ಮೀನು ಮಾರ್ಕೆಟ್​ನಲ್ಲಿ ಮಾತೃವಾತ್ಸಲ್ಯ ಅನಾವರಣ; ವಿದೇಶದಿಂದ ಮಗ ಮುಖಮುಚ್ಚಿಕೊಂಡು ಬಂದರೂ ಗುರುತು ಹಿಡಿದ ಅಮ್ಮ!

ಬೆಂಗಳೂರು: ಮಕ್ಕಳಲ್ಲಿನ ಸಣ್ಣ ಬದಲಾವಣೆಯನ್ನೂ ಅಮ್ಮ ಗುರುತು ಹಿಡಿಯುತ್ತಾಳೆ ಎಂಬ ಮಾತಿದೆ. ಅದಾಗ್ಯೂ ಇಲ್ಲೊಬ್ಬ ಮಗ ಅಮ್ಮನಿಗೆ ಗುರುತು ಸಿಗಬಾರದು ಎಂದು ವರ್ಷಗಳ ಬಳಿಕ ವಿದೇಶದಿಂದ ಬಂದು ನೇರ ಮೀನು ಮಾರ್ಕೆಟ್​ಗೆ ಹೋಗಿ ಮುಖಮುಚ್ಚಿಕೊಂಡು ತಾಯಿಯ ಬಳಿ ವ್ಯಾಪಾರಿಯ ರೀತಿ ನಡೆದುಕೊಂಡರೂ ಆಕೆ ಗುರುತು ಹಿಡಿದುಬಿಟ್ಟಿದ್ದಾಳೆ!

ಇಂಥದ್ದೊಂದು ಮಾತೃವಾತ್ಸಲ್ಯದ ಅನಾವರಣದಂಥ ಸನ್ನಿವೇಶ ಉಡುಪಿ ಜಿಲ್ಲೆಯ ಗಂಗೊಳ್ಳಿಯ ಮೀನು ಮಾರ್ಕೆಟ್​ನಲ್ಲಿ ಕಂಡು ಬಂದಿದೆ. ಗಂಗೊಳ್ಳಿಯ ನಿವಾಸಿ ರೋಹಿತ್ ಎಂಬ ಯುವಕ ದುಬೈನಲ್ಲಿ ಉದ್ಯೋಗದಲ್ಲಿದ್ದು, ಮೂರು ವರ್ಷಗಳ ಬಳಿಕ ಹುಟ್ಟೂರಿಗೆ ಮರಳಿದ್ದಾನೆ. ಹೀಗೆ ಬಂದವ ತಾಯಿಗೊಂದು ಅಚ್ಚರಿ ಕೊಡಬೇಕು ಎಂದು ಯೋಜನೆಯೊಂದನ್ನು ಹಾಕಿಕೊಂಡಿದ್ದ.

ದುಬೈನಿಂದ ಮರಳಿದ ಈತ ನೇರವಾಗಿ ಮೀನು ಮಾರ್ಕೆಟ್​ಗೆ ಬಂದು, ಅಲ್ಲಿ ಮೀನು ಮಾರುತ್ತಿದ್ದ ತಾಯಿಯ ಬಳಿಗೆ ಮುಖ ಮುಚ್ಚಿಕೊಂಡು ಹೋಗಿ, ವ್ಯಾಪಾರಿಯ ರೀತಿಯಲ್ಲಿ ಮೀನು ಖರೀದಿಗೆ ಮುಂದಾಗಿದ್ದ. ತನ್ನ ತಾಯಿ ಗುರುತಿಸುತ್ತಾರೋ ಇಲ್ಲವೋ ಎಂದು ಈತ ಇವೆಲ್ಲವನ್ನೂ ವಿಡಿಯೋ ಮಾಡಿಸಿಕೊಂಡಿದ್ದ.

ಮಾಮೂಲಿಯಂತೆ ವ್ಯಾಪಾರದ ವೇಳೆ ಎಲ್ಲರಿಗೂ ಸ್ಪಂದಿಸುವಂತೆ ಈ ತಾಯಿ ಮೀನು ಆರಿಸಿಕೊಡಲು ಮುಂದಾಗಿದ್ದಾಳೆ. ಆದರೆ ಈ ಹೀಗೆ ಮಾಡುತ್ತಿದ್ದಾಗ ಈ ಹೆಂಗರುಳು ಎದುರಿಗಿರುವುದು ತನ್ನ ಮಗ ಎಂಬುದರ ಸುಳಿವು ಹಿಡಿದಿತ್ತು. ಅನುಮಾನ ಬಂದ ತಾಯಿ ಈತ ಮುಖಕ್ಕೆ ಮುಚ್ಚಿಕೊಂಡಿದ್ದ ಬಟ್ಟೆಯನ್ನು ಸರಿಸಿ ನೋಡಿದ್ದಳು. ಆಗ ಅದು ನಿಜವಾಗಿಯೂ ತನ್ನ ಮಗನೇ ಆಗಿದ್ದರಿಂದ ಈ ಅಮ್ಮ ಆತನನ್ನು ಪ್ರೀತಿಯಿಂದ ಅಪ್ಪಿಕೊಂಡಿದ್ದು, ಮೀನು ಮಾರ್ಕೆಟ್​​ನಲ್ಲಿ ಮಾತೃವಾತ್ಸಲ್ಯದ ಅನಾವರಣಗೊಂಡಿದೆ. ಈ ವಿಡಿಯೋ ಈಗ ಎಲ್ಲೆಡೆ ಹರಿದಾಡಲಾರಂಭಿಸಿದ್ದು, ಭಾರಿ ಮೆಚ್ಚುಗೆಗೆ ಪಾತ್ರವಾಗುತ್ತಿದೆ.

https://www.vijayavani.net/womans-dead-body-found-in-trolley-bag-within-a-forest-area

https://www.vijayavani.net/2-crore-rupees-worth-gold-found-in-inner-wear