ಶಿವಾನಂದ ಚಿಗಾರಿ, ಎನ್​.ಮೇಘಶ್ರೀಗೆ 10ಕೆ ಕಿರೀಟ

ತುಮಕೂರು: ಬೆಳಗಾವಿಯ ಶಿವಾನಂದ ಚಿಗಾರಿ ಪುರುಷರ ಹಾಗೂ ಬೆಂಗಳೂರಿನ ಎನ್​. ಮೇಘಶ್ರೀ ಮಹಿಳೆಯರ ವಿಭಾಗದಲ್ಲಿಸಿದ್ದಗಂಗಾ ಹೆಲ್ತ್​ ರನ್​ 10 ಕೆ ಮ್ಯಾರಥಾನ್​ ಕಿರೀಟ ಮುಡಿಗೇರಿಸಿಕೊಂಡಿದ್ದಾರೆ.

ನಗರದ ಸಿದ್ದಗಂಗಾ ಸೂಪರ್​ ಸ್ಪೆಷಾಲಿಟಿ ಆಸ್ಪತ್ರೆ ವತಿಯಿಂದ ಭಾನುವಾರ ವಿಶ್ವ ಹೃದಯದ ದಿನದ ಅಂಗವಾಗಿ ಆಯೋಜಿಸಿದ್ದ ಸಿದ್ದಗಂಗಾ ಹೆಲ್ತ್​ ರನ್​ 10 ಕೆ ಮ್ಯಾರಥಾನ್​ನ ಪುರಷರ ವಿಭಾಗದಲ್ಲಿ ಶಿವಾನಂದ ಚಿಗಾರಿ 33.01 ನಿಮಿಷದಲ್ಲಿ 10 ಕಿ.ಮೀ., ಪೂರೈಸಿ ಪ್ರಥಮ ಸ್ಥಾನದೊಂದಿಗೆ 15 ಸಾವಿರ ರೂ., ನಗದು, ಚಿನ್ನದ ಪದಕ ಗಳಿಸಿದರು. ತುಮಕೂರಿನ ಟಿ.ಎಸ್​.ಸಂದೀಪ್​ (34.50 ನಿ.) ದ್ವೀತಿಯ ಸ್ಥಾನ ಗಳಿಸಿ 10 ಸಾವಿರ ನಗದು ಹಾಗೂ ಬೆಳ್ಳಿ ಪದಕ ಮುಡಿಗೇರಿಸಿಕೊಂಡರು. ಬೆಂಗಳೂರಿನ ಕ್ರೀಡಾಪ್ರಾಧಿಕಾರದ ರಾಜೇಶ್​ ಕುಮಾರ್​ (36.25 ನಿ.)ದಲ್ಲಿ ತೃತೀಯ ಸ್ಥಾನಗಳಿಸಿ 5 ಸಾವಿರ ರೂ., ನಗದು ಹಾಗೂ ಕಂಚಿನ ಪದಕ ಗೆದ್ದುಕೊಂಡರು.

ಮಹಿಳೆಯರ 10ಕೆ ಮ್ಯಾರಥಾನ್​ನಲ್ಲಿ ಬೆಂಗಳೂರಿನ ಎನ್​.ಮೇಘಶ್ರೀ 40.43 ನಿಮಿಷದಲ್ಲಿ ಓಡಿ ಪ್ರಥಮ ಸ್ಥಾನ, 15 ಸಾವಿರ ರೂಪಾಯಿ ನಗದು ಮುಡಿಗೇರಿಸಿಕೊಂಡರು. ಬೆಂಗಳೂರಿನ ತನುಶ್ರೀ (42.44 ನಿ.,) ದ್ವೀತಿಯ ಸ್ಥಾನಗಳಿಸಿ 10 ಸಾವಿರ ರೂ., ನಗದು ಹಾಗೂ ಬೆಳ್ಳಿ ಪದಕ ಗೆದ್ದುಕೊಂಡರು. ತೃತೀಯ ಸ್ಥಾನ ಗಳಿಸಿದ ಪಂಜಾಬ್​ನ ಪೂಜಾ ಕುಮಾರಿ (44.03 ನಿ.,) 5 ಸಾವಿರ ರೂ., ನಗದು ಹಾಗೂ ಕಂಚಿನ ಪದಕಗಳಿಸಿದರು.

5 ಕೆ ಮ್ಯಾರಥಾನ್​ : ಪುರಷರ ವಿಭಾಗದ 5 ಕೆ ಮ್ಯಾರಥಾನ್​ನಲ್ಲಿ ಬೆಂಗಳೂರಿನ ಸಾಯ್​ನ ಗೋಪಿ (16.21 ನಿ.,) ಪ್ರಥಮ ಸ್ಥಾನಗಳಿಸಿ 10 ಸಾವಿರ ರೂ., ನಗದು ಹಾಗೂ ಚಿನ್ನದ ಪದಕ ಪಡೆದರು. ದ್ವೀತಿಯ ಸ್ಥಾನ ಪಡೆದ ಮಂಗಳೂರಿನ ರಂಗಣ್ಣ (16.33 ನಿ.) 6 ಸಾವಿರ ರೂ., ನಗದು ಹಾಗೂ ಬೆಳ್ಳಿ ಪದಕಗೆದ್ದುಕೊಂಡರು. ಜಮಖಂಡಿಯ ಸಂಗಮೇಶ್​ ಅರ್ಜುನ ಹಳ್ಳಿ (16.43 ನಿ.,) ತೃತೀಯ ಸ್ಥಾನ ಗಳಿಸಿ 4 ಸಾವಿರ ರೂ., ನಗದು ಹಾಗೂ ಕಂಚಿನ ಪದಕ ಮುಡಿಗೇರಿಸಿಕೊಂಡರು.

5ಕೆ ಮ್ಯಾರಥಾನ್​ ಮಹಿಳೆಯರ ವಿಭಾಗದಲ್ಲಿ ಬೆಂಗಳೂರಿನ ಡಿವೈಇಎಸ್​ನ ಪ್ರಣತಿ ಪ್ರಥಮ ಸ್ಥಾನದೊಂದಿಗೆ 10 ಸಾವಿರ ರೂ., ನಗದು, ಚಿನ್ನದ ಪದಕ ಗೆದ್ದುಕೊಂಡರು. ರಾಜಸ್ಥಾನದ ಬಬ್ಲಿ ಗುಜ್ಜಾರ್​ ದ್ವೀತಿಯ ಸ್ಥಾನಗಳಿಸಿ 6 ಸಾವಿರ ರೂ., ನಗದು, ಬೆಳ್ಳಿ ಪದಕ ಪಡೆದರು. ಬೆಂಗಳೂರಿನ ಡಿವೈಇಎಸ್​ನ ಎಂ.ಎನ್​.ಸೀಮಾ ತೃತೀಯ ಸ್ಥಾನಗಳಿಸಿ 4 ಸಾವಿರ ರೂ., ನಗದು ಕಂಚಿನ ಪದಕ ಗೆದ್ದುಕೊಂಡರು.

50 ವರ್ಷ ಮೇಲ್ಪಟ್ಟವರಿಗೆ ಆಯೋಜಿಸಿದ್ದ 10ಕೆ ಮ್ಯಾರಥಾನ್​ನಲ್ಲಿ ಬೆಂಗಳೂರಿನ ರಾಜಣ್ಣ ಪ್ರಥಮ ಸ್ಥಾನಗಳಿಸಿ 15 ಸಾವಿರ ನಗದು ಗೆದ್ದುಕೊಂಡರು. ಕೇರಳಾದ ಕೋಚಿಕೋಡ್​ನ ಟಿ.ಬಾಲಕೃಷ್ಣ ದ್ವೀತಿಯ ಸ್ಥಾನದೊಂದಿಗೆ 10 ಸಾವಿರ ರೂ., ನಗದು ಬಹುಮಾನಗಳಿಸಿದರು. ದಾವಣಗೆರೆಯ ಕೆ.ಎಚ್​.ಅಣ್ಣಪ್ಪ ತೃತೀಯ ಸ್ಥಾನಗಳಿಸಿ 5 ಸಾವಿರ ರೂ., ನಗದು ಬಹುಮಾನ ಗೆದ್ದುಕೊಂಡರು.

ಅಶ್ವಿನಿ ಅಕ್ಕುಂಚಿ ಚಾಲನೆ: ಭಾನುವಾರ ಬೆಳಗ್ಗೆ ಸುರಿದ ಧಾರಾಕಾರ ಮಳೆಯ ನಡುವೆಯೇ 10ಕೆ ಮ್ಯಾರಥಾನ್​ ಸ್ಪರ್ಧೆಗೆ ಖ್ಯಾತ ಅಥ್ಲೀಟ್​ ಅಶ್ವಿನಿ ಅಕ್ಕುಂಚಿ ಚಾಲನೆ ನೀಡಿದರು. ಸಿದ್ದಗಂಗಾ ಮಠಾಧ್ಯಕ್ಷ ಸಿದ್ದಲಿಂಗ ಶ್ರೀಗಳು ಸಾನ್ನಿಧ್ಯವಹಿಸಿದ್ದರು. ಸಿದ್ಧಗಂಗಾ ವೈದ್ಯಕಿಯ ಕಾಲೇಜಿನ ಕಾರ್ಯದರ್ಶಿ ಟಿ.ಎಂ.ಸ್ವಾಮಿ, ಸಿದ್ದಗಂಗಾ ಆಸ್ಪತ್ರೆ ನಿರ್ದೇಶಕ ಡಾ.ಎಸ್​.ಪರಮೇಶ್​, ಹೃದ್ರೋಗ ತಜ್ಞ ಡಾ.ಎಚ್​.ಎಂ.ಭಾನುಪ್ರಕಾಶ್​, ಸಿದ್ಧಗಂಗಾ ವೈದ್ಯಕಿಯ ಕಾಲೇಜಿನ ಪ್ರಾಚಾರ್ಯರಾದ ಡಾ.ಶಾಲಿನಿ, ವೈದ್ಯಕಿಯ ಅಧೀಕ್ಷಕ ಡಾ.ನಿರಂಜನಮೂರ್ತಿ, ಡಾ.ಶರತ್​ ಕುಮಾರ್​, ಡಾ.ನಿಲೇಶ್​, ಡಾ.ರವಿಚಂದ್ರ, ಸಿಇಒ ಡಾ.ಸಂಜೀವಕುಮಾರ್​, ಜಿಲ್ಲಾ ಅಥ್ಲಿಟಿಕ್​ ಅಸೋಸಿಯೇಷನ್​ ಕಾರ್ಯದರ್ಶಿ ಎ.ಎನ್​. ಪ್ರಭಾಕರ್​, ದೈಹಿಕ ಶಿಕ್ಷಣನಿರ್ದೇಶಕರುಗಳಾದ ಡಿ.ಎಸ್​.ಯೋಗೀಶ್​, ಕೆ.ಎಸ್​.ಜೈಶಂಕರ್​, ಟಿ.ಆರ್​.ಬಸವರಾಜು, ಉಪಸ್ಥಿತರಿದ್ದರು.

ಮ್ಯಾರಥಾನ್​ಗೆ ಚಾಲನೆ ನೀಡಿದ ಖ್ಯಾತ ಅಥ್ಲೀಟ್​ ಅಶ್ವಿನಿ ಅಕ್ಕುಂಚಿ ಮಾತನಾಡಿ ಕ್ರೀಡಾ ಚಟುವಟಿಕೆಗಳೇ ಪರಿಪೂರ್ಣ ಆರೋಗ್ಯದ ಗುಟ್ಟು. ದೈಹಿಕ ಆರೋಗ್ಯದ ಜತೆಗೆ ಮಾನಸಿಕ ಸ್ವಾಸ್ಥ್ಯ ಕಾಪಾಡಿಕೊಂಡಾಗ ಮಾತ್ರ ಸದೃಢ ವ್ಯಕ್ತಿತ್ವ ನಿರ್ಮಾಣವಾಗುತ್ತದೆ. ಮಳೆಯಲ್ಲು ಮ್ಯಾರಥಾನ್​ ಸ್ಪರ್ಧೆಯಲ್ಲಿ ಓಡಿದ ಅಥ್ಲೀಟ್​ಗಳ ಕ್ರೀಡಾಸ್ಪೂರ್ತಿ ಪ್ರಶಂಸನಾರ್ಹ ಎಂದರು.