ಈಗಾಗಲೇ ಸೋಂಕು ನಿಯಂತ್ರಣದ ನಿಟ್ಟಿನಲ್ಲಿ ಸರ್ಕಾರ ತನ್ನ ಪ್ರಯತ್ನಗಳನ್ನು ಮಾಡುತ್ತಿದೆ. ರಾಜ್ಯದಲ್ಲೂ 5ಟಿ ತಂತ್ರ ಅನುಸರಿಸಲು ನಿರ್ಧರಿಸಲಾಗಿದೆ. ‘ಪರೀಕ್ಷಿಸುವುದು, ಪತ್ತೆ ಮಾಡುವುದು, ಮಾಹಿತಿ ಕಲೆ ಹಾಕುವುದು, ಚಿಕಿತ್ಸೆ ನೀಡುವುದು, ತಂತ್ರಜ್ಞಾನ’ವನ್ನು ಬಳಸಿಕೊಳ್ಳಲು ತಜ್ಞರು ಸಲಹೆ ನೀಡಿದ್ದು, ಅದರ ಸೂಕ್ತ ಅನುಷ್ಠಾನಕ್ಕೆ ಸರ್ಕಾರ ಕ್ರಮ ಕೈಗೊಳ್ಳುತ್ತಿದೆ. ಲಾಕ್ಡೌನ್ ಅವಧಿ ಮುಗಿದಿರುವುದರಿಂದ ಮತ್ತು ಕರೊನಾ ಸೇನಾನಿಗಳ ಮೇಲಿನ ಒತ್ತಡ ಹೆಚ್ಚಿರುವುದರಿಂದ ಪ್ರಸಕ್ತ ಜನರ ಮೇಲಿನ ಜವಾಬ್ದಾರಿ ಹೆಚ್ಚಿದೆ. ಸೂಕ್ತ ಎಚ್ಚರಿಕೆ, ಆರೋಗ್ಯ ಕ್ರಮಗಳ ಜತೆ ಜನಜೀವನವನ್ನು ಮತ್ತೆ ಎಂದಿನಂತೆ ಮುಂದುವರಿಸಬೇಕಾಗಿದೆ. ಲಾಕ್ಡೌನ್ ಇಲ್ಲ ಎಂಬ ನೆಪವೇ ಉದಾಸೀನ ಅಥವಾ ನಿರ್ಲಕ್ಷ್ಯಕ್ಕೆ ಕಾರಣವಾಗಬಾರದು. ಕೆಲ ಮಹಾನಗರಗಳಲ್ಲಿ ಜನರ ಪ್ರಯತ್ನ ಮತ್ತು ಬೆಂಬಲದ ಮೂಲಕ ಕರೊನಾ ನಿಯಂತ್ರಣಕ್ಕೆ ತರಲು ಸಾಧ್ಯವಾಗಿದೆ. ಬೆಂಗಳೂರು ಸೇರಿ ಕರ್ನಾಟಕದಲ್ಲೂ ಈ ಮಾದರಿ ಜಾರಿಗೆ ಬರಬೇಕು. ಜನರು ಸ್ವಯಂಸ್ಪೂರ್ತಿಯಿಂದ ಸುರಕ್ಷಾ ಕ್ರಮಗಳನ್ನು ಅನುಸರಿಸಬೇಕು. ಅನಗತ್ಯ ಓಡಾಟ ತಪ್ಪಿಸುವುದು, ಅನಿವಾರ್ಯ ಕೆಲಸಗಳಿಗೆ ಸಂಚರಿಸುವಾಗ ತಪ್ಪದೇ ಮಾಸ್ಕ್ ಧರಿಸುವುದು, ಸುರಕ್ಷಿತ ಅಂತರ ಕಾಪಾಡಿಕೊಳ್ಳುವುದು ಸೇರಿ ರೋಗನಿರೋಧಕ ಶಕ್ತಿ ಹೆಚ್ಚಿಸುವ ಕ್ರಮಗಳನ್ನೂ ಅಳವಡಿಸಿಕೊಳ್ಳಬೇಕಿದೆ. ಜನರ ಪ್ರಯತ್ನವೇ ಕರೊನಾ ವಿರುದ್ಧ ಹೋರಾಟಕ್ಕೆ ಪ್ರಬಲ ಅಸ್ತ್ರವಾಗುವ ಸಂದರ್ಭವಿದು.
