ಸೆಕ್ಷನ್ 80ಸಿ ಮಿತಿ ಈಗ 1.5 ಲಕ್ಷ ರೂಪಾಯಿ: ಬಜೆಟ್​ನಲ್ಲಿ ಹೆಚ್ಚಳದ ನಿರೀಕ್ಷೆ

ಮುಂಬೈ: ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಜುಲೈ 23 ಅಥವಾ 24ರಂದು 2024ರ ಬಜೆಟ್ ಅನ್ನು ಮಂಡಿಸಲಿದ್ದಾರೆ. ಗ್ರಾಹಕ ಬಳಕೆ ಹೆಚ್ಚಿಸುವ ಗುರಿಯೊ0ದಿಗೆ ತೆರಿಗೆ ವಿನಾಯಿತಿ ನೀಡುವ ನಿರೀಕ್ಷೆಗಳು ಈ ಸಂದರ್ಭದಲ್ಲಿ ಗರಿಗೆದರಿವೆ.

ಸೆಕ್ಷನ್ 80ಸಿ ಮಿತಿಯ ಹೆಚ್ಚಳವು ಸಂಬಳ ಪಡೆಯುವ ವ್ಯಕ್ತಿಗಳಿಗೆ ಗಮನಾರ್ಹ ತೆರಿಗೆ ಪ್ರಯೋಜನ ಒದಗಿಸುತ್ತದೆ ಮತ್ತು ಆರ್ಥಿಕ ಬೆಳವಣಿಗೆಗೆ ಕಾರಣವಾಗಬಹುದು ಎಂದು ಹಲವಾರು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಒಂದು ದಶಕದಿಂದ ಈ ಮಿತಿಯು ಬದಲಾಗದೆ ಉಳಿದಿದೆ ಎಂಬ ಅಂಶವನ್ನು ಅವರು ಎತ್ತಿ ತೋರಿಸಿದ್ದಾರೆ.

2014ರಲ್ಲಿ ಅಂದಿನ ಹಣಕಾಸು ಸಚಿವ ಅರುಣ್ ಜೇಟ್ಲಿ ಅವರು ಸೆಕ್ಷನ್ 80ಸಿ ಮಿತಿಯನ್ನು ಪರಿಚಯಿಸಿದರು, ಹೆಚ್ಚುತ್ತಿರುವ ಜೀವನ ವೆಚ್ಚ ಮತ್ತು ಹಣದುಬ್ಬರದ ಹೊರತಾಗಿಯೂ ಸೆಕ್ಷನ್ 80 ಸಿ ಕಡಿತದ ಮಿತಿಯನ್ನು ಹೆಚ್ಚಿಸಲಾಗಿಲ್ಲ. ಪ್ರಸ್ತುತ, 2024-25ರ ಆರ್ಥಿಕ ವರ್ಷಕ್ಕೆ ಹಳೆಯ ತೆರಿಗೆ ಪದ್ಧತಿಯಡಿಯಲ್ಲಿ ವ್ಯಕ್ತಿಗಳು ರೂ 1.5 ಲಕ್ಷದವರೆಗೆ ಕಡಿತವನ್ನು ಪಡೆಯಬಹುದು. ಜೀವ ವಿಮಾ ಕಂತುಗಳು, ಬೋಧನಾ ಶುಲ್ಕಗಳು ಮತ್ತು ಗೃಹ ಸಾಲದ ಅಸಲು ಮರುಪಾವತಿಗಳ ಮೇಲಿನ ಖರ್ಚುಗಳ ಗಮನಾರ್ಹ ಏರಿಕೆಯಿಂದಾಗಿ, ಅನೇಕ ತೆರಿಗೆದಾರರು ಈ ಮಿತಿಯನ್ನು ತ್ವರಿತವಾಗಿ ಮುಟ್ಟುತ್ತಾರೆ.

ಏನಿದು ಸೆಕ್ಷನ್ 80 ಸಿ?:

ಸೆಕ್ಷನ್ 80 ಸಿ ತೆರಿಗೆದಾರರಿಗೆ ಕೆಲವು ಹೂಡಿಕೆಗಳು ಮತ್ತು ವೆಚ್ಚಗಳ ಮೇಲೆ ಕಡಿತಗಳನ್ನು ಪಡೆಯಲು ಅನುಮತಿಸುತ್ತದೆ, ಅವರ ತೆರಿಗೆಯ ಆದಾಯವನ್ನು ಕಡಿಮೆ ಮಾಡುತ್ತದೆ. ಈ ನಿಬಂಧನೆಯು ಸಾರ್ವಜನಿಕ ಭವಿಷ್ಯ ನಿಧಿ (ಪಿಪಿಎಫ್), ಇಕ್ವಿಟಿ ಲಿಂಕ್ಡ್ ಸೇವಿಂಗ್ಸ್ ಸ್ಕೀಮ್‌ಗಳು (ಇಎಲ್‌ಎಸ್‌ಎಸ್) ಮತ್ತು ಯುನಿಟ್ ಲಿಂಕ್ಡ್ ಇನ್ಶುರೆನ್ಸ್ ಪ್ಲಾನ್‌ಗಳು (ಯುಲಿಪ್ಸ್) ಮುಂತಾದ ಜನಪ್ರಿಯ ಹೂಡಿಕೆ ಆಯ್ಕೆಗಳನ್ನು ಒಳಗೊಂಡ ಉಳಿತಾಯ ಮತ್ತು ದೀರ್ಘಕಾಲೀನ ಹಣಕಾಸು ಯೋಜನೆಯನ್ನು ಉತ್ತೇಜಿಸುತ್ತದೆ. ಸೆಕ್ಷನ್ 80C ಮಿತಿಯ ಹೆಚ್ಚಳವು ಸಂಬಳ ಪಡೆಯುವ ವ್ಯಕ್ತಿಗಳಿಗೆ ದೀರ್ಘಾವಧಿಯ ಉಳಿತಾಯವನ್ನು ಉತ್ತೇಜಿಸುವುದರ ಜತೆಗೆ ಹೆಚ್ಚುತ್ತಿರುವ ಜೀವನ ವೆಚ್ಚ ಮತ್ತು ಹಣದುಬ್ಬರವನ್ನು ನಿಭಾಯಿಸಲು ಸಹಾಯ ಮಾಡುತ್ತದೆ.