ಹಿಮಪಾತಕ್ಕೆ ಸಿಲುಕಿದ್ದ ಯೋಧನ ಅವಶೇಷ 38 ವರ್ಷಗಳ ಬಳಿಕ ಪತ್ತೆ!

ನವದೆಹಲಿ: ದೇಶ ಸ್ವಾತಂತ್ರ್ಯದ ಅಮೃತ ಮಹೋತ್ಸವದ ಸಂಭ್ರಮದಲ್ಲಿ ಇರುವ ಈ ಸಂದರ್ಭದಲ್ಲಿ ಯೋಧರೊಬ್ಬರ ಮರಣಾವಶೇಷ 38 ವರ್ಷಗಳ ಬಳಿಕ ಪತ್ತೆಯಾಗಿದೆ. ಈ ಮೂಲಕ ಹಿಮಪಾತಕ್ಕೆ ಒಳಗಾಗಿದ್ದ ಸೈನಿಕರ ಪೈಕಿ ಇನ್ನೊಬ್ಬರ ಅವಶೇಷ ಹಾಗೂ ಗುರುತು ಪತ್ತೆ ಆದಂತಾಗಿದೆ.

ಸಿಯಾಚಿನ್ ಹೀರೋ ಲ್ಯಾನ್ಸ್​ ನಾಯ್ಕ್​ ಚಂದ್ರಶೇಖರ್ ಅವರು ಅಸ್ಥಿಪಂಜರದ ಭಾಗಗಳು ಆ. 13ರಂದು ಸಿಯಾಚಿನ್​ನ 16,000 ಅಡಿ ಆಳದಲ್ಲಿ ಸಿಕ್ಕಿವೆ. ಇವರ ಪತ್ನಿಗೆ ಈಗ 65 ವರ್ಷವಾಗಿದ್ದು, ಇವರೊಂದಿಗೆ ಇಬ್ಬರು ಪುತ್ರಿಯರು 38 ವರ್ಷಗಳ ಬಳಿಕ ಇವರ ಮರಣಾವಶೇಷವನ್ನಾದರೂ ಪಡೆಯುವಂತಾಗಿದೆ. ಚಂದ್ರಶೇಖರ್​ 1984ರಲ್ಲಿ ಸಿಯಾಚಿನ್​ನಲ್ಲಿ ನಡೆದ ಆಪರೇಷನ್ ಮೇಘದೂತ್​ನಲ್ಲಿ ಪಾಲ್ಗೊಂಡಿದ್ದರು.

ಪಾಕಿಸ್ತಾನ ಕಣ್ಣಿಟ್ಟಿದ್ದ ಪಾಯಿಂಟ್ 5965 ವಶದಲ್ಲಿರಿಸಿಕೊಳ್ಳುವ ಕಾರ್ಯಾಚರಣೆಯಲ್ಲಿದ್ದ ತಂಡದಲ್ಲಿ ಚಂದ್ರಶೇಖರ್ ಇದ್ದರು. ಇವರಿದ್ದ 19 ಕುಮಾವೊನ್ ರೆಜಿಮೆಂಟ್ 1984ರ ಮೇ 29ರಂದು ಸಿಯಾಚಿನ್ ಗ್ಲೇಸಿಯರ್​ನಲ್ಲಿ ನಡೆದ ಆಪರೇಷನ್​ ಮೇಘದೂತ್​ನಲ್ಲಿ ಪಾಲ್ಗೊಂಡಿತ್ತು. ಆದರೆ ಅಂದು ಒಬ್ಬ ಅಧಿಕಾರಿ ಸೇರಿದಂತೆ 18 ಮಂದಿ ಯೋಧರು ಹಿಮಪಾತಕ್ಕೆ ಸಿಲುಕಿದ್ದು, ಆ ಪೈಕಿ 14 ಮಂದಿಯ ಪತ್ತೆಯಾಗಿತ್ತು. ಉಳಿದವರ ಸುಳಿವು ಕೂಡ ಸಿಕ್ಕಿರಲಿಲ್ಲ. ಆದರೆ ಆಗಸ್ಟ್ 13ರಂದು ಸೈನಿಕರಿಗೆ ಅದೃಷ್ಟವಶಾತ್​ ಲ್ಯಾನ್ಸ್​ ನಾಯ್ಕ್ ಅಸ್ತಿಪಂಜರದ ಅವಶೇಷಗಳು ಸಿಕ್ಕಿವೆ. ಇದರೊಂದಿಗೆ ಸೇನೆಯ ಸಂಖ್ಯೆ ಇರುವ ಡಿಸ್ಕ್ ಕೂಡ ಸಿಕ್ಕಿದ್ದರಿಂದು ಅದು ಲ್ಯಾನ್ಸ್​ ನಾಯ್ಕ್​ ಚಂದ್ರಶೇಖರ್ ಮರಣಾವಶೇಷ ಎಂಬುದನ್ನು ಗುರುತು ಹಿಡಿಯಲಾಗಿದೆ.

ಹಿಮ ಕರಗಲಾರಂಭಿಸಿದಾಗ ನಾಪತ್ತೆಯಾದ ಯೋಧರ ಪತ್ತೆಗಾಗಿ ಕಾರ್ಯಾಚರಣೆ ನಡೆಸಲಾಗುತ್ತದೆ. ಅಂಥದ್ದೇ ಕಾರ್ಯಾಚರಣೆಯಲ್ಲಿ ಸಿಯಾಚಿನ್​ ಗ್ಲೇಷಿಯರ್​ನ ಹಳೇ ಬಂಕರ್​ನಲ್ಲಿ ಈ ಮರಣಾವಶೇಷಗಳು ಪತ್ತೆಯಾಗಿವೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಈ ದುರಂತ ಸಂಭವಿಸಿದ್ದಾಗ ಲ್ಯಾನ್ಸ್ ನಾಯ್ಕ್ ಚಂದ್ರೇಶೇಖರ್ ಅವರ ಮೊದಲ ಪುತ್ರಿಗೆ 8 ಹಾಗೂ ಎರಡನೇ ಪುತ್ರಿ ನಾಲ್ಕು ವರ್ಷಗಳಾಗಿದ್ದವು. ಈಗ 38 ವರ್ಷಗಳ ಬಳಿಕ ಅವರು ತಮ್ಮ ತಂದೆಯನ್ನು ಈ ರೀತಿ ನೋಡುವಂತಾಗಿದೆ. ಈ ಮರಣಾವಶೇಷಗಳನ್ನು ಉತ್ತರಾಖಂಡದ ಹಲ್ದ್ವಾನಿಯಲ್ಲಿರುವ ಕುಟುಂಬಸ್ಥರಿಗೆ ಹಸ್ತಾಂತರಿಸಲಿದ್ದು, ಅಲ್ಲಿಯೇ ಅಂತಿಮ ವಿಧಿ-ವಿಧಾನಗಳು ನಡೆಯಲಿವೆ.

https://www.vijayavani.net/flag-hoisting-at-chamarajpet-ground-for-republic-day-also/

https://www.vijayavani.net/single-woman-murdered-at-home-security-guard-missing/

https://www.vijayavani.net/bbmp-ex-deputy-mayor-suicide-attempt-and-tried-to-draw-attention-of-modi/