ಆನೆ ನಡೆದದ್ದೇ ದಾರಿ ಎಂಬಂತೆ, ಸತ್ಯ-ನ್ಯಾಯದ ಪರವಾಗಿ ಹೋರಾಡುವ ರಾಮಾಚಾರಿಯ ಪಾತ್ರ ‘ನಾಗರಹಾವು’ ಚಿತ್ರದಲ್ಲಿತ್ತು. ಅದರಲ್ಲಿನ ವಿಷ್ಣುವರ್ಧನ್ ನಟನೆ ಮರೆಯಲಾಗದ್ದು. ಆ ಚಿತ್ರಕ್ಕೆ ತರಾಸು ಅವರ ಕಾದಂಬರಿಯೇ ಆಧಾರ. ಅದೊಂದೇ ಅಲ್ಲ, ದುರ್ಗಾಸ್ತಮಾನ, ರಕ್ತತರ್ಪಣ, ಹಂಸಗೀತೆ ಸೇರಿದಂತೆ 61 ಕಾದಂಬರಿಗಳನ್ನು ತರಾಸು ಬರೆದಿದ್ದಾರೆ. ಆ ಪೈಕಿ 12 ಕಾದಂಬರಿಗಳು ಸಿನಿಮಾ ಆಗಿವೆ. ‘ಹಂಸಗೀತೆ’ ಕಾದಂಬರಿ ಹಿಂದಿಯಲ್ಲಿ ಬಸಂತ್ ಬಹಾರ್ ಎಂಬ ಸಿನಿಮಾ ಆಗಿದೆ. ಇಷ್ಟೆಲ್ಲ ಕನ್ನಡದ ಕೆಲಸ ಮಾಡಿದ ತರಾಸು ಅವರ ಮಾತೃಭಾಷೆ ಮಾತ್ರ ತೆಲುಗು! ಭದ್ರಾವತಿಯ ಮಲೆಬೆನ್ನೂರು ಗ್ರಾಮದಲ್ಲಿ 1920ರ ಏಪ್ರಿಲ್ 21ರಂದು ಕನ್ನಡದ ಮೊದಲ ಪ್ರಾಧ್ಯಾಪಕ ತಳುಕಿನ ವೆಂಕಣ್ಣಯ್ಯರ ತಮ್ಮ ರಾಮಸ್ವಾಮಯ್ಯ ಅವರ ಪುತ್ರರಾಗಿ ತರಾಸು ಜನಿಸಿದರು. ಆಂಧ್ರ ಮೂಲದ ಇವರ ತಾತ ಸುಬ್ಬಣ್ಣ ಬಹಳ ಹಿಂದೆಯೇ ಕರ್ನಾಟಕದಲ್ಲಿ ನೆಲೆಸಿ, ಕನ್ನಡಿಗರೇ ಆಗಿದ್ದರು. ಅಧ್ಯಾಪಕರು, ವಿದ್ವಾಂಸರೂ ಆದ ತ.ಸು. ಶಾಮರಾಯರು ಚಿಕ್ಕಪ್ಪ. ಇಂತಹ ಸಾಹಿತ್ಯಕ ಕುಟುಂಬದಲ್ಲಿ ಜನಿಸಿದ ತರಾಸು ಅವರಿಗೆ ಪುಸ್ತಕ ಓದುವ ಹವ್ಯಾಸ ಸಹಜವಾಗಿಯೇ ಬಂದಿತ್ತು. ಮನೆಯಲ್ಲಿ ದೊಡ್ಡವರು ಪುಸ್ತಕ ಓದುತ್ತಿದ್ದರೆ ಮಕ್ಕಳಿಗೂ ಆ ಅಭ್ಯಾಸ ಬೆಳೆಯುತ್ತದೆ.
