ರಿಲಯನ್ಸ್​ ಫೌಂಡೇಶನ್​ ವತಿಯಿಂದ ದೇಶದ 3 ಕೋಟಿ ಜನರಿಗೆ "ಮಿಷನ್​ ಅನ್ನ ಸೇವಾ" ಕಾರ್ಯಕ್ರಮದಡಿ ಉಚಿತ ಊಟ ವಿತರಣೆ

ನವದೆಹಲಿ: ಕರೊನಾ ತಡೆಗಟ್ಟಲು ಹೇರಲಾಗಿರುವ ಲಾಕ್​ಡೌನ್​ನಿಂದ ಆರ್ಥಿಕ ಚಟುವಟಿಕೆಗಳು ಸ್ತಬ್ಧವಾಗಿದ್ದು, ನಿತ್ಯದ ಆದಾಯವಿಲ್ಲದೇ ಊಟಕ್ಕಾಗಿ ಪರದಾಡುತ್ತಿರುವವರ ನೆರವಿಗೆ ರಿಲಯನ್ಸ್​ ಫೌಂಡೇಶನ್​ ಧಾವಿಸಿದೆ.

ಭಾರತದ ನಂ. 1 ಶ್ರೀಮಂತ ಉದ್ಯಮಿ ಮುಖೇಶ್​ ಅಂಬಾನಿ ಪತ್ನಿ ಹಾಗೂ ರಿಲಯನ್ಸ್​ ಫೌಂಡೇಶನ್​ ಚೇರ್​ಪರ್ಸನ್​ ನೀತಾ ಅಂಬಾನಿಯ ಅವರು ತಮ್ಮ ಫೌಂಡೇಶನ್​ ವತಿಯಿಂದ ಭಾರತದ ಜನರಿಗೆ "ಮಿಷನ್​ ಅನ್ನ ಸೇವಾ" ಹೆಸರಿನಲ್ಲಿ ವಿಶ್ವದ ಬಹುದೊಡ್ಡ ಕಾರ್ಪೊರೇಟ್​ ಊಟ ವಿತರಣೆ ಕಾರ್ಯಕ್ರಮವನ್ನು ಘೋಷಣೆ ಮಾಡಿದ್ದಾರೆ.

ದೇಶದ ಜನರು ಕರೊನಾ ವೈರಸ್​ ಲಾಕ್​ಡೌನ್​ನಿಂದ ಸಂಕಷ್ಟದಲ್ಲಿದ್ದು, ಕಾರ್ಯಕ್ರಮದ ಮೂಲಕ ದೇಶಾದ್ಯಂತ 3 ಕೋಟಿ ಜನರಿಗೆ ಉಚಿತ ಊಟ ವಿತರಣೆ ಮಾಡಲಿದ್ದಾರೆ. ಲಾಕ್​ಡೌನ್​ನಿಂದ ತೊಂದರೆಗೆ ಸಿಲುಕಿರುವ ಸಮುದಾಯಗಳು ಮತ್ತು ಕೂಲಿ ಕಾರ್ಮಿಕರಿಗೆ ಈ ಕಾರ್ಯಕ್ರಮ ನೆರವಾಗಲಿದೆ.

ಈ ಬಗ್ಗೆ ಮಾತನಾಡಿರುವ ನೀತಾ ಅವರು, ಕರೊನಾ ವೈರಸ್​ ಇಡೀ ವಿಶ್ವ, ಭಾರತ ಮತ್ತು ಮಾನವೀಯತೆಗೆ ಹಿಂದೆದು ಕಂಡಿರದ ಒಂದು ಸಾಂಕ್ರಮಿಕವಾಗಿದೆ. ಇಂತಹ ಕಷ್ಟದ ಸಮಯದಲ್ಲಿ ನಮ್ಮ ಫೌಂಡೇಶನ್​ ವತಿಯಿಂದ ದಿನಗೂಲಿ ನೌಕರರು, ಕೊಳಗೇರಿ ನಿವಾಸಿಗಳು, ನಗರ ಸೇವಾ ಪೂರೈಕೆದಾರರು, ಕಾರ್ಮಿಕರು ಹಾಗೂ ವೃದ್ಧಾಶ್ರಮ ಮತ್ತು ಅನಾಥಾಶ್ರಮಗಳಿಗೆ ಬಹುದೊಡ್ಡ ಊಟದ ಕಾರ್ಯಕ್ರಮದಡಿಯಲ್ಲಿ ಉಚಿತ ಊಟ ವಿತರಣೆ ಮಾಡಲಾಗುವುದು ಎಂದಿದ್ದಾರೆ. (ಏಜೆನ್ಸೀಸ್​)