ಸರ್ಕಾರಿ ನೌಕರರಿಗೆ ಶಿವರಾತ್ರಿ ಸಿಹಿ; 13,500 ಸಿಬ್ಬಂದಿಗೆ ಅನುಕೂಲ

| ಕೀರ್ತಿನಾರಾಯಣ ಸಿ.. ಬೆಂಗಳೂರು

ನೂತನ ಪಿಂಚಣಿ ಯೋಜನೆ (ಎನ್​ಪಿಎಸ್) ವ್ಯಾಪ್ತಿ ಸೇರಿರುವ ಸರ್ಕಾರಿ ನೌಕರರನ್ನು ಹಳೇ ಪಿಂಚಣಿ ಯೋಜನೆ (ಒಪಿಎಸ್) ವ್ಯಾಪ್ತಿಗೆ ಒಳಪಡಿಸಬೇಕೆಂಬ ಹೋರಾಟ ಕಿಚ್ಚು ಹತ್ತಿಸಿರುವ ನಡುವೆಯೇ ಸರ್ಕಾರಿ ಸಿಬ್ಬಂದಿಗೆ ರಾಜ್ಯ ಸರ್ಕಾರ ಸಿಹಿ ಸುದ್ದಿ ಕೊಟ್ಟಿದೆ.

ಎನ್​ಪಿಎಸ್​ನಿಂದ ಒಪಿಎಸ್ ವ್ಯಾಪ್ತಿಗೆ ಬಂದಿರುವ 13500 ನೌಕರರಿಗೆ ಒಪಿಎಸ್ ಸೌಲಭ್ಯ ಪಡೆಯಲು ಸರ್ಕಾರ ಕೊನೆಗೂ ಹಸಿರುನಿಶಾನೆ ತೋರಿದೆ. ಇದಿಷ್ಟೇ ಅಲ್ಲ, 50 ವರ್ಷ ಮೀರದ ಎಲ್ಲ ಸರ್ಕಾರಿ ಅಧಿಕಾರಿ ಮತ್ತು ನೌಕರರಿಗೆ 7ನೇ ವೇತನ ಶ್ರೇಣಿಗೆ ಅನುಗುಣವಾಗಿ ಕನಿಷ್ಠ ವಿಮಾ ಕಂತನ್ನು ಹೆಚ್ಚಿಸಿ ಆದೇಶ ಹೊರಡಿಸಿದೆ. ಕಡ್ಡಾಯವಾಗಿ ವಿಮಾ ಕಂತನ್ನು ಅಪ್​ಡೇಟ್ ಮಾಡಲು ಗಡುವು ಕೊಟ್ಟಿದೆ.

2006ರ ಏಪ್ರಿಲ್ ಪೂರ್ವ ನೇಮಕಾತಿ ಅಧಿಸೂಚನೆಯಾಗಿ ನಂತರ ನೇಮಕಗೊಂಡಿರುವ 13500 ನೌಕರರನ್ನು ಎನ್​ಪಿಎಸ್​ನಿಂದ ಒಪಿಎಸ್ ವ್ಯಾಪ್ತಿಗೆ ಒಳಪಡಿಸಿ 2024ರ ಜ.1ರಂದು ರಾಜ್ಯ ಸರ್ಕಾರ ಆದೇಶಿಸಿದೆ. ಸುಪ್ರೀಂಕೋರ್ಟ್ ತೀರ್ಪಿನ ಮೇಲೆ ಕೇಂದ್ರ ಸರ್ಕಾರ ಹೊರಡಿಸಿದ ಆದೇಶದ ಮೇಲೆ ರಾಜ್ಯ ಸರ್ಕಾರ ಒಪಿಎಸ್​ಗೆ ಒಳಪಡಿಸಿತ್ತು. ಆದರೆ, 2006ಕ್ಕಿಂತ ಮುಂಚೆ ನೇಮಕಗೊಂಡಿರುವ 2.45 ಲಕ್ಷ ನೌಕರರು ರಾಜ್ಯದಲ್ಲಿದ್ದು, ಅವರೆಲ್ಲರನ್ನೂ ಎನ್​ಪಿಎಸ್​ನಿಂದ ಹಳೇ ಪಿಂಚಣಿ ವ್ಯವಸ್ಥೆ ವ್ಯಾಪ್ತಿಗೆ ಒಳಪಡಿಸಬೇಕೆಂದು ಸರ್ಕಾರಿ ನೌಕರರ ಹೋರಾಟ ಈಗಲೂ ಮುಂದುವರಿದಿದೆ.

ಪ್ರಮುಖ ಸೂಚನೆಗಳೇನು?

• ಇಲಾಖಾ ಮುಖ್ಯಸ್ಥರ ದೃಢೀಕರಣ ಪತ್ರ ಕೊಡಬೇಕು
• ಎನ್​ಪಿಎಸ್​ಗೆ ಒಳಪಡಲ್ಲ ಎಂಬ ದೃಢೀಕರಣ ಬೇಕು
• ಎನ್​ಪಿಎಸ್ ವಂತಿಗೆ ಕಡಿತ ತಕ್ಷಣ ಸ್ಥಗಿತವಾಗಬೇಕು
• ಜಿಪಿಎಫ್, ಎನ್​ಪಿಎಸ್ ವಿವರಗಳನ್ನು ಕೊಡಬೇಕು
• ಡಿಡಿಒ ಎನ್​ಪಿಎಸ್ ಘಟಕಗಳಿಗೆ ವಿವರ ಸಲ್ಲಿಸಬೇಕು
• ಪ್ರಾನ್ ಖಾತೆ ಹಂಚಿಕೆ ಮುನ್ನ ನಿವೃತ್ತಿ ಆದರೆ ನಿಯಮ
• ಅದಕ್ಕೂ ಇಲಾಖಾ ಮುಖ್ಯಸ್ಥರ ದೃಢೀಕರಣ ಪತ್ರ ಬೇಕು
• ಮರಣ ಹೊಂದಿದ್ದರೂ ದೃಢೀಕರಣ ಪತ್ರ ನೀಡಬೇಕು
• ಎನ್​ಪಿಎಸ್ ಬಿಟ್ಟು ಬೇರೆ ಮೊತ್ತ ಕಟಾವಣೆ ಆಗಿರಬಾರ್ದು
• ಕಟಾವಣೆ ಆಗುವುದುಕ್ಕೆ ಬಾಕಿ ಮೊತ್ತ ಕೂಡ ಇರಬಾರದು
• ಮೃತರ ನಾಮನಿರ್ದೇಶಿತರು ಉಪಧನ ಕೋರಬಹುದು
• ಕುಟುಂಬ ಪಿಂಚಣಿಗೂ ಮನವಿ ಸಲ್ಲಿಸುವುದಕ್ಕೂ ಅವಕಾಶ
• ಮೃತರ ಸಂಬಂಧಿತ ಪಾವತಿ, ಪರಿಹಾರ ವಿವರ ಸಲ್ಲಿಸಬೇಕು
• ದಾಖಲೆ ಪರಿಶೀಲನೆ ಬಳಿಕ ಪ್ರಾನ್ ಖಾತೆ ಮೊತ್ತ ವರ್ಗಾವಣೆ

ಎನ್​ಪಿಎಸ್ ನೌಕರರ ಆಗ್ರಹವೇನು?

• ಎಲ್ಲ 2.45 ಲಕ್ಷ ನೌಕರರನ್ನು ಒಪಿಎಸ್​ಗೆ ಒಳಪಡಿಸಬೇಕು
• ಪಿಎಫ್ ಆರ್​ಡಿಗೆ ಪಾವತಿ ಆದ ಹಣ ವಾಪಸ್ ಸಿಗಬೇಕು
• ಹಣ ವಾಪಸ್ ಪಡೆಯಲು ಕಾನೂನಿಗೆ ತಿದ್ದುಪಡಿ ಆಗಬೇಕು
•  ಎನ್​ಪಿಎಸ್ ನೌಕರರ ವಂತಿಕೆ ಕಡಿತ ಕೂಡಲೇ ನಿಲ್ಲಿಸಬೇಕು

ಈ ಮಧ್ಯೆ ಹಳೇ ಪಿಂಚಣಿ ವ್ಯವಸ್ಥೆಗೆ ಒಳಪಟ್ಟಿರುವವರಿಗೆ ಒಪಿಎಸ್ ಸೌಲಭ್ಯ ಪಡೆಯುವ ಜತೆಗೆ ಎನ್​ಪಿಎಸ್ ಅನ್ವಯ 2006ರಿಂದ 2024ರವರೆಗೆ ಕಡಿತಗೊಂಡಿರುವ ಶೇ.10 ಹಣವನ್ನು ತಮ್ಮ ಖಾತೆಯಿಂದ ಹಿಂಪಡೆಯಲು ಸರ್ಕಾರ ಅವಕಾಶ ಕಲ್ಪಿಸಿದೆ. ಸರ್ಕಾರ ಇದಕ್ಕೆ ಶೇ.14 ಹಣವನ್ನು ಸೇರಿಸಿ ನೌಕರನ ಖಾತೆಗೆ ಹಾಕಲಿದೆ. ಈಗ ಒಪಿಎಸ್ ವ್ಯಾಪ್ತಿಗೆ ಹಿಂದಿರುಗಿರುವ 13500 ನೌಕರರಿಗೆ ತಮ್ಮ ಪ್ರಾನ್ ಖಾತೆಯಲ್ಲಿರುವ ಹಣ ಹಾಗೂ ಸರ್ಕಾರದ ವಂತಿಗೆಯನ್ನು ಹಿಂಪಡೆಯಲು ಅವಕಾಶ ಕೊಡಲಾಗಿದೆ. ಪ್ರಾನ್ ಖಾತೆಯಲ್ಲಿರುವ ಹಣವನ್ನು ಹಿಂಪಡೆಯಲು ಏನೆಲ್ಲ ಕ್ರಮ ಕೈಗೊಳ್ಳಬೇಕು ಹಾಗೂ ಅಧಿಕಾರಿಗಳ ಜವಾಬ್ದಾರಿ ಏನೆಂದು ಸುದೀರ್ಘವಾದ ಆದೇಶ ಹೊರಡಿಸಿದೆ.

ಯಾರಿಗೆ ಅನುಕೂಲ?

ಸೇವೆಯಲ್ಲಿರುವ, ನಿವೃತ್ತಿ ಹೊಂದಿರುವ ಹಾಗೂ ಮೃತಪಟ್ಟಿರುವ ಸರ್ಕಾರಿ ಅಧಿಕಾರಿ ಹಾಗೂ ನೌಕರರ ಸಾವಿರಾರು ಕುಟುಂಬಗಳಿಗೆ ಅನುಕೂಲವಾಗಲಿದೆ.

ವಿಮಾ ಕಂತಿಗೆ ಫೆ.28ರ ಗಡುವು

50 ವರ್ಷ ಮೀರದ ನೌಕರರಿಗೆ ವಿಮೆ ಕಡ್ಡಾಯ ಮಾಡಲಾಗಿದೆ. ಸರಾಸರಿ ವೇತನ ಶ್ರೇಣಿಯಲ್ಲಿ ಕನಿಷ್ಠ ಶೇ.6.25 ಮಾಸಿಕ ವಿಮಾ ಕಂತು ಕಟಾವಣೆ ಆಗುತ್ತಿತ್ತು. 7ನೇ ವೇತನ ಆಯೋಗದ ಶಿಫಾರಸಿನಂತೆ ಜುಲೈನಿಂದ ಪೂರ್ವಾನ್ವಯವಾಗುವಂತೆ ನೌಕರರ ವೇತನ ಶೇ.10 ಹೆಚ್ಚಳವಾಗಿದೆ. ಹೊಸ ವೇತನಕ್ಕೆ ಅನುಗುಣವಾಗಿ ವಿಮಾ ಮೊತ್ತ ಹೆಚ್ಚಿಸಬೇಕು. ಅದರಂತೆ 27000-46675 ವೇತನ ಶ್ರೇಣಿ ಹೊಂದಿರುವವರು ಕನಿಷ್ಠ ವಿಮಾ ಕಂತು 2300 ರೂ. ಇರಬೇಕು. 29600 - 52800 ವೇತನ ಶ್ರೇಣಿ ಇರುವವರ ವಿಮಾ ಕಂತು 2580 ರೂ. ಇರಬೇಕು. ಹೀಗೆ ಆಯಾ ಶ್ರೇಣಿಗೆ ತಕ್ಕಂತೆ ಹೆಚ್ಚಿಸಲಾಗಿದೆ. ಎಲ್ಲರೂ ವಿಮಾ ಕಂತನ್ನು ಕಡ್ಡಾಯವಾಗಿ ಹೆಚ್ಚಿಸಿಕೊಳ್ಳಬೇಕು ಎಂದು ಸರ್ಕಾರ ಫೆ.28ರ ಗಡುವು ಕೊಟ್ಟಿದೆ.

ರದ್ದಾಗುವವರೆಗೆ ಹೋರಾಟ ನಿಲ್ಲಲ್ಲ

ಎನ್​ಪಿಎಸ್ ರದ್ದಾಗುವವರೆಗೆ ಹೋರಾಟ ನಿಲ್ಲಲ್ಲ, ಎನ್​ಪಿಎಸ್ ರದ್ದುಪಡಿಸುವುದಾಗಿ ಕಾಂಗ್ರೆಸ್ ಸರ್ಕಾರ ಭರವಸೆ ನೀಡಿದೆ. ಸಾಧಕ-ಬಾಧಕ ಅಧ್ಯಯನಕ್ಕೆ ಸಮಿತಿ ರಚಿಸಿದೆ. ಆದರೆ, ಸಮಿತಿ ರಚನೆ ಮಾಡಿದ್ದ ಕೇರಳ, ಆಂಧ್ರಪ್ರದೇಶ ಸೇರಿ ಯಾವ ರಾಜ್ಯಗಳಲ್ಲೂ ಸಮಿತಿ ಪರಿಹಾರ ಕೊಟ್ಟಿಲ್ಲ. ರಾಜಸ್ಥಾನ, ಚತ್ತೀಸ್​ಘಡ, ಹಿಮಾಚಲಪ್ರದೇಶ ಹಾಗೂ ಜಾರ್ಖಂಡ್ ರಾಜ್ಯಗಳಲ್ಲಿ ಈಗಾಗಲೇ ಎನ್​ಪಿಎಸ್ ರದ್ದಾಗಿದೆ. ಅದರಂತೆ ಕರ್ನಾಟಕದಲ್ಲೂ ರದ್ದಾಗಬೇಕು ಎಂದು ಎನ್​ಪಿಎಸ್ ನೌಕರರ ಸಂಘ ಒತ್ತಾಯಿಸಿದೆ.

https://www.vijayavani.net/dont-do-these-things-on-maha-shivaratri