Ronaldo Retirement Video: ಫುಟ್ಬಾಲ್ ಜಗತ್ತಿನ ಕಿರೀಟವಿಲ್ಲದ ಸುಲ್ತಾನ, ಪೋರ್ಚುಗಲ್ ಕಪ್ತಾನ ಕ್ರಿಸ್ಟಿಯಾನೊ ರೊನಾಲ್ಡೊ ತಮ್ಮ 23 ವರ್ಷಗಳ ಸುದೀರ್ಘ ಅಂತಾರಾಷ್ಟ್ರೀಯ ಆಟಕ್ಕೆ ಭಾವನಾತ್ಮಕವಾಗಿ ತೆರೆ ಎಳೆದಿದ್ದಾರೆ. ಗುರುವಾರ ಮಧ್ಯಾಹ್ನ 3:59ಕ್ಕೆ ತಮ್ಮ ಅಧಿಕೃತ ಎಕ್ಸ್ನಲ್ಲಿ ವಿಡಿಯೋ ಹಂಚಿಕೊಳ್ಳುವ ಮೂಲಕ ಸುದೀರ್ಘ ವೃತ್ತಿಜೀವನಕ್ಕೆ ವಿದಾಯ ಹೇಳಿದ್ದಾರೆ.
ವಿಡಿಯೋ ಪೋಸ್ಟ್ ಆದ ಕೇವಲ ಎರಡೂವರೆ ಗಂಟೆಗಳಲ್ಲಿ 2.7 ಮಿಲಿಯನ್‌ಗೂ ಹೆಚ್ಚು ವೀವ್ಸ್ ಪಡೆದುಕೊಂಡಿದೆ. ಜೊತೆಗೆ 4.85 ಲಕ್ಷಕ್ಕೂ ಹೆಚ್ಚು ಲೈಕ್ಸ್, 1.56 ಲಕ್ಷಕ್ಕೂ ಹೆಚ್ಚು ರಿಪೋಸ್ಟ್‌ಗಳು, 32,000ಕ್ಕೂ ಹೆಚ್ಚು ಕಾಮೆಂಟ್‌ಗಳು ಹಾಗೂ 10,000ಕ್ಕೂ ಹೆಚ್ಚು ಬುಕ್‌ಮಾರ್ಕ್‌ಗಳನ್ನು ಪಡೆದು ಜಾಲತಾಣದಲ್ಲಿ ಭಾರಿ ಸಂಚಲನ ಸೃಷ್ಟಿಸಿದೆ.
ಅಭಿಮಾನಿಗಳಿಗೆ ರೊನಾಲ್ಡೊ ಭಾವನಾತ್ಮಕ ಸಂದೇಶ
41 ವರ್ಷದ ರೊನಾಲ್ಡೊ ತಮ್ಮ ಈ ಪಯಣವನ್ನು ನೆನಪಿಸಿಕೊಳ್ಳುತ್ತಾ, ‘ನನ್ನ ದೇಶವನ್ನು ಪ್ರತಿನಿಧಿಸುವುದು ಎಂದರೆ ಬರಿ ಗೋಲುಗಳು, ದಾಖಲೆಗಳು ಅಥವಾ ಟ್ರೋಫಿಗಳು ಮಾತ್ರವಲ್ಲ. ಅಭಿಮಾನಿಗಳ ಪ್ರೀತಿ ಮತ್ತು ಈ ಪಯಣದಲ್ಲಿ ಸಾಥ್ ನೀಡಿದ ಜನರ ಜೊತೆಗಿನ ಅನುಭವವೇ ನನಗೆ ಮುಖ್ಯ’ ಎಂದು ಹೇಳಿದ್ದಾರೆ.
