ಉಪಗ್ರಹ ಆಧಾರಿತ ಸೇವೆ ಸ್ಟಾರ್ ಲಿಂಕ್​ಗೆ ಸಮ್ಮತಿ; ಗ್ರಾಮೀಣ ಪ್ರದೇಶಕ್ಕೂ ಸಿಗಲಿದೆ ಅಬಾಧಿತ ಇಂಟರ್​ನೆಟ್ ಸಂಪರ್ಕ

ನವದೆಹಲಿ: ಉದ್ಯಮಿ ಎಲಾನ್ ಮಸ್ಕ್ ಒಡೆತನದ ಸ್ಟಾರ್​ಲಿಂಕ್​ಗೆ ದೇಶದಲ್ಲಿ ಉಪಗ್ರಹ ಆಧಾರಿತ ಇಂಟರ್​ನೆಟ್ ಸೇವೆಗಳನ್ನು ಆರಂಭಿಸಲು ಕೇಂದ್ರ ಸರ್ಕಾರ ಅನುಮತಿ ನೀಡಿದೆ. ಈ ಬಗ್ಗೆ ದೂರಸಂಪರ್ಕ ಇಲಾಖೆಯು ಗುರುವಾರ ಒಪ್ಪಂದ ಪತ್ರ (ಲೆಟರ್ ಆಫ್ ಇಂಟೆಂಟ್) ಜಾರಿ ಮಾಡಿದೆ. ನಿಯಮಗಳು, ಭದ್ರತಾ ಮಾನದಂಡವನ್ನು ಕಡ್ಡಾಯವಾಗಿ ಪಾಲಿಸ ಬೇಕು ಎಂದು ಒಪ್ಪಂದ ಪತ್ರದಲ್ಲಿ ಸ್ಟಾರ್​ಲಿಂಕ್​ಗೆ ಕೇಂದ್ರ ಸರ್ಕಾರ ಸೂಚಿಸಿದೆ.

ಭೂಮಿಯಿಂದ ಸುಮಾರು 500 ರಿಂದ 550 ಕಿ.ಮೀ. ಎತ್ತರದಲ್ಲಿ ಇರುವ ಉಪಗ್ರಹಗಳನ್ನು ಬಳಸಿಕೊಂಡು ಇಂಟರ್​ನೆಟ್ ಸೇವೆಯನ್ನು ಒದಗಿಸಲಾಗುತ್ತದೆ. ವಿಪರಿತ ಚಳಿ, ಮಂಜಿನ ವಾತಾವರಣ, ಆಲಿಕಲ್ಲು ಮಳೆ ಮತ್ತು ಚಂಡಮಾರುತದಂತಹ ಪರಿಸ್ಥಿತಿಗಳಲ್ಲೂ ಸ್ಟಾರ್​ಲಿಂಕ್ ಸಂಪರ್ಕ ಕಲ್ಪಿಸುತ್ತದೆ. ಗ್ರಾಮೀಣ ಮತ್ತು ರಿಮೋಟ್ ಏರಿಯಾದಲ್ಲೂ ಸೇವೆ ನೀಡಲು ಇದನ್ನು ಪ್ರತ್ಯೇಕವಾಗಿ ತಯಾರಿಸಲಾಗಿದೆ.

ದೇಶದ ದೂರಸಂಪರ್ಕ ಕಂಪನಿಗಳಾದ ರಿಲಯನ್ಸ್ ಜಿಯೊ ಮತ್ತು ಭಾರ್ತಿ ಏರ್​ಟೆಲ್ ತನ್ನ ಗ್ರಾಹಕರಿಗೆ ಹೈಸ್ಪೀಡ್ ಇಂಟರ್​ನೆಟ್ ಸೇವೆ ಒದಗಿಸಲು ಸ್ಟಾರ್​ಲಿಂಕ್ ಜತೆ ಈಗಾಗಲೇ ಒಪ್ಪಂದ ಮಾಡಿಕೊಂಡಿವೆ. ಉತ್ತರ ಅಮೆರಿಕ, ಯುರೋಪ್, ಆಸ್ಟ್ರೇಲಿಯಾ, ಏಷ್ಯಾದ ಕೆಲವು ಭಾಗಗಳು, ದಕ್ಷಿಣ ಅಮೆರಿಕ ಮತ್ತು ಆಫ್ರಿಕಾದಲ್ಲಿ ಸ್ಟಾರ್​ಲಿಂಕ್ ತನ್ನ ಸೇವೆಯನ್ನು ವಿಸ್ತರಿಸುತ್ತಿದೆ.