ರಾಣೆಬೆನ್ನೂರಿನಲ್ಲಿ ರತಿ&-ಮನ್ಮಥರ ನಗಿಸುವ ಸ್ಪರ್ಧೆ ಮಾ. 14ರಂದು

ರಾಣೆಬೆನ್ನೂರ: ಹೋಳಿ ಹುಣ್ಣಿಮೆ ಬಂತೆಂದರೆ ಸಾಕು ವಾಣಿಜ್ಯ ನಗರಿ ರಾಣೆಬೆನ್ನೂರಿನಲ್ಲಿ ಎಲ್ಲರ ಚಿತ್ತ ಐತಿಹಾಸಿಕ ರತಿ&ಮನ್ಮಥರನ್ನು ನಗಿಸುವ ಸ್ಪರ್ಧೆಯತ್ತ ಎನ್ನುವಂತಾಗುತ್ತದೆ.

ಇಲ್ಲಿಯ ದೊಡ್ಡಪೇಟೆಯಲ್ಲಿ ಏರ್ಪಡಿಸುವ ಈ ಸ್ಪರ್ಧೆ 65 ವರ್ಷ ಪೂರೈಯಿಸಿ ಪ್ರಸಕ್ತ ವರ್ಷ 66ನೇ ಸ್ಪರ್ಧೆಗೆ ಅಣಿಯಾಗುತ್ತಿದೆ. ಆದರೆ, ಈವರೆಗೂ ಯಾರೂ ರತಿ&ಮನ್ಮಥರನ್ನು ನಗಿಸಿದ ಉದಾಹರಣೆಗಳಿಲ್ಲ.

ನಾನಾ ರೀತಿ ಪ್ರಯತ್ನ...

ಏನ್​ ಕಾಮಣ್ಣ ನಿನ್ನನ್ನಾ ಐಶ್ವರ್ಯ ಮದುವೆ ಮಾಡ್ಕೋಕೆ ಬರ್ತಾಳಂತೆ... ಕಳೆದ ವರ್ಷ ಬರಬೇಕಾದ ಪ್ರಧಾನಮಂತ್ರಿ ನರೇಂದ್ರ ಮೋದಿ ಈ ಸಾರಿ ಬರ್ತಾರ್​ ಅವರಿಗೆ ಹೇಳಿ ನಿನ್ನ ಹೆಂಡತಿಗೆ ಬಂಗಾರದ ಸರಾ ಕೊಡಸ್ತೇನೆ ನೀನು ಗಂಟು ಮುಸುಡಿ ಮಾಡ್ಕಂತ ಯಾಕ ಕುಂತಿಪಾ...? ರತಿ ನೀನಗ್​ ಆದ್ರ ತಿಳಿಬಾರದಾ ಅವನ ಜೊತೆ ಹ್ಯಾಂಗ್​ ಬಾಳ್ವೆ ಮಾಡತಿ. ಅವನ ಜೋತು ಬಿದ್ದಿರುವ ಮೀಸೆ ನೋಡು ಎಳ್ಳಷ್ಟು ಚೆನ್ನಾಗಿಲ್ಲ. ಹೀಗೆ ಹತ್ತು ಹಲವು ಹಾಸ್ಯದ ಮೂಲಕ ಜೀವಂತ ಕಾಮಣ್ಣರನ್ನು (ರತಿ-&ಮನ್ಮಥರು) ನಗಿಸಲು ಹೋಗಿ ಪೇಚೆಗೆ ಸಿಲುಕಿಕೊಂಡವರಂತೆ ನಗೆಚಟಾಕಿಗಳು ಬಂದ ದಾರಿಗೆ ಸುಂಕವಿಲ್ಲ ಎಂದು ವಾಪಸ್​ ಆಗುತ್ತಾರೆ.

ಕಳೆದ 65 ವರ್ಷಗಳಿಂದ ನಡೆದುಕೊಂಡು ಬಂದ ಈ ಮನರಂಜನಾ ಸ್ಪರ್ಧೆ ಐತಿಹಾಸಿಕ ಮಹತ್ವ ಪಡೆದುಕೊಂಡಿದೆ. ಪ್ರತಿವರ್ಷ ರತಿ-ಮನ್ಮಥರನ್ನು ನಗಿಸಲು ದಾವಣಗೆರೆ, ಹುಬ್ಬಳ್ಳಿ, ಹಾವೇರಿ ಸೇರಿದಂತೆ ವಿವಿಧ ಜಿಲ್ಲೆ ಹಾಗೂ ರಾಜ್ಯದ ಮೂಲೆಮೂಲೆಗಳಿಂದ ಸಾವಿರಾರು ನಗೆಚಟಾಕಿಗಳು ಬಂದು ಪ್ರಯತ್ನಿಸುತ್ತಾರೆ. ಆದರೆ, ಈವರೆಗೂ ಯಾರೋಬ್ಬರೂ ರತಿ-ಮನ್ಮಥರನ್ನು ನಗಿಸಿದ ಇತಿಹಾಸವಿಲ್ಲ.

ಇವರನ್ನು ನಗಿಸಿದವರಿಗೆ 1 ಲಕ್ಷ ರೂ.ಯಿಂದ 6.50 ಲಕ್ಷ ರೂ.ಗೂ ಅಧಿಕ ಮೌಲ್ಯದ ನಗದು ಬಹುಮಾನ ಇಡಲಾಗುತ್ತದೆ. ಆದರೆ, ದುಡ್ಡು ಸಿಗುವುದು ಎಂದು ನಗಿಸಲು ಹೋದವರು ಮಾತ್ರ ಪೇಚಿಗೆ ಸಿಲುಕುವುದು ಗ್ಯಾರಂಟಿ.

ಬಲು ಭಟ್ಟರು ಇವರು...

ರತಿ-ಮನ್ಮಥರನ್ನು ದೇವಸ್ಥಾನದ ಗದ್ದುಗೆಯ ಮೇಲೆ ಕುಂದರಿಸಿ ವಿಶೇಷ ಪೂಜೆ ಸಲ್ಲಿಸಲಾಗುತ್ತದೆ. ನಂತರ ನಗೆ ಚಟಾಕಿಗಳು ರತಿ-ಮನ್ಮಥರ ಕುರಿತು ಹಾಸ್ಯ ಕಥೆ, ನಟನೆ, ಯುವಕರು ಯುವತಿಯ ಬಟ್ಟೆ ಧರಿಸಿ ಬರುವುದು. ಹಾಸ್ಯದ ಮೂಲಕ ಕಾಮನ ಸತ್ತಾಗ ಆತನ ಹೆಂಡತಿ ಅಳುವ ರೀತಿ. ವಿಶೇಷವಾಗಿ ಮಹಿಳೆಯರು ವಿವಿಧ ಬಗೆಯ ಸರ್ಕಸ್​ ಮಾಡುತ್ತಾರೆ. ಆದರೂ ಈವರೆಗೂ ರತಿ-ಮನ್ಮಥರು ನಕ್ಕಿಲ್ಲ. ಹೀಗಾಗಿ ನಗೆಚಟಾಕಿಗಳು ಕೊನೆಗೆ ಬಲು ಭಂಟರು ಇವರು ಎನ್ನುವ ಬಿರುದು ನೀಡಿ ವಾಪಸ್​ ಆಗುತ್ತಾರೆ. ಪ್ರಸಕ್ತ ವರ್ಷವೂ ಈ ಸ್ಪರ್ಧೆ ಏರ್ಪಡಿಸಲಾಗಿದ್ದು, ರತಿ-ಮನ್ಮಥರನ್ನು ಯಾರಾದರೂ ನಗಿಸುವರೇ ಎಂಬುದನ್ನು ಕಾಯ್ದು ನೋಡಬೇಕಿದೆ.