ಟ್ರಯಲ್​ ಯಶಸ್ವಿಯಾಗದಿದ್ದರೂ 1,490 ಕೋಟಿ ರೂ. ಮೌಲ್ಯದ ಕೋವಿಡ್​ ಲಸಿಕೆ ಸಿದ್ಧ

ನವದೆಹಲಿ: ಕ್ಲಿನಿಕಲ್​ ಟ್ರಯಲ್​ಗೆ ಒಳಪಡದಿದ್ದರೂ ಕೋವಿಡ್​-19 ಲಸಿಕೆಯನ್ನು ಭಾರತದಲ್ಲಿ ತಯಾರಿಸಲು ಸೆರಂ ಇನ್​ಸ್ಟಿಟ್ಯೂಟ್​ ಆಫ್​ ಇಂಡಿಯಾ ಮುಂದಾಗಿದೆ. 1,490.40 ಕೋಟಿ ರೂ. ಮೌಲ್ಯದ ಲಸಿಕೆಯನ್ನು ತಯಾರಿಸಲು ಕೇವಲ ಅರ್ಧ ಗಂಟೆಯಲ್ಲಿ ನಿರ್ಧರಿಸಿದ್ದಾಗಿ ಸಂಸ್ಥೆಯ ಮುಖ್ಯಸ್ಥ ಅಡಾರ್​ ಪೂನಾವಾಲಾ ತಿಳಿಸಿದ್ದಾರೆ.

ಬ್ರಿಟನ್​ನ ಆಕ್ಸ್​ಫರ್ಡ್​ ವಿಶ್ವವಿದ್ಯಾಲಯದ ಸಹಯೋಗದಲ್ಲಿ ಸಿದ್ಧವಾಗುತ್ತಿರುವ ಕೋವಿಡ್​-19 ಲಸಿಕೆಯನ್ನು ಸೆರಂ ಇನ್​ಸ್ಟಿಟ್ಯೂಟ್​ ಭಾರತದಲ್ಲಿ ತಯಾರಿಸಿ ಮಧ್ಯಮ ಆದಾಯದ ರಾಷ್ಟ್ರಗಳಿಗೂ ಸರಬರಾಜು ಮಾಡಲಿದೆ. ನವೆಂಬರ್​ ವೇಳೆಗೆ 1,490.40 ಕೋಟಿ ರೂ. ಮೌಲ್ಯದ ಲಸಿಕೆಗಳು ಸಿದ್ಧವಾಗಲಿವೆ. ಭಾರತದಲ್ಲಿ ತಲಾ 1 ಸಾವಿರ ರೂ.ನಂತೆ ಮಾರಾಟ ಮಾಡಲಾಗುವುದು ಎಂದು ಹೇಳಿದ್ದಾರೆ.

ಒಂದು ವೇಳೆ ಕ್ಲಿನಿಕಲ್​ ಟ್ರಯಲ್ಸ್​ನ ಫಲಿತಾಂಶಗಳು ವ್ಯತಿರಿಕ್ತವಾಗಿ ಬಂದಲ್ಲಿ 1,490.40 ಕೋಟಿ ರೂ. ಮೌಲ್ಯದ ಲಸಿಕೆಯನ್ನು ನಾಶಪಡಿಸಬೇಕಾದ ಅಪಾಯವೂ ಇದೆ. ಆದರೂ, ರಿಸ್ಕ್​ ತೆಗೆದುಕೊಂಡು ಲಸಿಕೆಯನ್ನು ತಯಾರಿಸಲಾಗುತ್ತಿದೆ ಎಂದು ವಿವರಿಸಿದ್ದಾರೆ.

ಇದನ್ನೂ ಓದಿ: ಮಧ್ಯಪ್ರದೇಶದ ಗಣಿಯಲ್ಲಿ ಪತ್ತೆಯಾದ 11 ಕ್ಯಾರಟ್​ ವಜ್ರದ ಹರಳಿನ ಬೆಳೆ ಕೇಳಿದರೆ ಶಾಕ್​ ಆಗುತ್ತೀರಿ

ದ ಲ್ಯಾನ್ಸೆಟ್​ ಜರ್ನಲ್​ನಲ್ಲಿ ಪ್ರಕಟವಾಗಿರುವ ಕೋವಿಡ್​-19 ಲಸಿಕೆಯ ಮೊದಲ ಹಂತದ ಕ್ಲಿನಿಕಲ್​ ಟ್ರಯಲ್​ನ ವರದಿಯಲ್ಲಿ ಮೊದಲ ಹಂತದಲ್ಲಿ ತೃಪ್ತಿದಾಯಕ ಫಲಿತಾಂಶ ಲಭ್ಯವಾಗಿದೆ. ಯಾವುದೇ ರೀತಿಯ ಗಂಭೀರವಾದ ಅಡ್ಡಪರಿಣಾಮಗಳನ್ನು (ಸೈಡ್​ ಎಫೆಕ್ಟ್ಸ್​) ಉಂಟು ಮಾಡದೆ, ಪ್ರತಿಕಾಯ ಮತ್ತು ಟಿ-ಸೆಲ್​ನ ರೋಗನಿರೋಧ ಪ್ರತಿಕ್ರಿಯೆಯನ್ನು ತೋರಿರುವುದಾಗಿ ಹೇಳಲಾಗಿತ್ತು.

ವಿಶ್ವದ ಅತಿದೊಡ್ಡ ಲಸಿಕೆ ತಯಾರಿಕಾ ಸಂಸ್ಥೆ ಎಂಬ ಹೆಗ್ಗಳಿಕೆ ಹೊಂದಿರುವ ಸೆರಂ ಇನ್​ಸ್ಟಿಟ್ಯೂಟ್​ನ ಮುಖ್ಯಸ್ಥರು ಭಾರತದಲ್ಲಿ ಪ್ರತಿಯೊಬ್ಬರಿಗೂ ಕೋವಿಡ್​-19 ಲಸಿಕೆ ಹಾಕಲು ಕನಿಷ್ಠ ಎರಡು ವರ್ಷಗಳು ಬೇಕಾಗುತ್ತವೆ ಎಂದು ಹೇಳಿದ್ದಾರೆ.

ಆಕ್ಸ್​ಫರ್ಡ್​ನ ಲಸಿಕೆ ಆಗಸ್ಟ್​ನಲ್ಲಿ 3ನೇ ಹಂತದ ಟ್ರಯಲ್​ಗೆ ಒಳಪಡುವುದು ಬಹುತೇಕ ಖಚಿತವಾಗಿದೆ. ಅಲ್ಲಿಂದ ಎರಡು ಅಥವಾ ಎರಡೂವರೆಗೆ ತಿಂಗಳಲ್ಲಿ ಈ ಹಂತದ ಟ್ರಯಲ್​ ಮುಗಿಯುತ್ತದೆ. ಕ್ಲಿನಿಕಲ್​ ಟ್ರಯಲ್​ ಫಲಿತಾಂಶ ಸಕಾರಾತ್ಮಕವಾಗಿದ್ದು, ಭಾರತೀಯ ಔಷಧ ನಿಯಂತ್ರಕರು ಲಸಿಕೆ ಸುರಕ್ಷಿತವಾಗಿದ್ದು ಪರಿಣಾಮಕಾರಿಯಾಗಿದೆ ಎಂದು ಹೇಳಿ ಹಸಿರು ನಿಶಾನೆ ತೋರಿದರೆ ನವೆಂಬರ್​ನಲ್ಲಿ ಲಸಿಕೆಯನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಲಾಗುವುದು ಎಂದು ಹೇಳಿದ್ದಾರೆ. ​

https://www.vijayavani.net/children-with-covid-at-wadia-develop-life-threatening-disord-read-more-at-https-mumbaimirror-indiatimes-com-coronavirus-news-18-of-100-children-with-covid-at-wadia-develop-life-threatening-disorder/