ಕೃಷಿ ಪಂಪ್​ಸೆಟ್​ಗೆ ಸ್ವಂತ ವೆಚ್ಚ ಆದೇಶ ವಾಪಸ್?

ಬೆಂಗಳೂರು: ರೈತರು, ಸಂಘಟನೆಗಳು, ಜನಪ್ರತಿನಿಧಿಗಳ ವಿರೋಧದಿಂದಾಗಿ ನೀರಾವರಿ ಪಂಪ್​ಸೆಟ್​ಗಳಿಗೆ ವಿದ್ಯುತ್ ಸಂಪರ್ಕ ವಿಚಾರದಲ್ಲಿ ರಾಜ್ಯ ಸರ್ಕಾರ ಹಿಂದಡಿ ಇಡುವ ಸಾಧ್ಯತೆಗಳಿವೆ. ರೈತರು ಪಂಪ್​ಸೆಟ್​ಗಳಿಗೆ ಸ್ವಂತ ವೆಚ್ಚದಲ್ಲಿ ವಿದ್ಯುತ್ ಸಂಪರ್ಕ, ಮೂಲಸೌಲಭ್ಯ ಕಲ್ಪಿಸಿಕೊಳ್ಳಬೇಕು ಎಂದು ಬರಗಾಲದಲ್ಲಿ ಹೊರಡಿಸಿದ ಆದೇಶ ಕಾಂಗ್ರೆಸ್ ಸರ್ಕಾರದ ಪಾಲಿಗೆ ಕಹಿಯಾಗಿದೆ.

ರೈತರು, ಸ್ವಪಕ್ಷದ ಶಾಸಕರ ಒತ್ತಡಕ್ಕೆ ಮಣಿದು ಕೃಷಿ ಪಂಪ್​ಸೆಟ್​ಗಳಿಗೆ ವಿದ್ಯುತ್ ಕಡಿತ ನಿರ್ಧಾರವನ್ನು ಸಿಎಂ ಸಿದ್ದರಾಮಯ್ಯ ವಾಪಸ್ ಪಡೆದರು. ಎಂದಿನಂತೆ ಏಳು ತಾಸು ಮೂರು ಫೇಸ್ ವಿದ್ಯುತ್ ಸರಬರಾಜು ಮರು ಸ್ಥಾಪಿಸಿದರು. ಆದರೆ, ಐಪಿ ಸೆಟ್​ಗಳ ವಿದ್ಯುದ್ದೀಕರಣಕ್ಕೆ ತಗಲುವ ವೆಚ್ಚವನ್ನು ರೈತರೇ ಭರಿಸಬೇಕು ಎಂಬ ಆದೇಶದ ವಿರುದ್ಧ ತೀವ್ರ ವಿರೋಧ ತಲೆಎತ್ತಿದ್ದು, ಸರ್ಕಾರ ಮತ್ತೊಮ್ಮೆ ಒತ್ತಡದ ಸುಳಿಗೆ ಸಿಲುಕಿದೆ. ಆದೇಶ ವಾಪಸ್​ಗೆ ಆಗ್ರಹಿಸಿ ರೈತ ಸಮೂಹ ಎಸ್ಕಾಂಗಳಿಗೆ ಪತ್ರ ಚಳವಳಿ ಆರಂಭಿಸಿದೆ. ಹಲವೆಡೆ ರೈತ ಸಂಘಟನೆಗಳು ಪ್ರತಿರೋಧವೊಡ್ಡಿದ್ದು, ಪ್ರತಿಪಕ್ಷಗಳು ಧ್ವನಿಗೂಡಿಸಿವೆ. ಅದರಲ್ಲೂ, ನೀರಾವರಿ ಪಂಪ್​ಸೆಟ್ ಅವಲಂಬಿತ ಕೃಷಿಕರು ಉತ್ತರ ಕರ್ನಾಟಕ ಭಾಗದಲ್ಲೇ ಹೆಚ್ಚು. ಮುಂದಿನ ಲೋಕಸಭೆ ಚುನಾವಣೆಯಲ್ಲಿ ಕೈಗೆ ದುಬಾರಿಯಾಗಲಿದೆ ಎಂದು ಸ್ವಪಕ್ಷದ ಶಾಸಕರು ಆತಂಕಕ್ಕೆ ಒಳಗಾಗಿರುವುದು ಸರ್ಕಾರವನ್ನು ಇಕ್ಕಟ್ಟಿಗೆ ಸಿಲುಕಿಸಿದ್ದು, ಆದೇಶ ಹಿಂಪಡೆಯುವ ಗಂಭೀರ ಚಿಂತನೆ ನಡೆಸಿದೆ.

ಆದೇಶಕ್ಕೆ ಕಾರಣವೇನು ?

2023ರ ಸೆ.22ಕ್ಕೆ ಅನ್ವಯಿಸುವಂತೆ ಕಳೆದ ಎಂಟು ವರ್ಷಗಳ ಅಕ್ರಮ ಐಪಿ ಸೆಟ್​ಗಳನ್ನು ಒಂದು ಬಾರಿಗೆ ಸಕ್ರಮಗೊಳಿಸಲಾಗುವುದು. ಇಂತಹ ಎರಡು ಲಕ್ಷ ಪಂಪ್​ಸೆಟ್​ಗಳ ವಿದ್ಯುದ್ದೀಕರಣಕ್ಕೆ ಎಸ್ಕಾಂಗಳು 6,999 ಕೋಟಿ ರೂ. ವೆಚ್ಚ ಮಾಡಿವೆ. ಇದನ್ನು ಎಸ್ಕಾಂಗಳಿಗೆ ಸರ್ಕಾರವೇ ತುಂಬಿಕೊಡಲಿದೆ. ಸೆ.22ಕ್ಕೆ ಕಟ್​ಆಫ್ ದಿನಾಂಕ ನಿಗದಿ ಮಾಡಿದ್ದು, ಅದಕ್ಕೂ ಮುನ್ನ ಸಲ್ಲಿಕೆಯಾದ ಅರ್ಜಿಗಳು, ನೋಂದಣಿಯಾದ ಐಪಿ ಸೆಟ್​ಗಳಿಗೆ ಮಾತ್ರ ಸರ್ಕಾರದ ವೆಚ್ಚದಲ್ಲಿ ವಿದ್ಯುತ್ ಸೌಕರ್ಯ ಒದಗಿಸಲಾಗುತ್ತದೆ.

ಹೊಸದಾಗಿ ಅರ್ಜಿ ಸಲ್ಲಿಕೆ, ನೋಂದಣಿ, ಐಪಿ ಸೆಟ್​ಗಳಿಗೆ ಬೇಕಾದ ವಿದ್ಯುತ್ ಕಂಬ, ತಂತಿ, ಪರಿವರ್ತಕ, ಸಾಗಣೆ ಮುಂತಾದ ವೆಚ್ಚವನ್ನು ರೈತರೇ ಭರಿಸಬೇಕು ಎಂದು ಸೆ.22ರ ಸಚಿವ ಸಂಪುಟ ಸಭೆ ನಿರ್ಣಯಿಸಿತ್ತು. ಅದರಂತೆಯೇ ಇಂಧನ ಇಲಾಖೆ ಅ.10ರಂದು ಆದೇಶ ಹೊರಡಿಸಿತ್ತು.

ಸರ್ಕಾರ ಎಡವಿದ್ದೆಲ್ಲಿ ?

ಕುಸುಮ್​ಬಿ ಯೋಜನೆಯಡಿ ಸ್ವತಂತ್ರ ಸೌರ ವಿದ್ಯುತ್​ಚಾಲಿತ ಐಪಿ ಸೆಟ್​ಗಳನ್ನು ಸ್ಥಾಪಿಸುವ ರೈತರಿಗೆ ಶೇ.30ರಷ್ಟು ಸಹಾಯಧನ ಕೇಂದ್ರ ಸರ್ಕಾರ ನೀಡುತ್ತದೆ. 7.5 ಅಶ್ವಶಕ್ತಿಗಿಂತ ಅಧಿಕ ಸಾಮರ್ಥ್ಯದ ಐಪಿ ಸೆಟ್ ಅಳವಡಿಕೆಗೆ ಅವಕಾಶವಿದೆಯಾದರೂ ಸಬ್ಸಿಡಿ 7.5 ಎಚ್​ಪಿಗೆ ಸೀಮಿತ. ಉಳಿದ ವೆಚ್ಚದಲ್ಲಿ ರಾಜ್ಯ ಸರ್ಕಾರ ಶೇ.30, ಫಲಾನುಭವಿ ರೈತ ಶೇ.40ರಷ್ಟು ಭರಿಸಬೇಕು. ಆದರೆ, ಸೌರ ವಿದ್ಯುತ್ ಬಳಕೆ ಉತ್ತೇಜಿಸಲು ರಾಜ್ಯ ಸರ್ಕಾರ ತನ್ನ ಪಾಲಿನ ವೆಚ್ಚ ಶೇ.50ಕ್ಕೆ ಏರಿಸಿ, ರೈತರ ಪಾಲನ್ನು ಶೇ.20ಕ್ಕೆ ಇಳಿಸಿತು. ಸೌರಶಕ್ತಿ ಚಾಲಿತ ಪಂಪ್​ಸೆಟ್ ಬಳಸಿದ ನಂತರ ಹೆಚ್ಚುವರಿ ವಿದ್ಯುತ್ ಸರ್ಕಾರಕ್ಕೆ ಮಾರಾಟ ಮಾಡಲು ಅವಕಾಶವಿದೆ. ಜತೆಗೆ ಹೆಚ್ಚುವರಿ ಶೇ.20ರಷ್ಟು ಸಬ್ಸಿಡಿ ನೀಡಲಿದೆ ಎಂದು ಲೆಕ್ಕಾಚಾರ ಮಾಡಿತು. ಆದರೆ, ಪೂರ್ಣ ಪ್ರಮಾಣದಲ್ಲಿ ಐಪಿ ಸೆಟ್​ಗಳಿಗೆ ಸೌರ ವಿದ್ಯುತ್ ಅಳವಡಿಕೆ, ಹೆಚ್ಚುವರಿ ವಿದ್ಯುತ್ ಮಾರಾಟದಿಂದ ರೈತರ ಕೈಗೆ ಒಂದಿಷ್ಟು ಹಣ ಸೇರುವ ಮುನ್ನವೇ ‘ಸ್ವಂತ ವೆಚ್ಚ’ದ ಆದೇಶ ಹೊರಡಿಸಿ ಸರ್ಕಾರ ಎಡವಿದಂತಾಗಿದೆ.

ರೈತರ ಒತ್ತಡಕ್ಕೆ ಸರ್ಕಾರ ಮತ್ತೊಮ್ಮೆ ಮಣೆ ?

* ಐಪಿ ಸೆಟ್​ಗಳಿಗೆ ಸ್ವಂತ ಖರ್ಚಿನಲ್ಲಿ ವಿದ್ಯುದ್ದೀಕರಣ ಕೈಬಿಡಲು ಚಿಂತನೆ

* ಗುರುವಾರದ ಸಚಿವ ಸಂಪುಟ ಸಭೆಯಲ್ಲಿ ಚರ್ಚೆ ಸಾಧ್ಯತೆ

* ಅನ್ನದಾತರ ತೀವ್ರ ವಿರೋಧ

ಸಂಪುಟ ಸಭೆಯಲ್ಲಿ ಇಂದು ಚರ್ಚೆ

ಆದೇಶ ಹಿಂದಕ್ಕೆ ಪಡೆಯುವುದರಿಂದ ಉಂಟಾಗುವ ಸಾಧಕ-ಬಾಧಕ ಕುರಿತು ಗುರುವಾರ ಸಂಜೆ ನಡೆಯಲಿರುವ ಸಚಿವ ಸಂಪುಟ ಸಭೆಯಲ್ಲಿ ರ್ಚಚಿಸುವ ಸಾಧ್ಯತೆಗಳಿವೆ ಎಂದು ಮೂಲಗಳು ತಿಳಿಸಿವೆ. ಹಲವೆಡೆ ಉಪವಾಸ, ಅನಿರ್ದಿಷ್ಟ ಧರಣಿ ಕುಳಿತವರಿಗೆ ಸಚಿವರು ಇದೇ ಭರವಸೆ ನೀಡಿದ್ದು, ಬರ ಪರಿಸ್ಥಿತಿಯಲ್ಲಿ ಆದೇಶ ವಾಪಸ್​ಗೆ ಮನವರಿಕೆ ಮಾಡಿಕೊಡುವ ಸಂಭವವಿದೆ. ಹೊಸ ಆದೇಶದಿಂದ ರೈತರು 3-4 ಲಕ್ಷ ರೂ.ವರೆಗೆ ವೆಚ್ಚ ಭರಿಸಬೇಕಾಗಿದೆ. ಹಿಂದಿನಂತೆ ನೋಂದಣಿ ಶುಲ್ಕ ಭರಿಸಿಕೊಂಡು ಎಸ್ಕಾಂಗಳಿಂದಲೇ ಸೌಲಭ್ಯ ಕಲ್ಪಿಸುವ ವ್ಯವಸ್ಥೆಯನ್ನು ಮುಂದುವರಿಸುವುದು ಸೂಕ್ತ. ಐಪಿ ಸೆಟ್​ಗಳಿಗೆ ಸೌರ ವಿದ್ಯುತ್ ಸಂಪರ್ಕ ಪಡೆಯಲು ಪ್ರೋತ್ಸಾಹ, ವೈಯಕ್ತಿಕ ಸೌರಶಕ್ತಿಚಾಲಿತ ಐಪಿ ಸೆಟ್​ಗಳ ಅಳವಡಿಕೆ, ಹೆಚ್ಚುವರಿ ವಿದ್ಯುತ್ ತಿರುಗಿ ಸರ್ಕಾರಕ್ಕೆ ಮಾರಾಟ ಮಾಡುವ ಹಂತಕ್ಕೆ ತಲುಪಲಿ. ನಂತರ ಬೇಕಿದ್ದರೆ ಸ್ವಂತ ವೆಚ್ಚದಲ್ಲಿ ವಿದ್ಯುದ್ದೀಕರಣ ಆದೇಶ ಹೊರಡಿಸಿದರೆ, ರೈತರಿಗೆ ಬಾಧಿಸುವುದಿಲ್ಲ ಎಂಬ ವಿಷಯ ಸಂಪುಟ ಸಭೆ ಮುಂದೆ ಪ್ರಸ್ತಾಪವಾಗುವ ಸಾಧ್ಯತೆಗಳಿವೆ ಎಂದು ಮೂಲಗಳು ತಿಳಿಸಿವೆ.