ಬಾಂಡಾ (ಉತ್ತರ ಪ್ರದೇಶ): ಪತ್ನಿಗೆ ಕಣ್ಣಿಗೆ ಬೀಳದಂತೆ ಇಲ್ಲೊಬ್ಬ ಇಂಜಿನಿಯರ್ ಪತಿ ಪ್ರೇಯಸಿಯ ಜತೆ ಜಾಲಿಯಾಗಿ ಸುತ್ತುತ್ತಲೇ ಇದ್ದ. ಈ ಬಗ್ಗೆ ಪತ್ನಿಗೆ ತಿಳಿದಿದ್ದರೂ ರೆಡ್ಹ್ಯಾಂಡ್ ಆಗಿ ಪತಿ ಸಿಕ್ಕಿಬಿದ್ದಿರಲಿಲ್ಲ. ಅದಕ್ಕಾಗಿ ಕಾದು ಕುಳಿತಿದ್ದಳು.
ನಿನ್ನೆ ಆ ಅವಕಾಶ ಪತ್ನಿಗೆ ಸಿಕ್ಕಿಯೇ ಬಿಟ್ಟಿತು. ಅದೂ ಎಲ್ಲಿ ಅಂತೀರಾ? ದೇವಸ್ಥಾನದ ಎದುರು! ದೇವರು ತನ್ನನ್ನು ಕಾಪಾಡುತ್ತಾನೆ ಅಂದುಕೊಂಡೋ ಏನೋ ಈ ಪತಿರಾಯ, ಸ್ನೇಹಿತೆಯ ಜತೆ ಕಾರಿನಲ್ಲಿ ಜಾಲಿಯಾಗಿ ಇದ್ದ. ಅಷ್ಟಕ್ಕೂ ಆತ ಮಾಡಬಾರದ್ದೇನೂ ಮಾಡುತ್ತಿರಲಿಲ್ಲ. ಸ್ನೇಹಿತೆಯ ಜತೆ ಕುಳಿತು ದೋಸೆ ತಿನ್ನುತ್ತಿದ್ದ ಅಷ್ಟೇ.
ಆದರೆ ಪತಿಯ ಮೇಲೆ ಕಣ್ಣಿಟ್ಟಿದ್ದ ಪತ್ನಿಗೆ ರೆಡ್ಹ್ಯಾಂಡ್ ಆಗಿ ಸಿಕ್ಕಿಬಿಟ್ಟ! ತನ್ನ ಸಹೋದರರನ್ನೂ ಕರೆದುಕೊಂಡು ಸ್ಥಳಕ್ಕೆ ಧಾವಿಸಿದ ಪತ್ನಿಯನ್ನು ನೋಡಿ ಈ ಇಂಜಿನಿಯರ್ ಪತಿ ದಂಗಾಗಿ ಹೋದ. ತನ್ನನ್ನು ಸಮರ್ಥಿಸಿಕೊಳ್ಳಲು ಎಷ್ಟೇ ಪ್ರಯತ್ನ ಪಟ್ಟರೂ ಅದು ಸಾಧ್ಯವಾಗಲಿಲ್ಲ.
ಮಹಿಳೆ ಪತಿ ಹಾಗೂ ಆತನ ಸ್ನೇಹಿತೆಯನ್ನು ಕರೆದುಕೊಂಡು ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದಳು. ಉತ್ತರ ಪ್ರದೇಶದ ಬಾಂಡಾ ಜಿಲ್ಲೆಯ ಮಹಿಳಾ ಪೊಲೀಸ್ ಠಾಣೆಗೆ ಆಕೆ ಧಾವಿಸಿದಳು. ಆದರೆ ಇದು ತೀರಾ ಕೌಟುಂಬಿಕ ಸಮಸ್ಯೆಯಾಗಿದ್ದು, ಮಾತುಕತೆಯ ಮೂಲಕವೇ ಬಗೆಹರಿಸಿಕೊಳ್ಳುವಂತೆ ಪೊಲೀಸರು ಹೇಳಿದರು.
ಆದರೆ ತನ್ನ ಪತಿ ವಿವಾಹೇತರ ಸಂಬಂಧ ಹೊಂದಿರುವ ಕಾರಣ, ಇದು ಕಾನೂನುಬಾಹಿರವಾಗಿದ್ದು, ಈ ತಪ್ಪಿಗೆ ಪತಿಗೆ ಶಿಕ್ಷೆಯಾಗಲೇಬೇಕು ಎಂದು ಪತ್ನಿ ಪಟ್ಟುಹಿಡಿದಳು. ಆಕೆಯ ಜತೆ ಪತಿ ತಿರುಗುತ್ತಲೇ ಇರುತ್ತಾನೆ, ಇದರಿಂದ ತನ್ನನ್ನು ನಿರ್ಲಕ್ಷಿಸುತ್ತಾನೆ ಎಂದಳು.
ಆದರೆ ಪೊಲೀಸರು ಎಫ್ಐಆರ್ ದಾಖಲು ಮಾಡಿಕೊಳ್ಳದೇ ಪತಿಗೆ ಎಚ್ಚರಿಕೆಯನ್ನು ಕೊಟ್ಟು ಕಳುಹಿಸಿದರು.
