Hurigadale vs Whey Protein: ದೇಹಕ್ಕೆ ಬೇಕಾದಷ್ಟು ಪ್ರೋಟೀನ್ ಪಡೆಯಲು ಹುರಿಗಡಲೆ ಮತ್ತು ವೇ ಪ್ರೋಟೀನ್‌ನ್ನು ಹಲವರು ತಮ್ಮ ಆಹಾರದಲ್ಲಿ ಸೇರಿಸಿಕೊಳ್ಳುತ್ತಾರೆ. ಆದರೆ ಇವೆರಡರ ಪೌಷ್ಟಿಕಾಂಶದಲ್ಲಿ ಸಾಕಷ್ಟು ವ್ಯತ್ಯಾಸವಿದೆ. ಹುರಿಗಡಲೆಯಲ್ಲಿ ಪ್ರೋಟೀನ್ ಜತೆಗೆ ಕಾರ್ಬೋಹೈಡ್ರೇಟ್, ಫೈಬರ್ ಮತ್ತು ಕಬ್ಬಿಣವೂ ಸಿಗುತ್ತದೆ.
ಡಯಟಿಷಿಯನ್‌ವೊಬ್ಬರು ಇನ್‌ಸ್ಟಾಗ್ರಾಂನಲ್ಲಿ ಹುರಿಗಡಲೆ ಮತ್ತು ವೇ ಪ್ರೋಟೀನ್‌ನಲ್ಲಿರುವ ಪೌಷ್ಟಿಕಾಂಶಗಳ ಅಂದಾಜು ಹೋಲಿಕೆಯನ್ನು ಹಂಚಿಕೊಂಡಿದ್ದಾರೆ. ಆದರೆ ಬ್ರ್ಯಾಂಡ್, ತಯಾರಿಸುವ ವಿಧಾನ, ಸೇರಿಸುವ ಪದಾರ್ಥಗಳು ಮತ್ತು ಸೇವಿಸುವ ಪ್ರಮಾಣಕ್ಕೆ ಅನುಗುಣವಾಗಿ ಈ ಮೌಲ್ಯಗಳಲ್ಲಿ ವ್ಯತ್ಯಾಸವಾಗಬಹುದು ಎಂದು ಅವರು ತಿಳಿಸಿದ್ದಾರೆ.
ಹುರಿಗಡಲೆ, ವೇ ಪ್ರೋಟೀನ್‌ನಲ್ಲಿ ಎಷ್ಟು ಪ್ರೋಟೀನ್?
ಡಯಟಿಷಿಯನ್‌ ಹಂಚಿಕೊಂಡ ಅಂದಾಜಿನ ಪ್ರಕಾರ, ಹುರಿಗಡಲೆಯಲ್ಲಿ ಸುಮಾರು 400 ಕ್ಯಾಲರಿ, 20 ಗ್ರಾಂ ಪ್ರೋಟೀನ್, 60 ಗ್ರಾಂ ಕಾರ್ಬೋಹೈಡ್ರೇಟ್, 10 ಗ್ರಾಂ ಫೈಬರ್ ಮತ್ತು 7 ಮಿ.ಗ್ರಾಂ ಕಬ್ಬಿಣ ಇದೆ. ಮತ್ತೊಂದೆಡೆ, ವೇ ಪ್ರೋಟೀನ್‌ನಲ್ಲಿ ಸುಮಾರು 370 ಕ್ಯಾಲರಿ, 70 ಗ್ರಾಂ ಪ್ರೋಟೀನ್, 12 ಗ್ರಾಂ ಕಾರ್ಬೋಹೈಡ್ರೇಟ್, 2 ಗ್ರಾಂ ಫೈಬರ್ ಮತ್ತು 1 ಮಿ.ಗ್ರಾಂ ಕಬ್ಬಿಣ ಇದೆ. ಹೀಗಾಗಿ ಪ್ರೋಟೀನ್ ಪ್ರಮಾಣದಲ್ಲಿ ವೇ ಪ್ರೋಟೀನ್ ಮುಂದಿದ್ದರೆ, ಫೈಬರ್ ಮತ್ತು ಕಬ್ಬಿಣದ ಪ್ರಮಾಣದಲ್ಲಿ ಹುರಿಗಡಲೆ ಮುಂದಿದೆ.
ಹುರಿಗಡಲೆ: ಪ್ರೋಟೀನ್ ಜತೆಗೆ ಫೈಬರ್ ಇದೆ
ಹುರಿಗಡಲೆಯಲ್ಲಿ ಪ್ರೋಟೀನ್ ಮಾತ್ರವಲ್ಲದೆ ಕಾರ್ಬೋಹೈಡ್ರೇಟ್, ಫೈಬರ್ ಮತ್ತು ಕಬ್ಬಿಣವೂ ಸಿಗುತ್ತದೆ. ಹೀಗಾಗಿ ಇದನ್ನು ಸಾಮಾನ್ಯ ಆಹಾರದ ಭಾಗವಾಗಿ ಸೇವಿಸಬಹುದು. ಆದರೆ ನಿಮ್ಮ ಗುರಿ ದಿನಕ್ಕೆ ಬೇಕಾದ ಪ್ರೋಟೀನ್ ಪ್ರಮಾಣವನ್ನು ಹೆಚ್ಚಿಸಿಕೊಳ್ಳುವುದಾದರೆ, ಹುರಿಗಡಲೆಯಿಂದ ಸಿಗುವ ಪ್ರೋಟೀನ್ ವೇ ಪ್ರೋಟೀನ್‌ಗೆ ಹೋಲಿಸಿದರೆ ಕಡಿಮೆ.
