ಕರೊನಾ ತುರ್ತು ನಿಗಾ ಉಲ್ಬಣ, ಕೇಂದ್ರದಿಂದ ಆಕ್ಸಿಜನ್ ಅಲರ್ಟ್!

ಬೆಂಗಳೂರು: ಕರೊನಾ ಕೈಮೀರಿರುವ ಸಂದರ್ಭದಲ್ಲಿ ಉಸಿರಾಟದ ಸಮಸ್ಯೆಗೆ ಸಿಲುಕಿ ಸೋಂಕಿತರ ಸಂಖ್ಯೆಯೂ ಗಣನೀಯವಾಗಿ ಹೆಚ್ಚಾಗಿದೆ. ವೆಂಟಿಲೇಟರ್ ಹಾಗೂ ಆಕ್ಸಿಜನ್ ಸಿಲಿಂಡರ್ ಬಳಕೆಗೆ ಬೇಡಿಕೆ ವಿಪರೀತವಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರ ಆಕ್ಸಿಜನ್ ಉತ್ಪಾದಕರ ಮೊರೆ ಹೋಗಿದೆ.

ಕೇಂದ್ರ ಗೃಹ ಇಲಾಖೆಯು ಎಲ್ಲ ರಾಜ್ಯದ ಆರೋಗ್ಯ ಮತ್ತು ಕೈಗಾರಿಕೆ ಇಲಾಖೆಗೆ ಪತ್ರ ಬರೆದು ಕೈಗಾರಿಕೆ ಉದ್ದೇಶಕ್ಕೆ ಆಕ್ಸಿಜನ್ ಸಿಲಿಂಡರ್ ಉತ್ಪಾದಿಸುವ ಘಟಕಗಳ ಮಾಹಿತಿ ಕೇಳಿದೆ. ರಾಜ್ಯವು ಪೂರ್ವ ತಯಾರಿಯಾಗಿ ಈ ಮಾಹಿತಿ ಸಿದ್ಧಪಡಿಸಿಕೊಂಡಿದ್ದು, ಕೇಂದ್ರಕ್ಕೆ ಕಳಿಸಿದೆ. ಆಕ್ಸಿಜನ್ ಸಿಲಿಂಡರ್ ಉತ್ಪಾದಿಸುವ ಮತ್ತು ಉತ್ಪಾದನಾ ಸಾಮರ್ಥ್ಯದ ಮಾಹಿತಿ ಕೇಳಿದ್ದು, ಬಳಿಕ ಉತ್ಪಾದಕರನ್ನು ವಿಶ್ವಾಸಕ್ಕೆ ತೆಗೆದುಕೊಂಡು ಆಕ್ಸಿಜನ್ ಸಿಲಿಂಡರ್ ಬಳಸಿಕೊಳ್ಳಲು ಕೇಂದ್ರ ಉದ್ದೇಶಿಸಿದೆ. ಈ ಸಂಬಂಧ ಇಷ್ಟರಲ್ಲೇ ಆದೇಶ ಕೂಡ ಹೊರಡಲಿದೆ.

ರಾಜ್ಯದಲ್ಲಿ ಒಟ್ಟು 48 ಘಟಕಗಳಲ್ಲಿ ಆಕ್ಸಿಜನ್ ಸಿಲಿಂಡರ್ ಉತ್ಪಾದನೆಯಾಗುತ್ತಿದೆ. ಅಂದಾಜು 19 ಸಾವಿರ ಸಿಲಿಂಡರ್ ಉತ್ಪಾದನಾ ಸಾಮರ್ಥ್ಯವಿದ್ದು, ಆರೋಗ್ಯ ಉದ್ದೇಶಕ್ಕೆ ಮೊದಲ ಆದ್ಯತೆಯಾಗಿ ನೀಡುವಂತೆ ಈ ಉತ್ಪಾದಕರಿಗೆ ಸೂಚನೆ ನೀಡಲಾಗುತ್ತದೆ. ತಾವು ಹೇಳುವವರೆಗೂ ಕೈಗಾರಿಕೆಗಳ ಬಳಕೆಗೆ ಸಿಲಿಂಡರ್ ನೀಡದೆ ಆರೋಗ್ಯ ಬಳಕೆಗೆ ನೀಡುವಂತೆ ಆದೇಶಿಸ ಲಾಗುತ್ತಿದೆ. ಉತ್ಪಾದಕರ ನೆಟ್​ವರ್ಕ್ ಮ್ಯಾಪಿಂಗ್ ಮಾಡಿ, ಈ ಘಟಕಗಳ ಸಮೀಪದ ಆಸ್ಪತ್ರೆಗಳಿಗೆ ಅಲ್ಲಿಂದ ಸರಬರಾಜಾಗುವಂತೆ, ಉತ್ಪಾದನಾ ಸಾಮರ್ಥ್ಯ ಹೆಚ್ಚಿ ಸಲು ಅವಕಾಶವಿದ್ದರೆ ಉತ್ಪಾದನೆ ಹೆಚ್ಚಿಸುವಂತೆಯೂ ಸರ್ಕಾರದಿಂದ ಸೂಚನೆ ಇದೆ ಎನ್ನುತ್ತವೆ ಮೂಲಗಳು.

ಜಿಲ್ಲಾಡಳಿತಗಳಿಗೆ ಸೂಚನೆ: ಆಕ್ಸಿಜನ್ ಸಿಲಿಂಡರ್ ಉತ್ಪಾದಕರಿಗೆ ಯಾವುದೇ ಅಡೆತಡೆ, ಸ್ಥಳೀಯ ಮಟ್ಟದಲ್ಲಿ ಹಸ್ತಕ್ಷೇಪ ಮಾಡದಂತೆ ಕೇಂದ್ರ ಸರ್ಕಾರ ಜಿಲ್ಲಾಡಳಿತಗಳಿಗೆ ಸ್ಪಷ್ಟ ಸೂಚನೆ ನೀಡಿದೆ. ಪರಿಸ್ಥಿತಿ ನಿಭಾಯಿಸಲು ಈ ಸಾಧನ ಅತ್ಯಗತ್ಯ. ಉತ್ಪಾದನಾ ಚಟುವಟಿಕೆಗೆ ಎಲ್ಲ ರೀತಿಯ ಸಹಕಾರ ನೀಡಲು ಕ್ರಮಕೈಗೊಳ್ಳಬೇಕೆಂದು ರಾಜ್ಯ ಸರ್ಕಾರಗಳಿಗೆ ಸೂಚಿಸಿದೆ.

ದೇಶದ ಸಾಮರ್ಥ್ಯವೇನು?: 5 ದೊಡ್ಡ ಮತ್ತು 600 ಸಣ್ಣ ಆಕ್ಸಿಜನ್ ಉತ್ಪಾದಕರು ದೇಶದಲ್ಲಿದ್ದಾರೆ. 400ಕ್ಕೂ ಮಿಕ್ಕಿ ಆಸ್ಪತ್ರೆಗಳು ಸ್ವತಃ ಆಕ್ಸಿಜನ್ ಉತ್ಪಾದಿಸುತ್ತಿವೆ ಮತ್ತು ಸುಮಾರು 1050 ಕ್ರಯೋಜಿನಿಕ್ ಟ್ಯಾಂಕರ್​ಗಳಿವೆ. 4.50 ಲಕ್ಷ ವೈದ್ಯಕೀಯ ಆಕ್ಸಿಜನ್ ಸಿಲಿಂಡರ್​ಗಳು ಪೂರೈಕೆಗೆ ಲಭ್ಯವಿದೆ. 1.03 ಲಕ್ಷ ಹೊಸ ವೈದ್ಯಕೀಯ ಆಕ್ಸಿಜನ್ ಸಿಲಿಂಡರ್​ಗೆ ಆದೇಶ ನೀಡಿದ್ದು, ಅದೀಗ ಹಂತಹಂತವಾಗಿ ಬಳಕೆಗೆ ಲಭ್ಯವಾಗುತ್ತಿದೆ.

ಎಲ್ಲಿ ಎಷ್ಟು ಉತ್ಪಾದಕರು?: ಬೆಂಗಳೂರು ಗ್ರಾಮಾಂತರ 7, ಬಳ್ಳಾರಿ 7, ಬೆಳಗಾವಿ 2, ವಿಜಯಪುರ 1, ದಾವಣಗೆರೆ 3, ಧಾರವಾಡ 3, ಕಲಬುರಗಿ 4, ಕಾರವಾರ 1, ಕೊಪ್ಪಳ 4, ಮಂಗಳೂರು 3, ಮೈಸೂರು 6, ರಾಯಚೂರು 3, ಶಿವಮೊಗ್ಗ 1, ತುಮಕೂರು 2, ರಾಮನಗರ 1.

https://www.vijayavani.net/network-survey-vehicle-to-measure-national-highways/

https://www.vijayavani.net/coronavirus-covid-19-dead-body-death-crematoria-bengaluru/