ಹೊಟ್ಟೆನೋವಿನಿಂದ ಕುಸಿದೆ, ಮಗು ಕಳೆದುಕೊಳ್ಳುತ್ತಿರುವ ಅರಿವಾಯ್ತು- ರಾಜಕುಮಾರಿ ಬಿಚ್ಚಿಟ್ಟ ನೋವಿನ ಘಟನೆ

ವಾಷಿಂಗ್ಟನ್: ಸಾಮಾನ್ಯವಾಗಿ ರಾಜಮನೆತನದವರು ತಮ್ಮ ಕುಟುಂಬದ ವಿಷಯವನ್ನು ಎಂದಿಗೂ ಬಹಿರಂಗಗೊಳಿಸುವುದಿಲ್ಲ. ಅದರಲ್ಲಿಯೂ ಬ್ರಿಟನ್ ರಾಜಮನೆತನದವರಿಗೆ ಯಾವುದೇ ಆಂತರಿಕ ವಿಷಯ ಹೇಳುವುದು ನಿಷಿದ್ಧ.

ಆದರೆ ಇದೇ ಮೊದಲ ಬಾರಿಗೆ ತಮಗೆ ಗರ್ಭಪಾತವಾಗಿರುವ ವಿಷಯವನ್ನು ಬಹಿರಂಗಗೊಳಿಸಿದ್ದಾರೆ ರಾಜಕುಮಾರಿ ಮೇಘನ್​ ಮಾರ್ಕೆಲ್​. ಬ್ರಿಟನ್ ರಾಜಕುಮಾರ ಹ್ಯಾರಿಯ ಪತ್ನಿಯಾಗಿರುವ ಮೇಘನ್​ ಆ ದಿನಗಳಲ್ಲಿ ತಮಗಾಗಿರುವ ಮಾನಸಿಕ ಯಾತನೆಯನ್ನು ತಿಳಿಸಿದ್ದಾರೆ.

ಈ ದಂಪತಿ ಎರಡನೇ ಮಗುವಿನ ನಿರೀಕ್ಷೆಯಲ್ಲಿದ್ದರು. ಅದರ ಬಗ್ಗೆ ಹೇಳಿರುವ ರಾಜಕುಮಾರಿ, ' ಕಳೆದ ಜುಲೈ ನನ್ನ ಪಾಲಿಗೆ ನೋವು ತಂದ ತಿಂಗಳು. ಆ ಸಮಯದಲ್ಲಿ ಎರಡನೆಯ ಮಗುವಿನ ನಿರೀಕ್ಷೆಯಲ್ಲಿದ್ದೆವು. ಒಂದು ಬೆಳಗ್ಗೆ ಸಹಿಸಲಾರದ ಹೊಟ್ಟೆ ನೋವು ಕಾಣಿಸಿಕೊಂಡಿತ್ತು. ನೋವು ತಾಳದೇ ಕುಸಿದು ಬಿದ್ದುಬಿಟ್ಟೆ. ನನ್ನ ಮೊದಲನೇ ಮಗುವನ್ನು ಅಪ್ಪಿಕೊಂಡೆ. ಆಗಲೇ ನನಗೆ ನನ್ನ ಎರಡನೆಯ ಮಗುವನ್ನು ಕಳೆದುಕೊಳ್ಳುತ್ತಿದ್ದೇನೆ ಎನ್ನುವುದು ಭಾಸವಾಗತೊಡಗಿತು ಎಂದಿದ್ದಾರೆ.

ಅಷ್ಟಕ್ಕೂ ನಾನು ಈ ವಿಷಯವನ್ನು ಬಹಿರಂಗಪಡಿಸುತ್ತಿರುವ ಕಾರಣವಿಷ್ಟೇ. ಈ ನೋವನ್ನು ಹಲವಾರು ಮಹಿಳೆಯರು ಅನುಭವಿಸಿರುತ್ತಾರೆ. ಏನಿಲ್ಲವೆಂದರೂ 100ರಲ್ಲಿ ಹತ್ತಿಪ್ಪ ಮಹಿಳೆಯರು ಅನುಭವಿಸುವ ನೋವಿದೆ. ಆದರೆ ನೋವನ್ನು ನುಂಗಿಕೊಂಡು ಬಹಿರಂಗವಾಗಿ ಮಾತನಾಡುವುದೇ ಇಲ್ಲ.

ಗರ್ಭಪಾತದ ಕುರಿತಾಗಿ ಮಾತನಾಡುವುದು ನಿಷಿದ್ಧವಾಗಿದೆ. ಅವಮಾನ, ಆತಂಕ, ಏಕಾಂಗಿತನ, ಮಾತೃ ಶೋಕ ಅನುಭವಿಸುವುದು ಮುಂದುವರೆಯುತ್ತಲೇ ಸಾಗಿದೆ. ಹೀಗಾಗಬಾರದು ಮಹಿಳೆಯರು ತಮ್ಮ ದುಃಖವನ್ನು ಹೊರಹಾಕುವ ಅವಶ್ಯಕತೆ ಇದೆ ಎಂದು ಅವರು ಹೇಳಿದ್ದಾರೆ.

https://www.vijayavani.net/s-advocate-petitioned-in-sc-against-evm/

https://www.vijayavani.net/s-three-members-resinged-pdp/