ಈ ವೇಳೆ ಮಾತನಾಡಿದ ಸಹಾಯಕ ಪ್ರಾದೇಶಿಕ ಸಾರಿಗೆ ಅಧಿಕಾರಿ(ಎಆರ್ಟಿಒ)ಎಚ್.ಎಸ್.ಭಗವಾನ್ ದಾಸ್, ವಾಹನಗಳ ಸಂಖ್ಯೆ ದಿನದಿನಕ್ಕೂ ಏರುತ್ತಿದ್ದು, ಸಂಚಾರ ಸುಗಮವಾಗಲು ಚಾಲಕರು ರಸ್ತೆ ಸುರಕ್ಷತಾ ನಿಯಮಗಳ ಸಮರ್ಪಕ ಪಾಲನೆ ಮಾಡುವ ಅಗತ್ಯವಿದೆ. ದ್ವಿಚಕ್ರ ವಾಹನಗಳ ಸವಾರರು ಸೇರಿದಂತೆ ಮಧ್ಯಮ ಮತ್ತು ಭಾರಿ ವಾಹನ ಚಾಲಕರು ಕಡ್ಡಾಯವಾಗಿ ಸಂಚಾರ ನಿಯಮಗಳನ್ನು ಪಾಲಿಸಿದಲ್ಲಿ ಬಹುತೇಕ ಅಪಘಾತಗಳನ್ನು ತಡೆಯುವ ಮೂಲಕ ಅಮಾಯಕ ಜೀವಗಳನ್ನು ಉಳಿಸಬಹುದಾಗಿದೆ. ಅವಸರದ, ಅಡ್ಡಾದಿಡ್ಡಿ ಚಾಲನೆ, ಪಾನಮತ್ತರಾಗಿ ಚಾಲನೆ ಮುಂತಾದ ಬೇಜವಾಬ್ದಾರಿ ವರ್ತನೆಗಳೇ ಅಪಘಾತಕ್ಕೆ ಕಾರಣವಾಗುತ್ತಿದೆ. ಇಲಾಖೆ ವತಿಯಿಂದ ಸಾಧ್ಯವಾದಷ್ಟು ಮಟ್ಟಿಗೆ ಚಾಲನಾ ಪರವಾನಗಿ ನೀಡುವ ವೇಳೆ ತರಬೇತಿಯೊಂದಿಗೆ ಅರಿವನ್ನೂ ಮೂಡಿಸುವ ಕಾರ್ಯ ನಡೆಸಲಾಗುತ್ತಿದೆ. ಅಪಘಾತಗಳನ್ನು ತಡೆಯಲು ಸಾರ್ವಜನಿಕರ ಸಹಕಾರವೂ ಅಗತ್ಯವಾಗಿದೆ ಎಂದರು.
