ನೌಕಾಪಡೆಗಾಗಿ 2.6 ಬಿಲಿಯನ್ ಡಾಲರ್ ಮೊತ್ತದಲ್ಲಿ 24 ‘ಎಂಎಚ್-60 ರೋಮಿಯೊ’ ಬಹುಕಾರ್ಯ ಹೆಲಿಕಾಪ್ಟರ್ಗಳು ಹಾಗೂ ಸೇನೆಗಾಗಿ 930 ಮಿಲಿಯನ್ ಡಾಲರ್ ಮೊತ್ತದಲ್ಲಿ 6 ‘ಎಎಚ್-64ಇ’ ಆಕ್ರಮಣಕಾರಿ ಅಪಾಚೆ ಹೆಲಿಕಾಪ್ಟರ್ಗಳನ್ನು ಭಾರತ ಖರೀದಿಸಲಿದೆ. ಅಮೆರಿಕ ಮತ್ತು ಭಾರತ ಮಧ್ಯೆ ಈ ಒಪ್ಪಂದಗಳಿಗೆ ಅಧಿಕೃತ ಮುದ್ರೆ ಬಿದ್ದರೆ ಮುಂದಿನ ಎರಡು ವರ್ಷಗಳಲ್ಲಿ ಮೊದಲ 6 ಹೆಲಿಕಾಪ್ಟರ್ಗಳು ಭಾರತಕ್ಕೆ ಸಿಗಲಿವೆ. ಬಳಿಕ 2025ರ ವೇಳೆಗೆ ಉಳಿದ 24 ಹೆಲಿಕಾಪ್ಟರ್ಗಳನ್ನೂ ಅಮೆರಿಕ ಹಸ್ತಾಂತರಿಸಲಿದೆ ಎಂದು ತಿಳಿದುಬಂದಿದೆ. ಈ ವ್ಯಾಪಾರದ ಮೂಲಕ 2007ರಿಂದ ಅಮೆರಿಕದಿಂದ ಭಾರತ ಖರೀದಿಸಿರುವ ರಕ್ಷಣಾ ಕ್ಷೇತ್ರದ ಸರಕುಗಳ ಒಟ್ಟು ಮೌಲ್ಯ ಬರೋಬ್ಬರಿ 20 ಬಿಲಿಯನ್ ಡಾಲರ್ ಗಡಿ ದಾಟಲಿದೆ. ಈಗಾಗಲೇ 2015ರಲ್ಲಿ 13,952 ಕೋಟಿ ರೂ. ಮೊತ್ತದಲ್ಲಿ ಮಾಡಿಕೊಂಡಿದ್ದ ಒಪ್ಪಂದಡಿ ಭಾರತಕ್ಕೆ ಇಂಥಹ 22 ಅತ್ಯಾಧುನಿಕ ಹೆಲಿಕಾಪ್ಟರ್ಗಳು ಲಭಿಸಿದ್ದು, ಅವುಗಳನ್ನು ಸೇನೆಯ ವಿವಿಧ ವಲಯಗಳಲ್ಲಿ ನಿಯೋಜಿಸಲಾಗಿದೆ.
