮೂಲಿಕೆಗಳ ಬ್ಯಾಗ್ ವಶಕ್ಕೆ ಪಡೆದಿದ್ದಾರೆ ಎಂದು ಕರ್ನಾಟಕ ಹಕ್ಕಿಪಿಕ್ಕಿ ಬುಡಕಟ್ಟು ಸಂಘಟನೆಯ ಅಧ್ಯಕ್ಷ ಪುನೀತ್​ಕುಮಾರ್ ಆರ್. ತಿಳಿಸಿದ್ದಾರೆ. ಅಲ್ಲಿನ ಭಾರತೀಯ ರಾಯಭಾರ ಕಚೇರಿ ಅಧಿಕಾರಿಗಳನ್ನು ಸಂರ್ಪಸಿ, ಭಾರತೀಯರ ನೆರವಿಗೆ ಬರುವಂತೆ ಮನವಿ ಮಾಡಿರುವುದಾಗಿ ಪುನೀತ್ ಹೇಳಿದರು.