ಲಂಕಾ ಕ್ರಿಕೆಟಿಗನಿಗೆ ಕಾಶ್ಮೀರದಲ್ಲಿ ಜಮೀನು

ಜಮ್ಮು: ಶ್ರೀಲಂಕಾದ ಖ್ಯಾತ ಬೌಲರ್ ಮುತ್ತಯ್ಯ ಮುರಳೀಧರನ್​ರ ಸೆವ್ಲಾನ್ ಬೆವರೇಜಸ್ ಕಂಪನಿಗೆ ಕಥುವಾದ ಭಾಗ್​ಥಾಲಿ ಕೈಗಾರಿಕಾ ಪ್ರಾಂಗಣದಲ್ಲಿ ಜಮೀನು ಮಂಜೂರು ಮಾಡಿರುವ ವಿಚಾರ ಜಮ್ಮು ಮತ್ತು ಕಾಶ್ಮೀರ ವಿಧಾನಸಭೆಯಲ್ಲಿ ಚರ್ಚೆಗೆ ಬಂದು ಕೋಲಾಹಲಕ್ಕೆ ಕಾರಣವಾಗಿದೆ.

ಮುರಳೀಧರನ್​ರ ಲಘು ಪಾನೀಯ ಕಂಪನಿ ಸಹಿತ ಅನೇಕ ದೊಡ್ಡ ಕೈಗಾರಿಕಾ ಸಂಸ್ಥೆಗಳಿಗೆ ಕಳೆದ ವರ್ಷ ಈ ಕೈಗಾರಿಕಾ ಪ್ರಾಂಗಣದಲ್ಲಿ ಜಮೀನು ಮಂಜೂರು ಮಾಡಲಾಗಿದ್ದು ಅವುಗಳು ಒಟ್ಟು 21,000 ಕೋಟಿ ರೂಪಾಯಿ ಬಂಡವಾಳ ಹೂಡಿಕೆ ಮಾಡಲಿವೆ ಎನ್ನಲಾಗಿದೆ.

ಮುರಳೀಧರನ್ ಕಂಪನಿಗೆ ಜಾಗ ಮಂಜೂರು ಮಾಡಿದ್ದನ್ನು ಶನಿವಾರ ಹಲವು ಸದಸ್ಯರು ಸದನದಲ್ಲಿ ಪ್ರಶ್ನಿಸಿದರು. ಪ್ರಶ್ನೋತ್ತರ ವೇಳೆಯಲ್ಲಿ ಇದನ್ನುಪ್ರಸ್ತಾಪಿಸಿದ ಮಾರ್ಕ್ಸ್​ವಾದಿ ಕಮ್ಯೂನಿಸ್ಟ್ ಪಕ್ಷದ (ಸಿಪಿಎಂ) ಸದಸ್ಯ ಮಹಮದ್ ಯೂಸುಫ್ ತರಿಗಾಮಿ, ಬೌಲಿಂಗ್ ದಂತಕಥೆ ಮುರಳೀಧರನ್​ರ ಹೆಸರನ್ನು ಹೇಳದೆ ಭಾರತೀಯೇತರ ಕ್ರಿಕೆಟರ್​ಗೆ ಜಮೀನು ಮಂಜೂರು ಮಾಡಿದ್ದು ಹೇಗೆ ಎಂದು ಪ್ರಶ್ನಿಸಿದರು.