Strait of Hormuz Ship Inciden: ಸಮುದ್ರದಲ್ಲಿ ತೇಲುತ್ತಿರುವ ಐಫೋನ್ ಬಾಕ್ಸ್‌ಗಳು, ದುಬಾರಿ ಪರ್ಫ್ಯೂಮ್ ಬಾಟಲಿಗಳು… ಅವುಗಳನ್ನು ಸಣ್ಣ ದೋಣಿಗಳಲ್ಲಿ ಬಂದವರು ಸಂಗ್ರಹಿಸುತ್ತಿರುವ ದೃಶ್ಯಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ. ಇರಾನ್ ಸಮುದ್ರದ ಮೈನ್‌ಗೆ ಡಿಕ್ಕಿ ಹೊಡೆದು ಮುಳುಗಿದೆ ಎಂದು ಹೇಳಿರುವ ಸರಕು ಹಡಗಿನ ಘಟನೆಯ ಬಳಿಕ ಈ ವಿಡಿಯೋಗಳು ಹರಿದಾಡುತ್ತಿವೆ.
ದುಬೈನಿಂದ ಸರಕು ಸಾಗಿಸುತ್ತಿದ್ದ ಸಿಂಗಾಪುರ ಧ್ವಜದ ಜಿಎಫ್‌ಎಸ್ ಪ್ರೈಡ್ (GFS Pride) ಹಡಗು ಬುಧವಾರ ಕ್ಷಿಪಣಿಯಂತಹ ಉತ್ಕ್ಷೇಪಕದಿಂದ ಹಾನಿಗೊಳಗಾಗಿ ಬೆಂಕಿ ಹೊತ್ತಿಕೊಂಡ ಬಳಿಕ ಮುಳುಗಿದೆ ಎಂದು ಕಡಲ ಅಧಿಕಾರಿಗಳು ತಿಳಿಸಿದ್ದಾರೆ. ಹಡಗಿನಲ್ಲಿದ್ದ 21 ಸಿಬ್ಬಂದಿಯನ್ನು ಸುರಕ್ಷಿತವಾಗಿ ರಕ್ಷಿಸಲಾಗಿದ್ದು, ಯಾರಿಗೂ ಗಾಯಗಳಾಗಿಲ್ಲ.
ಹಡಗಿನಲ್ಲಿದ್ದ ಐಫೋನ್ ಬಾಕ್ಸ್‌ ಮತ್ತು ದುಬಾರಿ ಪರ್ಫ್ಯೂಮ್ಗಳು
ವರದಿಗಳ ಪ್ರಕಾರ, ಹಡಗು ಸುಮಾರು 2,500 ಕಂಟೈನರ್‌ಗಳನ್ನು ಸಾಗಿಸುತ್ತಿತ್ತು. ಇವುಗಳಲ್ಲಿ ಐಫೋನ್‌ಗಳು ಮತ್ತು ದುಬಾರಿ ಸುಗಂಧ ದ್ರವ್ಯಗಳಿದ್ದವು ಎನ್ನಲಾಗಿದೆ. ಆದರೆ, ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ವಿಡಿಯೋವನ್ನು ಸ್ವತಂತ್ರವಾಗಿ ಪರಿಶೀಲಿಸಲು ಸಾಧ್ಯವಾಗಿಲ್ಲ. ಹೀಗಾಗಿ, ವಿಡಿಯೋದಲ್ಲಿರುವ ವಸ್ತುಗಳು ಇದೇ ಹಡಗಿನಿಂದ ಬಂದಿವೆಯೇ ಎಂಬುದು ಖಚಿತವಾಗಿಲ್ಲ.
