ಸಂವಿಧಾನ ದಿನದಂದೇ ದಲಿತನ ಹತ್ಯೆ.. ಬೋರನಿಂದ್​​​ ನೀರು ಕೇಳಿದ್ದೇ ತಪ್ಪಾಯ್ತಾ?; ಇದೆಂಥಾ ಅಮಾನವೀಯ ಕೃತ್ಯ

ಭೋಪಾಲ್​​: ದಲಿತ ಯುವಕನನ್ನು ಹೊಡೆದು ಭೀಕರವಾಗಿ ಹತ್ಯೆ ಮಾಡಿರುವ ಪ್ರಕರಣ ಮಧ್ಯಪ್ರದೇಶದ(Madhya Pradesh) ಶಿವಪುರಿಯಲ್ಲಿ ಬೆಳಕಿಗೆ ಬಂದಿದೆ. ಮಾಹಿತಿ ಪ್ರಕಾರ ಗದ್ದೆಯಲ್ಲಿನ ಬೋರ್‌ನಿಂದ ನೀರು ತೆಗೆಯುವ ವಿಚಾರವಾಗಿ ಜಗಳ ಆರಂಭಗೊಂಡಿದ್ದು, ಬಳಿಕ ಗ್ರಾಮದ ಸರಪಂಚ್ ಅವರ ಕುಟುಂಬಸ್ಥರು ಯುವಕನ ಮೇಲೆ ಹಲ್ಲೆ ನಡೆಸಿದ್ದಾರೆ. ನಿರ್ದಯವಾಗಿ ಕೋಲುಗಳಿಂದ ಹೊಡೆದಿದ್ದಾರೆ. ಬಳಿಕ ಯುವಕನ ಮನೆಯವರು ಆತನನ್ನು ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ, ಅಷ್ಟರಲ್ಲಾಗಲೇ ಯುವಕ ಮೃತಪಟ್ಟಿರುವುದಾಗಿ ವೈದ್ಯರು ತಿಳಿಸಿದ್ದಾರೆ.

ಇದನ್ನು ಓದಿ: ಇಸ್ಕಾನ್ ನಿಷೇಧಿಸುವಂತೆ ನ್ಯಾಯಾಲಯದಲ್ಲಿ ಅರ್ಜಿ ಸಲ್ಲಿಕೆ; ವಿಚಾರಣೆ ವೇಳೆ ಹೈಕೋರ್ಟ್​​​ ಹೇಳಿದಿಷ್ಟು.. | ISKCON

ಈ ಘಟನೆಯ ವಿಡಿಯೋ ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ. ವಿಡಿಯೋದಲ್ಲಿ ಕೆಲವರು ಯುವಕನನ್ನು ಅಮಾನುಷವಾಗಿ ಥಳಿಸುತ್ತಿರುವುದನ್ನು ಕಾಣಬಹುದು. ಈ ಘಟನೆಯನ್ನು ವ್ಯಾಪಕವಾಗಿ ಖಂಡಿಸಿದ್ದು, ಜಾತಿ ಆಧಾರಿತ ತಾರತಮ್ಯ ಮತ್ತು ಹಿಂಸಾಚಾರವನ್ನು ಪರಿಹರಿಸಲು ರಾಜ್ಯ ಸರ್ಕಾರ ವಿಫಲವಾಗಿದೆ ಎಂದು ವಿರೋಧ ಪಕ್ಷಗಳು ಟೀಕಿಸಿವೆ.

ಈ ಪ್ರಕರಣದಲ್ಲಿ ಪೊಲೀಸರು ಸರಪಂಚ್ ಮತ್ತು ಅವರ ಪುತ್ರರು ಸೇರಿದಂತೆ 8 ಜನರ ವಿರುದ್ಧ ಎಫ್‌ಐಆರ್ ದಾಖಲಿಸಿದ್ದಾರೆ. ಸದ್ಯ ತನಿಖೆ ನಡೆಯುತ್ತಿದೆ. ಘಟನೆಯಿಂದ ಗ್ರಾಮದಲ್ಲಿ ಉದ್ವಿಗ್ನ ವಾತಾವರಣ ನಿರ್ಮಾಣವಾಗಿದೆ.

ವಿಷಯ ಏನು

ಶಿವಪುರಿ ಜಿಲ್ಲೆಯ ಸುಭಾಷ್ಪುರ ಪೊಲೀಸ್ ಠಾಣೆ ವ್ಯಾಪ್ತಿಯ ಇಂದರ್​​ಗಢ ಗ್ರಾಮದಲ್ಲಿ ಈ ಘಟನೆ ನಡೆದಿದೆ. ನಾರದ ಜಾತವ್ (28 ವರ್ಷ) ಎಂಬ ಯುವಕ ದೌರಾರ್ ಪೊಲೀಸ್ ಠಾಣೆಯ ನಿವಾಸಿಯಾಗಿದ್ದು, ಕೆಲವು ದಿನಗಳ ಹಿಂದೆ ಇಂದರ್‌ಗಢ ಗ್ರಾಮದಲ್ಲಿ ತನ್ನ ತಾಯಿಯ ಚಿಕ್ಕಮ್ಮ ವಿದ್ಯಾಬಾಯಿ ಜಾತವ್ ಅವರ ಮನೆಯಲ್ಲಿ ವಾಸಿಸಲು ಬಂದಿದ್ದರು. ಗ್ರಾಮದ ಸರಪಂಚ ಪದಂ ಧಕಡ್ ಅವರ ಹೊಲದಲ್ಲಿನ ಕೊಳವೆಬಾವಿಯಿಂದ ವಿದ್ಯಾಬಾಯಿ ತಮ್ಮ ಜಮೀನಿಗೆ ಸಂಪರ್ಕ ಪಡೆದಿದ್ದರು. ಮಂಗಳವಾರ ಸಂಜೆ 5 ಗಂಟೆ ಸುಮಾರಿಗೆ ನಾರದ ಜಾತವ್ ಅವರು ಸರಪಂಚ್ ಪದಂ ಧಕಡ್ ಅವರ ಮಕ್ಕಳಾದ ನಿಕ್ಕಿ, ಮೊಹರ್ ಪಾಲ್ ಮತ್ತು ಸೋದರಳಿಯ ಅಂಕೇಶ್ ಮತ್ತು ಇತರ ಕೆಲವು ಜನರೊಂದಿಗೆ ಬೋರ್‌ನಿಂದ ನೀರು ತೆಗೆದುಕೊಳ್ಳುವ ವಿಷಯದಲ್ಲಿ ಜಗಳವಾಡಿದ್ದರು. ವಾದವು ಉಲ್ಬಣಗೊಂಡು ನಾರದ ಜಾತವ್​​​ ಅವರೊಂದಿಗೆ ವಾದವನ್ನು ಪ್ರಾರಂಭಿಸಿದನು. ಇದಾದ ಬಳಿಕ ಸರಪಂಚ ಧಕಡದ ಕುಟುಂಬಸ್ಥರು ನಾರದ ಜಾತವ್ ಅವರನ್ನು ಗದ್ದೆಗೆ ಎಸೆದು ಕೋಲುಗಳಿಂದು ಹೊಡೆದು ಹಲ್ಲೆ ನಡೆಸಿದ್ದಾರೆ. ಅವರ ಅಮಾನವೀಯ ಕೃತ್ಯಕ್ಕೆ ನಾರದ ಜಾತವ್​​ ಪ್ರಾಣಪಕ್ಷಿಯೇ ಹಾರಿಹೋಗಿದೆ.(ಏಜೆನ್ಸೀಸ್​​)

https://www.vijayavani.net/rahul-gandhi-says-adani-should-be-jailed-you-think-hed-accept-charges