ಈ ಹಿಂದೆ ಬೆಂಗಳೂರಿನ ಕೆರೆಗಳ ಸಂರಕ್ಷಣೆ, ಪುನಶ್ಚೇತನಕ್ಕೆ ಆದೇಶ ಹೊರಡಿಸಿದ್ದ ಹೈಕೋರ್ಟ್, ಇದೀಗ ರಾಜ್ಯಾದ್ಯಂತ ಕೆರೆಗಳ ಸಂರಕ್ಷಣೆಗೆ ಮುಂದಾಗಿರುವುದು ಸಮಾಧಾನಕರ. ಹಾಗಾಗಿಯೇ, ರಾಜ್ಯದಲ್ಲಿರುವ ಕೆರೆಗಳು ಮತ್ತದರ ಸ್ಥಿತಿಗತಿ ಕುರಿತು ಸಮಗ್ರ ವಿವರ ಒದಗಿಸುವಂತೆ ಹೈಕೋರ್ಟ್ ಸರ್ಕಾರಕ್ಕೆ ನಿರ್ದೇಶಿಸಿದೆ. ರಾಜ್ಯದಲ್ಲಿ ಎಷ್ಟು ಕೆರೆಗಳಿವೆ ಎಂದು ಸಮೀಕ್ಷೆ ನಡೆಸಲಾಗಿದೆಯೇ? ಆ ಕೆರೆಗಳ ಪೈಕಿ ಎಷ್ಟು ಒತ್ತುವರಿಯಾಗಿವೆ? ಒತ್ತುವರಿ ತೆರವಿಗೆ ಕೈಗೊಂಡ ಕ್ರಮಗಳೇನು? ಈ ಎಲ್ಲ ಮಾಹಿತಿ ಒಳಗೊಂಡ ಸಮಗ್ರ ವಿವರವನ್ನು ಸರ್ಕಾರ ಫೆಬ್ರವರಿ 14ರೊಳಗೆ ನ್ಯಾಯಾಲಯಕ್ಕೆ ಸಲ್ಲಿಸಬೇಕಿದೆ. ಹಾಗಾಗಿ, ಇನ್ನಾದರೂ ಸರ್ಕಾರದ ಗಮನ ಕೆರೆಗಳತ್ತ ಹೊರಳಲಿದೆಯೇ ಎಂಬುದು ಕುತೂಹಲಕರ. ಬೆಂಗಳೂರಿನಲ್ಲಂತೂ ಅತಿಕ್ರಮಣಗೊಂಡಿರುವ ಕೆರೆಗಳ ಬಗ್ಗೆ ನಿಖರ ಲೆಕ್ಕವಿಲ್ಲ. ಇನ್ನು, ಉಳಿದಿರುವ ಕೆರೆಗಳಾದರೂ ಸುಸ್ಥಿತಿಯಲ್ಲಿ ಇವೆಯೇ? ಎಂದು ಅವಲೋಕಿಸಿದರೆ ಸಿಗುವುದು ನಿರಾಶಾದಾಯಕ ಉತ್ತರವೇ. ಬೆಂಗಳೂರು ಮಾತ್ರವಲ್ಲ ರಾಜ್ಯದ ಹಲವೆಡೆ ಕೆರೆಗಳು ಹೂಳಿನಿಂದ ತುಂಬಿದ್ದು, ಅವಸಾನದ ಅಂಚಿಗೆ ತಲುಪಿವೆ. ಮತ್ತೆ ಕೆಲವಡೆ, ತ್ಯಾಜ್ಯವೇ ತುಂಬಿ ಹೋಗಿ ಕೆರೆಯ ಅಸ್ತಿತ್ವವನ್ನೇ ಹುಡುಕಾಡುವಂಥ ಸ್ಥಿತಿ. ಈ ಬಗ್ಗೆ ಮಾಧ್ಯಮಗಳು ಆಗಾಗ ಬೆಳಕು ಚೆಲ್ಲುತ್ತ ಬಂದರೂ, ನಿಖರವಾದ ಸಮೀಕ್ಷೆ ನಡೆಸಲು ಸರ್ಕಾರ ಮುಂದಾಗಿರಲಿಲ್ಲ. ಅಷ್ಟಕ್ಕೂ, ಕೆರೆಗಳು ಆಯಾ ಊರಿನ ಜೀವಸೆಲೆಗಳು. ಅವು ಅಂತರ್ಜಲವನ್ನು ಹೆಚ್ಚಿಸುತ್ತವೆ, ಸಾವಿರಾರು ಜನರ ನೀರಿನ ಅಗತ್ಯವನ್ನು ನೀಗಿಸುತ್ತವೆ. ಅವುಗಳನ್ನು ಜತನದಿಂದ ಕಾಯ್ದುಕೊಳ್ಳಬೇಕಾದ್ದು ಮಾನವಕುಲದ ಆದ್ಯಕರ್ತವ್ಯ. ಏಕೆಂದರೆ, ಕೆರೆ ಮತ್ತು ಇತರೆ ಜಲಮೂಲಗಳು ಮನುಕುಲಕ್ಕೆ ಅಗಾಧ ಉಪಕಾರ ಮಾಡುತ್ತಿವೆ. ಆಧುನಿಕತೆಯ ಓಟದಲ್ಲಿ ಪರಿಸರದ ಸಮತೋಲನವನ್ನು ಕಾಯ್ದುಕೊಳ್ಳದಿದ್ದರೆ ಅದರಿಂದ ನಷ್ಟ ನಮಗೇ ಎಂಬುದನ್ನು ಮರೆಯುವಂತಿಲ್ಲ.
