ಶೋಭಾ ಕೊಟ್ಟ ವಿಶೇಷ ಉಡುಗೊರೆಗೆ ರಾಷ್ಟ್ರ ನಾಯಕಿಯರು ಫಿದಾ! ಆ ಸರ್​ಪ್ರೈಸ್​ ಗಿಫ್ಟ್​ ಕರ್ನಾಟಕದ್ದು...

ಬೆಂಗಳೂರು: ಉಡುಪಿ-ಚಿಕ್ಕಮಗಳೂರು ಸಂಸದೆ ಶೋಭಾ ಕರಂದ್ಲಾಜೆ ಅವರು ಕೇಂದ್ರ ಸಚಿವೆ ನಿರ್ಮಲಾ ಸೀತಾರಾಮನ್​ ಸೇರಿದಂತೆ ಹಲವರಿಗೆ ವಿಶೇಷ ಉಡುಗೊರೆ ನೀಡಿದ್ದಾರೆ.

ನಿರ್ಮಲಾ ಸೀತಾರಾಮನ್​, ಸ್ಮೃತಿ ಇರಾನಿ, ಮನೇಕಾ ಗಾಂಧಿ, ಶೆಫಾಲಿ ವೈದ್ಯ, ದೇಬಶ್ರೀ, ಮೀನಾಕ್ಷಿ ಲೆಖಿ, ವನತಿ, ಡಿಎಂಕೆ ಕನಿಮೋಳಿ ಸೇರಿದಂತೆ ಹಲವರಿಗೆ ಉಡುಪಿ ಸೀರೆಗಳನ್ನು ಕರಂದ್ಲಾಜೆ ಗಿಫ್ಟ್​ ಕೊಟ್ಟಿದ್ದಾರೆ. ದೀಪಾವಳಿ ಹಬ್ಬದ ಪ್ರಯುಕ್ತ ಸ್ಥಳೀಯವಾಗಿ ಉಡುಪಿ ಸೀರೆಗಳನ್ನು ಖರೀದಿಸಿದ ಸಂಸದೆ, ಮಹಿಳಾ ನಾಯಕಿಯರಿಗೆ ಉಡುಗೊರೆ ಕೊಟ್ಟು ಶುಭಕೋರಿದ್ದಾರೆ. ಆ ಮೂಲಕ ಉಡುಪಿ ಕೈಮಗ್ಗವನ್ನು ರಾಷ್ಟ್ರಮಟ್ಟದ ನಾಯಕಿಯರಿಗೂ ಮತ್ತೊಮ್ಮೆ ಪರಿಚಯಿಸುವ ಯತ್ನ ಮಾಡಿದ್ದಾರೆ. ಇನ್ನು ಸಂಸದೆ ಕೊಟ್ಟ ಸೀರೆಗೆ ಫಿದಾ ಆಗಿರುವ ಶೆಫಾಲಿ ವೈದ್ಯ ಟ್ವಿಟರ್​ನಲ್ಲಿ ಸಂತಸ ಹಂಚಿಕೊಂಡಿದ್ದಾರೆ.

ಇದಕ್ಕೆ ಪ್ರತಿಕ್ರಿಯಿಸಿರುವ ಕರಂದ್ಲಾಜೆ, ನಾನು ಕೊಟ್ಟ ಉಡುಪಿ ಸೀರೆಯನ್ನು ನಿಮಗೆ ಇಷ್ಟವಾಗಿದ್ದಕ್ಕೆ ಸಂತೋಷವಾಗಿದೆ! ಉಡುಪಿ ಕೃಷ್ಣ ದೇವರಿಗೂ ಶುಕ್ರವಾರದಂದು ಉಡುಪಿ ಸೀರೆ ಧರಿಸಿ ಲಕ್ಷ್ಮೀ ರೂಪದಲ್ಲಿ ಪೂಜಿಸುವುದನ್ನು ಕಂಡಿದ್ದೇವೆ. ಈ ಸಂಪ್ರದಾಯವನ್ನು ಪುನರುಜ್ಜೀವನಗೊಳಿಸುವ ಬಗ್ಗೆ ಶ್ರೀ ಈಶಪ್ರಿಯ ತೀರ್ಥರು ಮಾತನಾಡಿದ್ದಾರೆ. ನಮ್ಮ ಕುಶಲಕರ್ಮಿಗಳಿಗೆ ಬೆಂಬಲ ನೀಡೋಣ ಎನ್ನುವ ಮೂಲಕ ಇದೆಲ್ಲವೂ ಸ್ಥಳೀಯ ಕೈಮಗ್ಗ ಉತ್ತೇಜನದ ಯತ್ನ ಎಂಬುದನ್ನು ಮತ್ತೊಮ್ಮೆ ಸ್ಪಷ್ಟಪಡಿಸಿದ್ದಾರೆ.

ಇದೀಗ ಮತ್ತೆ ಉಡುಪಿ ಸೀರೆಗೆ ಡಿಮಾಂಡ್​ ಬಂದಿದ್ದು, ಸಾಂಪ್ರದಾಯಿಕ ಹಬ್ಬದಲ್ಲೂ ಈ ಸೀರೆಯನ್ನುಟ್ಟು ಸಂಭ್ರಮಿಸಲು ಎಲ್ಲ ವಯೋಮಾನದ ನಾರಿಯರೂ ಸೈ ಎನ್ನುತ್ತಿದ್ದಾರೆ. ಇನ್ನು ಗೆಳತಿ, ಕುಟುಂಬದ ಮಹಿಳೆಯರಿಗೆ ಗಿಫ್ಟ್​ ಕೊಡಬೇಕು ಎಂದಾದರೆ ಉಡುಪಿ ಸೀರೆಗೂ ಮನ್ನಣೆ ಸಿಗುತ್ತಿರುವುದು ಆಶಾದಾಯಕ.