ಪೊಲೀಸ್​ ಠಾಣೆಯಲ್ಲಿದ್ದ ಸಾವಿರಾರು ಬಾಕ್ಸ್​ ಮದ್ಯದ ಬಾಟಲ್​ ನಾಪತ್ತೆ... ಇಲಿಯ ಕೆಲಸ ಎಂದ್ರು ಅಧಿಕಾರಿಗಳು!

ಲಖನೌ: ಪೊಲೀಸ್​ ಠಾಣೆಯಲ್ಲಿ ಇಟ್ಟಿದ್ದ ಸಾವಿರಾರು ಬಾಕ್ಸ್​ ಮದ್ಯದ ಬಾಟಲಿಗಳು ನಿಗೂಢವಾಗಿ ಕಣ್ಮರೆಯಾಗಿರುವ ಘಟನೆ ಉತ್ತರ ಪ್ರದೇಶದ ಇಟಾ ಜಿಲ್ಲೆಯಲ್ಲಿ ನಡೆದಿದೆ.

ಇಟಾ ಜಿಲ್ಲೆಯ ಕೊತ್ವಾಲಿ ದೇಹತ್ ಪೊಲೀಸ್ ಠಾಣೆಯಲ್ಲಿ ಒಟ್ಟು 1,459 ಬಾಕ್ಸ್​ಗಳು ಇದ್ದವು. ಇದರ ಮೌಲ್ಯ 35 ಲಕ್ಷ ರೂಪಾಯಿಯದ್ದಾಗಿದೆ. ಅಕ್ರಮ ಮದ್ಯಪೂರೈಕೆಗೆ ಸಂಬಂಧಿಸಿದಂತೆ ಪೊಲೀಸರು ಸೀಜ್​ ಮಾಡಿದ್ದ ಬಾಕ್ಸ್​ಗಳು ಇದಾಗಿದ್ದವು. ಈ ಬಗ್ಗೆ ಪೊಲೀಸ್​ ಅಧಿಕಾರಿಗಳನ್ನು ಕೇಳಿದಾಗ ಇದಕ್ಕೆ ಇಲಿಗಳು ಕಾರಣ ಎಂದು ಹೇಳಿಕೆ ನೀಡಿದ್ದಾರೆ!

ಜಿಲ್ಲಾ ಮ್ಯಾಜಿಸ್ಟ್ರೇಟ್ ವಿಭಾ ಚಹಲ್ ಹಾಗೂ ಎಸ್‍ಎಸ್‍ಪಿ ಸುನಿಲ್ ಸಿಂಗ್ ಅವರು ದಿಢೀರ್​ ಇನ್ಸ್​ಪೆಕ್ಷನ್​ ವೇಳೆ ಠಾಣೆಗೆ ಆಗಮಿಸಿದಾಗ ಈ ಪ್ರಕರಣ ಬೆಳಕಿಗೆ ಬಂದಿದೆ. ಬಾಟಲ್​ ಕಾಣೆಯಾಗಿದ್ದು ಹೇಗೆ ಎಂದಾಗ ಎಸ್‍ಎಚ್‍ಒ ಇಂದ್ರೇಶ್‍ಪಾಲ್ ಸಿಂಗ್ ಹಾಗೂ ಪ್ರಧಾನ ಕ್ಲರ್ಕ್ ರಸಾಲ್ ಸಿಂಗ್ ದಡಬಡಾಯಿಸಿದ್ದಾರೆ. ನಂತರ ಇಲಿಗಳ ಕಾರಣ ನೀಡಿದ್ದಾರೆ.

ಇಲಿಗಳು ರಾತ್ರಿ ಬಂದಿದ್ದು ಬಾಕ್ಸ್​ಗಳನ್ನು ಕಚ್ಚಿ ಹಾಳು ಮಾಡಿವೆ ಎಂದು ಹೇಳಿಕೆ ನೀಡಿದ್ದಾರೆ. ಅಕ್ರಮ ಮದ್ಯ ತುಂಬಿದ್ದ ಪ್ಲಾಸ್ಟಿಕ್ ಕ್ಯಾನ್‍ಗಳನ್ನು ಇಲಿಗಳು ಕಚ್ಚಿದ್ದು, ಗಾಜಿನ ಬಾಟಲಿ ಒಡೆದು, ಇತರ ಹಾನಿಗೊಳಗಾದ ಚೀಲಗಳನ್ನು ಹರಿದಿವೆ ಎಂದಿದ್ದಾರೆ. ಆದರೆ ಬಾಟಲ್​ಗಳನ್ನು ಎತ್ತಿಕೊಂಡು ಹೋದ್ವಾ ಎನ್ನುವ ಬಗ್ಗೆ ಇವರಲ್ಲಿ ಉತ್ತರ ಇದ್ದಂತಿಲ್ಲ!

ಈ ಕುರಿತು ತನಿಖೆಗೆ ಆಗ್ರಾ ವಲಯದ ಎಡಿಜಿ ಆದೇಶಿಸಿದ್ದಾರೆ. ಬಾಕ್ಸ್​ಗಳನ್ನು ಇಲಿಗಳು ಡ್ಯಾಮೇಜ್ ಮಾಡಿವೆ ಎಂದು ಪೊಲೀಸ್ ಜನರಲ್ ಡೈರಿಯಲ್ಲಿ ಉಲ್ಲೇಖಿಸಲಾಗಿದೆ. ಆದರೆ ಇದನ್ನು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ, ಈ ವಿಷಯ ಒಪ್ಪಲು ಸಾಧ್ಯವಿಲ್ಲ ಎಂದಿದ್ದಾರೆ. ಪ್ರಾಥಮಿಕ ತನಿಖೆ ಪ್ರಕಾರ ಗ್ಯಾಂಗ್‍ಸ್ಟರ್ ಬಂಟು ಯಾದವ್‍ಗೆ ಪೊಲೀಸರು ಮದ್ಯವನ್ನು ಮಾರಾಟ ಮಾಡಿದ್ದಾರೆ ಎನ್ನಲಾಗಿದೆ.

ಸದ್ಯ ಘಟನೆಗೆ ಸಂಬಂಧಿಸಿದಂತೆ ಎಸ್‍ಎಚ್‍ಒ ಹಾಗೂ ಕ್ಲರ್ಕ್ ವಿರುದ್ಧ ಎಫ್‍ಐಆರ್ ದಾಖಲಾಗಿದ್ದು, ಅವರಿಬ್ಬರನ್ನು ಅಮಾನತು ಮಾಡಲಾಗಿದೆ. ಎಸ್‍ಎಚ್‍ಒ ತಲೆಮರೆಸಿಕೊಂಡಿದ್ದಾರೆ.

https://www.vijayavani.net/s-google-maps-show-man-pooping/

https://www.vijayavani.net/s-oil-refinery-in-indonesia-catches-fire/