ಸಂವಿಧಾನ ಪೀಠಿಕೆಯಿಂದ ಜಾತ್ಯಾತೀತ, ಸಮಾಜವಾದಿ ಪದ ಕೈಬಿಡಲಾಗಿದೆ: ಅಧಿರ್​ ರಂಜನ್​ ಚೌಧರಿ ಆರೋಪ

ನವದೆಹಲಿ: ಹೊಸ ಸಂಸತ್​ ಭವನದ ಮೊದಲ ದಿನದಂದು ಸಂಸದರಿಗೆ ನೀಡಲಾದ ಸಂವಿಧಾನದ ಹೊಸ ಪ್ರತಿಗಳಲ್ಲಿ "ಜಾತ್ಯಾತೀತ" ಮತ್ತು "ಸಮಾಜವಾದಿ" ಎಂಬ ಪದಗಳನ್ನು ಸಂವಿಧಾನದ ಪೀಠಿಕೆಯಲ್ಲಿ ತೆಗೆಯಲಾಗಿದೆ ಎಂದು ಕಾಂಗ್ರೆಸ್​ ನಾಯಕ ಅಧಿರ್​ ರಂಜನ್​ ಚೌಧರಿ, ಕೇಂದ್ರ ಸರ್ಕಾರದ ವಿರುದ್ಧ ಮಂಗಳವಾರ ಗಂಭೀರ ಆರೋಪ ಮಾಡಿದ್ದಾರೆ.

ನಾವು ಇಂದು ಹೊಸ ಸಂಸತ್ ಭವನದಲ್ಲಿ ಕಾಲಿಡುವಾಗ ನೀಡಿದ ಸಂವಿಧಾನದ ಪ್ರತಿಯ ಪೀಠಿಕೆಯಲ್ಲಿ ಜಾತ್ಯತೀತ ಮತ್ತು ಸಮಾಜವಾದಿ ಪದಗಳಿಲ್ಲ. ಈ ಎರಡು ಪದಗಳು ಸಂವಿಧಾನದಲ್ಲಿ ಇಲ್ಲದಿದ್ದರೆ, ಅದು ಆತಂಕಕಾರಿ ಸಂಗತಿಯಾಗಿದೆ ಎಂದು ಲೋಕಸಭೆಯ ವಿರೋಧ ಪಕ್ಷದ ನಾಯಕ ಅಧೀರ್​ ರಂಜನ್​ ಚೌಧರಿ ಮಾಧ್ಯಮಕ್ಕೆ ತಿಳಿಸಿದ್ದಾರೆ.

ಸರ್ಕಾರವು ಈ ಬದಲಾವಣೆಯನ್ನು ಅತ್ಯಂತ "ಬುದ್ಧಿವಂತಿಕೆಯಿಂದ" ಮಾಡಿದೆ ಮತ್ತು ಅವರ ಉದ್ದೇಶವೇ ಒಂದು "ಸಮಸ್ಯೆ" ಎಂದು ಆರೋಪಿಸಿದರು. ಈ ವಿಚಾರವನ್ನು ಸಂಸತ್ತಿನಲ್ಲಿ ಪ್ರಸ್ತಾಪಿಸಲು ಬಯಸಿದ್ದೇನೆ. ಆದರೆ, ಅದಕ್ಕೆ ಅವಕಾಶವನ್ನೇ ನೀಡುತ್ತಿಲ್ಲ ಎಂದು ಚೌಧರಿ ಹೇಳಿದರು.

ಇದನ್ನೂ ಓದಿ: ಹೈಪರ್‌ಥೈಮೀಸಿಯಾ ಸುತ್ತ ದ್ವಂದ್ವ; ಪೊಲಿಟಿಕಲ್ ಡ್ರಾಮ, ಸೈನ್ಸ್ ಫಿಕ್ಷನ್ ಟ್ರೇಲರ್ ಬಿಡುಗಡೆ

ಆದರೆ, ಮಂಗಳವಾರ ಮುಂಜಾನೆ ಚೌಧರಿ ಅವರು ಸಂಸತ್ತಿನಲ್ಲಿ ಸಂವಿಧಾನದ ಪೀಠಿಕೆಯನ್ನು ಓದುತ್ತಿದ್ದರು. ಗಮನಾರ್ಹ ಸಂಗತಿ ಏನೆಂದರೆ, ಅವರು ಮುನ್ನುಡಿಯನ್ನು ಓದುವಾಗ "ಸಮಾಜವಾದಿ" ಮತ್ತು "ಜಾತ್ಯಾತೀತ" ಪದಗಳನ್ನು ಓದಿದರು. ಆದರೆ, ಈಗ ಈ ಎರಡು ಪದಗಳಿಲ್ಲ ಎಂಬ ಆರೋಪವನ್ನು ಮಾಡಿದ್ದಾರೆ.

ಮಂಗಳವಾರ ನೂತನ ಸಂಸತ್ ಭವನದ ಮೊದಲ ದಿನದಂದು ಸಂಸತ್ತಿನ ಸದಸ್ಯರಿಗೆ ಭಾರತದ ಸಂವಿಧಾನದ ಪ್ರತಿ, ಸಂಸತ್ತಿಗೆ ಸಂಬಂಧಿಸಿದ ಪುಸ್ತಕಗಳು, ಸ್ಮರಣಾರ್ಥ ನಾಣ್ಯ ಮತ್ತು ಅಂಚೆಚೀಟಿಯನ್ನು ಸ್ವೀಕರಿಸಿದರು. ನೂತನ ಸಂಸತ್​ ಸಂಕೀರ್ಣವನ್ನು ಮೇ 28 ರಂದು ಪ್ರಧಾನಿ ನರೇಂದ್ರ ಮೋದಿ ಉದ್ಘಾಟಿಸಿದರು. ಎರಡನೇ ದಿನದ ವಿಶೇಷ ಸಂಸತ್ ಅಧಿವೇಶನ ಹೊಸ ಕಟ್ಟಡದಲ್ಲಿ ನಡೆಯಿತು. (ಏಜೆನ್ಸೀಸ್​)

https://www.vijayavani.net/tiger-which-is-killed-minor-boy-captured-in-hd-kote

https://www.vijayavani.net/kaveri-water-delhi-meeting