ಇಷ್ಟೇ ಆಗಿದ್ದರೆ ಈಕೆ ಇಷ್ಟು ಸುದ್ದಿಯಾಗುತ್ತಿರಲಿಲ್ಲ. ಬದಲಿಗೆ ಸಂಸದೆಯಾಗಿ ಅಧಿಕಾರ ಸ್ವೀಕರಿಸುವ ಸಂದರ್ಭದಲ್ಲಿ ನಿಖಿಲ್ ಜೈನ್ ತಮ್ಮ ಪತಿ ಎಂದಿದ್ದ ಇವರೀಗ ಅವರು ಕಾನೂನುಬದ್ಧವಾಗಿ ಪತಿಯೇ ಅಲ್ಲ ಎನ್ನುತ್ತಿರುವುದು ವಿವಾದಕ್ಕೆ ಕಾರಣವಾಗಿದೆ. ಈ ಮದುವೆಯ ಆಳಕ್ಕೆ ಹೋಗಿರುವ ಕೆಲವರು, ಮುಸ್ಲಿಂ ಸಮಯದಾಯದ ಮತದ ಜತೆಗೆ ಚುನಾವಣೆಯಲ್ಲಿ ಹಿಂದೂ ಸಮುದಾಯದವರ ಮತವನ್ನು ಪಡೆಯುವುದಕ್ಕಾಗಿ ಜೈನ್ ಜೀವನದ ಜತೆ ಚೆಲ್ಲಾಟವಾಡಿದ್ದಾರೆ, ತಮ್ಮ ಹೆಸರಿನ ಮುಂದೆ ಹಿಂದೂ ಹೆಸರನ್ನು ಸೇರಿಸಿಕೊಂಡು ಹಿಂದೂಗಳ ವಿಶ್ವಾಸವನ್ನು ಗಳಿಸುವುದಕ್ಕಾಗಿ ಈ ರೀತಿ ಮಾಡಿದ್ದಾರೆ, ಸಂಸದೆಯಾಗಿ ಆಯ್ಕೆಯಾದ ಮೇಲೆ ಗಂಡನನ್ನು ಹೊರಕ್ಕೆ ಅಟ್ಟಿದ್ದಾರೆ ಎಂಬ ಗಂಭೀರ ಆರೋಪಗಳು ಕೇಳಿಬಂದಿವೆ. ಹೀಗೆ ಮಾಡುವ ಉದ್ದೇಶವಿಲ್ಲದೇ ಸರಿಯಾಗಿ ದಾಂಪತ್ಯ ನಡೆಸುವುದೇ ಆಗಿದ್ದರೆ ಟರ್ಕಿಯಲ್ಲಿ ಹೋಗಿ ಹಿಂದೂ, ಮುಸ್ಲಿಂ ಹಾಗೂ ಕ್ರೈಸ್ತ ಧರ್ಮದ ಸಂಪ್ರದಾಯಗಳಂತೆ ಮದುವೆಯಾಗಿದ್ದು ಏಕೆ? ಭಾರತಕ್ಕೆ ವಾಪಸಾದ ಮೇಲೆ ಟರ್ಕಿಯ ಮದುವೆಗೆ ಭಾರತದಲ್ಲಿ ಮಾನ್ಯತೆ ಇಲ್ಲ ಎಂದದ್ದೇಕೆ ಎಂದು ನೆಟ್ಟಿಗರು ಪ್ರಶ್ನಿಸುತ್ತಿದ್ದಾರೆ.
