Shashi Tharoor | ಮತದಾರರ ಪಟ್ಟಿ ಪರಿಷ್ಕರಣೆ, ಜಿಎಸ್​​ಟಿ ಸುಧಾರಣೆಗೆ ಕಾಂಗ್ರೆಸ್​​ ಸಂಸದ ಶಶಿ ತರೂರ್​​ ಶಭಾಷ್​​!

Shashi Tharoor: ಕಾಂಗ್ರೆಸ್ ಸಂಸದ ಶಶಿ ತರೂರ್ ಭಾರತೀಯ ಚುನಾವಣಾ ಆಯೋಗ ನಡೆಸುತ್ತಿರುವ ಬಿಹಾರದಲ್ಲಿ ನಡೆಸುತ್ತಿರುವ ಮತದಾರರ ಪಟ್ಟಿ ವಿಶೇಷ ತೀವ್ರ ಪರಿಷ್ಕರಣೆ (SIR) ಗೆ ಬೆಂಬಲ ವ್ಯಕ್ತಪಡಿಸಿದ್ದು, ಸಾರ್ವಜನಿಕರ ವಿಶ್ವಾಸವನ್ನು ಖಚಿತಪಡಿಸಿಕೊಳ್ಳಲು ಈ ಪ್ರಕ್ರಿಯೆಯನ್ನು ಪಾರದರ್ಶಕವಾಗಿ ನಡೆಸಬೇಕು ಎಂದಿದ್ದಾರೆ.

ಸುದ್ದಿ ಸಂಸ್ಥೆಯೊಂದಿಗೆ ಮಾತನಾಡಿದ ತರೂರ್, ಮತದಾರರ ಪಟ್ಟಿಗಳು ಪರಿಪೂರ್ಣವಾಗಿಲ್ಲ ಎನ್ನುವುದು ಎಲ್ಲರಿಗೂ ತಿಳಿದಿದ್ದು, ನಕಲಿ ಮತ್ತು ಮೃತ ಮತದಾರರು, ಬೇರೆ ಬೇರೆ ವಿಳಾಸಗಳಲ್ಲಿ ನೋಂದಾಯಿಸಿಕೊಂಡ ಅನೇಕ ಜನರು ಈ ಪಟ್ಟಿಯಲ್ಲಿದ್ದದಾರೆ, ಚುನಾವಣಾ ಆಯೋಗ ಈ ವಿಷಯದಲ್ಲಿ ಬಹಳ ಮುಕ್ತವಾಗಿ ಎದುರಿಸುವುದು ಉತ್ತಮ ನಡೆ. ಆಧುನಿಕ ತಂತ್ರಜ್ಞಾನಗಳಿಂದ ಮತದಾರರ ಪಟ್ಟಿಯನ್ನು ನವೀಕರಿಸುವ ಪ್ರಕ್ರಿಯೆಯನ್ನು ಸುಗಮಗೊಳಿಸಬಹುದಾಗಿದ್ದು, ಇದು ಹೆಚ್ಚು ಪರಿಣಾಮಕಾರಿ ಮತ್ತು ವಿಶ್ವಾಸಾರ್ಹವಾಗಿರುತ್ತದೆ ಎಂದರು.

ಇದನ್ನೂ ಓದಿ:ಆಪರೇಷನ್ ಸಿಂಧೂರಕ್ಕೆ 400 ವಿಜ್ಞಾನಿಗಳ ಶ್ರಮ

ಅಲ್ಗಾರಿದಮ್‌ಗಳನ್ನು ಬಳಸಿಕೊಂಡು ನಕಲಿ ಮತದಾರರನ್ನು ಗುರುತಿಸಬಹುದು ಮತ್ತು ಇರುವ ಸಮಸ್ಯೆಗಳನ್ನು ಪರಿಹರಿಸಬಹುದು, ಚುನಾವಣಾ ಆಯೋಗದ ವಿಶ್ವಾಸಾರ್ಹತೆಯ ಹಿತದೃಷ್ಟಿಯಿಂದ, ಯಾವುದೇ ಮತದಾರರು ಯಾವುದೇ ಸಂದೇಹವನ್ನು ಹೊಂದಿರಬಾರದು, ಈ ವಿಷಯದಲ್ಲಿ ಅನೇಕ ಸವಾಲುಗಳಿವೆ, ಎಲ್ಲ ವಿಷಯದಲ್ಲೂ ಪರಿಪೂರ್ಣತೆಯನ್ನು ಸಾಧಿಸಲು ಸಾಧ್ಯವಿಲ್ಲ, ಆದರೆ, ವಿರೋಧ ಪಕ್ಷಗಳು ಕೇಳುವ ಕಾನೂನುಬದ್ಧ ಪ್ರಶ್ನೆಗಳಿಗೆ ಆಯೋಗ ನ್ಯಾಯಯುತ ರೀತಿಯಲ್ಲಿ ಪ್ರತಿಕ್ರಿಯಿಸಬೇಕು ಎಂದರು.

ಜಿಎಸ್​​ಟಿ ಸುಧಾರಣೆ ಸ್ವಾಗತಿಸಿದ ತರೂರ್​

ಕೇಂದ್ರ ಸರ್ಕಾರ ಇತ್ತೀಚೆಗೆ ಜಾರಿಗೆ ತಂದಿರುವ ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ರಚನೆಯ ಪರಿಷ್ಕರಣೆಗೆ ತರೂರ್​​ ಬೆಂಬಲ ವ್ಯಕ್ತಪಡಿಸಿದ್ದು, ಇದು ನ್ಯಾಯಯುತ ವ್ಯವಸ್ಥೆಯತ್ತ ಪ್ರಮುಖ ಹೆಜ್ಜೆ ಎಂದು ಬಣ್ಣಿಸಿದ್ದಾರೆ. ಕಾಂಗ್ರೆಸ್ ಪಕ್ಷ ಅನೇಕ ವರ್ಷಗಳಿಂದ ಇದನ್ನೇ ಹೇಳುತಿತ್ತು, ಈಗ ಇದು ನ್ಯಾಯಯುತ ವ್ಯವಸ್ಥೆಯಾಗಿದೆ ಎಂದರು. ಸರ್ಕಾರವು ಸರಳೀಕೃತ ಎರಡು ಹಂತದ ಜಿಎಸ್‌ಟಿ ವ್ಯವಸ್ಥೆಯನ್ನು ಅನುಮೋದಿಸಿದ್ದು, ಇದು ಶೇ. 5 ಮತ್ತು ಶೇ. 18 ದರಗಳನ್ನು ಹೊಂದಿದ್ದು, ಹಿಂದಿನ ಶೇ. 12 ಮತ್ತು ಶೇ. 28 ಸ್ಲ್ಯಾಬ್‌ಗಳನ್ನು ತೆಗೆದುಹಾಕಿದೆ. ಹೊಸ ರಚನೆಯು ಸೆಪ್ಟೆಂಬರ್ 22 ರ ನವರಾತ್ರಿಯ ಮೊದಲ ದಿನ ಇದು ಜಾರಿಗೆ ಬರಲಿದೆ.

ಬಿಹಾರದಲ್ಲಿ ಇತ್ತೀಚೆಗೆ ನಡೆದ ಎಸ್‌ಐಆರ್ ಪ್ರಕ್ರಿಯೆಯ ಪರಿಣಾಮವಾಗಿ ಆರಂಭಿಕ ಹಂತದಲ್ಲಿ 65 ಲಕ್ಷ ಹೆಸರುಗಳನ್ನು ಕರಡು ಮತದಾರರ ಪಟ್ಟಿಯಿಂದ ಅಳಿಸಲಾಗಿದೆ. ಈ ಪೈಕಿ 25 ಲಕ್ಷ ಹೆಸರುಗಳನ್ನು ವಲಸೆಯ ಕಾರಣದಿಂದಾಗಿ, 22 ಲಕ್ಷ ಹೆಸರುಗಳನ್ನು ಮೃತರೆಂದು, 9.7 ಲಕ್ಷ ಹೆಸರುಗಳನ್ನು ಅವರ ವಿಳಾಸಗಳಲ್ಲಿ ಕಂಡುಬಂದಿಲ್ಲ ಎಂದು ಮತ್ತು ಏಳು ಲಕ್ಷ ಹೆಸರುಗಳನ್ನು ಬಹು ಕ್ಷೇತ್ರಗಳಲ್ಲಿ ನೋಂದಾಯಿಸಿದ್ದಕ್ಕಾಗಿ ತೆಗೆದುಹಾಕಲಾಗಿದೆ.(ಏಜೆನ್ಸೀಸ್​​​)

https://www.vijayavani.net/nepal-stability-vital-to-india-pm-urges-peace-as-kathmandu-sees-violent-protests