ರೈಲ್ವೆ ಪ್ರೊಟೆಕ್ಷನ್ ಫೋರ್ಸ್​ ಇನ್ನು ಮೇಲೆ ಇಂಡಿಯನ್ ರೈಲ್ವೆ ಪ್ರೊಟೆಕ್ಷನ್ ಫೋರ್ಸ್ ಸರ್ವೀಸ್​

ನವದೆಹಲಿ: ಭಾರತೀಯ ರೈಲ್ವೆ ತನ್ನ ರೈಲ್ವೆ ಪ್ರೊಟೆಕ್ಷನ್ ಫೋರ್ಸ್​(ಆರ್​ಪಿಎಫ್)ಗೆ ಮರುನಾಮಕರಣ ಮಾಡಿದ್ದು, ಇನ್ನು ಮುಂದೆ ಇದು ಇಂಡಿಯನ್ ರೈಲ್ವೆ ಪ್ರೊಟೆಕ್ಷನ್ ಫೋರ್ಸ್ ಸರ್ವೀಸ್​ ಎಂದು ಗುರುತಿಸಲ್ಪಡಲಿದೆ.

ರೈಲ್ವೆ ಸಚಿವಾಲಯವು ಆರ್​ಪಿಎಫ್​ಗೆ ಆರ್ಗನೈಸ್ಡ್​ ಗ್ರೂಪ್​ ಎ ಸ್ಟೇಟಸ್​(ಒಜಿಎಎಸ್​) ಎಂಬ ಮಾನ್ಯತೆ ನೀಡಿದ ಬಳಿಕ ಈ ಮರುನಾಮಕರಣ ಮಾಡಲಾಗಿದೆ. ಇದಕ್ಕೆ ಸಂಬಂಧಿಸಿದ ಅಧಿಕೃತ ಸೂಚನೆಯನ್ನು ಸಚಿವಾಲಯ ಸೋಮವಾರ ಪ್ರಕಟಿಸಿದೆ.

ಕೋರ್ಟ್ ಆದೇಶದ ಮೇರೆಗೆ ಕೇಂದ್ರ ಸಚಿವ ಸಂಪುಟ ಆರ್​ಪಿಎಫ್​ಗೆ ಒಜಿಎಎಸ್​ ಸ್ಥಾನಮಾನ ನೀಡುವ ತೀರ್ಮಾನವನ್ನು ಕಳೆದ ಜುಲೈನಲ್ಲಿ ತೆಗೆದುಕೊಂಡಿತ್ತು. ಈ ಸ್ಥಾನಮಾನ ಸಿಕ್ಕಿರುವ ಕಾರಣ ಇತರೆ ಸರ್ಕಾರಿ ಅಧಿಕಾರಿಗಳಿಗೆ ಸಿಗುವ ಹಣಕಾಸಿನ ಸೌಲಭ್ಯಗಳು ಇಲ್ಲಿರುವ ಅಧಿಕಾರಿಗಳಿಗೂ ಸಿಗಲಿದೆ.

ನಾನ್ ಫಂಕ್ಷನಲ್ ಅಪ್​ಗ್ರೆಡೇಷನ್​(ಎನ್​ಎಫ್​ಯು)ಗೆ ಸರ್ಕಾರ ಆದ್ಯತೆ ನೀಡಲಿದ್ದು, ಐಆರ್​ಪಿಎಫ್​ಎಸ್​ ಸಿಬ್ಬಂದಿ ಕೂಡ ಇದರ ಸವಲತ್ತು ಪಡೆಯಲಿದ್ದಾರೆ. ಅಂದರೆ, ಐಎಎಸ್​ ಅಧಿಕಾರಿಗಳ ಕೆಡರ್​ಗೆ ಸಮನಾದ ಸವಲತ್ತುಗಳನ್ನು ಒಜಿಎಎಸ್​ ನಾಮನಿರ್ದೇಶಿತ ಅಧಿಕಾರಿಗಳು ಪಡೆಯಲಿದ್ದಾರೆ.ಬಡ್ತಿ ಸಿಕ್ಕಿದರೂ ಸಿಗದೇ ಇದ್ದರೂ ಅವರು ಈ ಸವಲತ್ತು ಪಡೆಯಲಿದ್ದಾರೆ. ಎನ್​ಎಫ್​ಯು ಯೋಜನೆಯನ್ನು ಸರ್ಕಾರ 2008ರಲ್ಲಿ ಜಾರಿಗೊಳಿಸಿದೆ. (ಏಜೆನ್ಸೀಸ್​)