7 ಅಂಗಡಿಗಳಲ್ಲಿ ಸರಣಿ ಕಳ್ಳತನ

ಕೋಲಾರ: ನಗರದ ಡೂಂಲೈಟ್​ ವೃತ್ತ ಹಾಗೂ ಟೇಕಲ್​ ಮುಖ್ಯರಸ್ತೆಯಲ್ಲಿನ 7 ಅಂಗಡಿಗಳಲ್ಲಿ ಮಂಗಳವಾರ ರಾತ್ರಿ ಸರಣಿ ಕಳ್ಳತನ ನಡೆದಿದೆ.

ಮುಖಕ್ಕೆ ಮಂಕಿ ಕ್ಯಾಪ್​ ಧರಿಸಿರುವ ಕಳ್ಳರು ಅಪೋಲೊ ಮೆಡಿಕಲ್ಸ್​, ಮೆಡ್​ಪ್ಲಸ್​, ವಿ.ಮಾರ್ಟ್​ ಸೂಪರ್​ ಮಾರ್ಕೆಟ್​ ಸೇರಿ ವಿವಿಧ ಅಂಗಡಿಗಳಲ್ಲಿ ಕೈಚಳಕ ತೋರಿಸಿದ್ದು, ರಾಡ್​ನಿಂದ ಅಂಗಡಿ ಮುಂಭಾಗದ ಬಾಗಿಲು ಒಡೆದು ಒಳನುಗ್ಗಿರುವ ದೃಶ್ಯಾವಳಿಗಳು ಸಿಸಿಟಿವಿಯಲ್ಲಿ ಸೆರೆಯಾಗಿವೆ.

ಮೆಡ್​ಪ್ಲಸ್​ ಮಳಿಗೆಯಲ್ಲಿ 50 ಸಾವಿರ ರೂ. ನಗದು, ಅಪೋಲೋ ಮೆಡಿಕಲ್ಸ್​ನಲ್ಲಿ 11 ಸಾವಿರ, ದಿನಸಿ ಮಾರ್ಟ್​ಗಳ ಕ್ಯಾಶ್​ ಬಾಕ್ಸ್​ನಲ್ಲಿದ್ದ ಸಾವಿರಾರು ರೂಪಾಯಿ ಹಣವನ್ನು ಕಳುವು ಮಾಡಿ ಪರಾರಿಯಾಗಿದ್ದಾರೆ.

ಸಾಕಷ್ಟು ದಿನಗಳಿಂದ ನಗರದಲ್ಲಿ ಸರಣಿ ಕಳುವು, ಸರ ಕಳ್ಳತನ ಪ್ರಕರಣಗಳು ಇಲ್ಲವಾದ್ದರಿಂದ ಜನತೆ ನಿರಾಳರಾಗಿದ್ದರು. ಇದೀಗ ಒಂದೇ ರಾತ್ರಿಯಲ್ಲಿ 7 ಮಳಿಗೆಗಳಲ್ಲಿ ನಡೆದಿರುವ ಸರಣಿ ಕಳುವಿನಿಂದಾಗಿ ನಗರದ ಜನತೆ ಬೆಚ್ಚಿ ಬಿದ್ದಿದ್ದಾರೆ. ಘಟನೆ ಸಂಬಂಧ ನಗರ ಠಾಣೆ ಪೊಲೀಸರು ಭೇಟಿ ನೀಡಿ, ಬೆರಳಚ್ಚು ತಜ್ಞರನ್ನು ಕರೆಯಿಸಿ ಪರಿಶೀಲನೆ ನಡೆಸಿದ್ದು, ಪ್ರಕರಣ ದಾಖಲಾಗಿದೆ.