ಪಾಲಕರೇ ಎಚ್ಚರ: ಭಗತ್​ಸಿಂಗ್​ ಪಾತ್ರ ಪ್ರಾಕ್ಟೀಸ್​ ಮಾಡುವಾಗ ಪ್ರಾಣಕಳೆದುಕೊಂಡ ಬಾಲಕ!

ಲಖನೌ: ಸ್ವಾತಂತ್ರ್ಯೋತ್ಸವ ಎಂದರೆ ಮಕ್ಕಳಿಗೆ ವಿವಿಧ ಹೋರಾಟಗಾರರ ಪಾತ್ರವನ್ನು ಅಭಿನಯಿಸುವ ತವಕ. ಅದಲ್ಲಿಯೂ ಕ್ರಾಂತಿಕಾರಿ ಭಗತ್​ಸಿಂಗ್​ನ ಬಲಿದಾನದ ಪಾತ್ರ ಮಾಡುವುದು ಮಕ್ಕಳಿಗೆ ಅಚ್ಚುಮೆಚ್ಚು. ಇದರ ಅಭ್ಯಾಸ ಮಾಡುತ್ತಿರುವ ಬಾಲಕನೋರ್ವ ಪ್ರಾಣ ಕಳೆದುಕೊಂಡಿರುವ ಘಟನೆ ಉತ್ತರಪ್ರದೇಶದ ಬಡೌನ್ ಹಳ್ಳಿಯಲ್ಲಿ ನಡೆದಿದೆ.

ಶಿವಂ ಎಂಬ 10 ವರ್ಷದ ಬಾಲಕ ಮೃತಪಟ್ಟಿದ್ದಾನೆ. ಭಗತ್ ಸಿಂಗ್ ಅವರಿಗೆ ನೇಣು ಹಾಕುವ ದೃಶ್ಯವನ್ನು ಪ್ರಾಕ್ಟೀಸ್​ ಮಾಡಲು ಹೋದ ಸಂದರ್ಭದಲ್ಲಿ ಅಕಸ್ಮಾತ್ತಾಗಿ ನೇಣು ಕೊರಳಿಗೆ ಬಿಗಿದು ಉಸಿರುಗಟ್ಟಿ ಬಾಲಕ ಮೃತಪಟ್ಟಿದ್ದಾನೆ.

ನೇಣಿನ ಸೀನ್​ ಪ್ರಾಕ್ಟೀಸ್ ವೇಳೆ ಬಾಲಕ ಭಗತ್ ಸಿಂಗ್ ಅವರನ್ನು ಗಲ್ಲಿಗೇರಿಸವ ದೃಶ್ಯವನ್ನು ಅಭ್ಯಾಸ ಮಾಡುತ್ತಿದ್ದ. ಆಗ ಕುತ್ತಿಗೆಗೆ ಕುಣಿಕೆಯನ್ನು ಕಟ್ಟಿಕೊಂಡು ಸ್ಟೂಲ್ ಮೇಲೆ ನಿಂತಿದ್ದ. ಈ ವೇಳೆ ಕಾಲು ಜಾರಿ ಸ್ಟೂಲ್​ಕೆಳಗೆ ಬಿದ್ದಿದೆ. ಬಾಲಕ ಪ್ರಾಣ ಕಳೆದುಕೊಂಡಿದ್ದಾನೆ ಎಂದು ಕುಟುಂಬಸ್ಥರು ಹೇಳಿದ್ದಾರೆ.

ಈ ಹಿಂದೆ ಅಂದರೆ 2020ರ ಫೆಬ್ರುವರಿ ತಿಂಗಳಿನಲ್ಲಿ ಕೂಡ ಪ್ರಿಯಾಂಶು ಮಾಲ್ವಿಯಾ ಎಂಬ 12 ವರ್ಷದ ಬಾಲಕ ಇದೇ ರೀತಿ ಭಗತ್​ಸಿಂಗ್​ ಪಾತ್ರ ಪ್ರಾಕ್ಟೀಸ್​ ಮಾಡುವಾಗ ಅಕಸ್ಮಾತ್ತಾಗಿ ಉರುಳಿಗೆ ಕೊರಳೊಡ್ಡಿ ಮೃತಪಟ್ಟಿದ್ದ. ಆದ್ದರಿಂದ ಮಕ್ಕಳು ಈ ರೀತಿಯ ಪಾತ್ರಗಳನ್ನು ಪ್ರಾಕ್ಟೀಸ್​ ಮಾಡುವಾಗ ಮಕ್ಕಳು ಎಚ್ಚರದಿಂದ ಇರಲೇಬೇಕು, ಜತೆಗೆ ಪಾಲಕರು ಮಕ್ಕಳ ಮೇಲೆ ನಿಗಾ ವಹಿಸುವುದು ಅಥವಾ ಅವರಿಗೆ ಇಂಥ ಪಾತ್ರ ಮಾಡುವಾಗ ಹೇಗೆಲ್ಲಾ ಮುನ್ನೆಚ್ಚರಿಕೆ ತೆಗೆದುಕೊಳ್ಳಬೇಕು ಎಂಬ ಬಗ್ಗೆ ವಿವರಿಸುವುದು ಅಗತ್ಯ ಎನ್ನುತ್ತಾರೆ ಪೊಲೀಸರು.

https://www.vijayavani.net/s-80-years-granny-vedio/

https://www.vijayavani.net/s-pocso-court-on-herrasement/