ರಾಜ್ಯೋತ್ಸವ ಕೊಡುಗೆ: ಶೀಘ್ರ ಖಾಸಗಿ ವಲಯದಲ್ಲಿ ಕನ್ನಡಿಗರಿಗೆ ಉದ್ಯೋಗ ಆದ್ಯತೆ

ಸಿದ್ಧವಾಗಿದೆ ಮಹತ್ವದ ವಿಧೇಯಕ * ನ.10ರ ನಂತರ ಸಭೆ

ರುದ್ರಣ್ಣ ಹರ್ತಿಕೋಟೆ ಬೆಂಗಳೂರು : ಖಾಸಗಿ ವಲಯದಲ್ಲಿ ಕನ್ನಡಿಗರಿಗೆ ಉದ್ಯೋಗದ ಬೇಡಿಕೆ ಕೊನೆಗೂ ಈಡೇರುವ ಕಾಲ ಬಂದಿದೆ. ಕಳೆದ ಹಲವು ವರ್ಷಗಳ ಬೆಳವಣಿಗೆಯಿಂದಾಗಿ ಖಾಸಗಿ ವಲಯದ ಉದ್ಯೋಗ ಮರೀಚಿಕೆ ಎಂಬ ಭಾವನೆ ಮೂಡಿತ್ತಾದರೂ ಕನ್ನಡಿಗರ ನಿರೀಕ್ಷೆಯನ್ನು ವಾಸ್ತವಗೊಳಿಸುವ ನಿಟ್ಟಿನಲ್ಲಿ ಹೊಸ ಬೆಳವಣಿಗೆಗಳು ನಡೆದಿವೆ. ಈ ನಿಟ್ಟಿನಲ್ಲಿ ವಿಧೇಯಕವೂ ಸಿದ್ಧವಾಗಿದೆ.

ಬಜೆಟ್ ಭರವಸೆ: 2014ರಲ್ಲಿ ಸರ್ಕಾರ ರೂಪಿಸಿದ್ದ ಕೈಗಾರಿಕಾ ನೀತಿ ಹಾಗೂ 2017ರ ಬಜೆಟ್​ನಲ್ಲಿ ಕನ್ನಡಿಗರಿಗೆ ಉದ್ಯೋಗದ ಘೋಷಣೆ ಮಾಡಲಾಗಿತ್ತು. ಆಗಿನಿಂದ ಇಲಾಖೆಗಳ ನಡುವೆ ಚರ್ಚೆಗಳು ನಡೆದಿದ್ದವು.

ಅಧಿಸೂಚನೆ ಹಾದಿಯಲ್ಲಿ:  ಕಾರ್ವಿುಕ ಇಲಾಖೆ ಇತ್ತೀಚೆಗೆ ಕರ್ನಾಟಕ ಕೈಗಾರಿಕಾ ಉದ್ಯೋಗ (ಸ್ಥಾಯಿ ಆದೇಶ) ನಿಯಮ 1961ಕ್ಕೆ ತಿದ್ದುಪಡಿ ತಂದು ಅಧಿಸೂಚನೆ ಹೊರಡಿಸಿತ್ತು. ಆದರೆ ಅಧಿಸೂಚನೆಯಿಂದ ಉಪಯೋಗವಿಲ್ಲವೆಂಬ ಕಾರಣಕ್ಕೆ ಕಾಯ್ದೆಯನ್ನೇ ರೂಪಿಸಬೇಕೆಂದು ಒತ್ತಡ ಬಂದ ಹಿನ್ನೆಲೆಯಲ್ಲಿ ಇದೀಗ ಅಧಿಸೂಚನೆ ಹಾದಿಯಲ್ಲಿಯೇ ವಿಧೇಯಕ ಸಿದ್ಧಪಡಿಸಲಾಗಿದೆ.

ಸುಗ್ರೀವಾಜ್ಞೆ ಮೂಲಕ ಜಾರಿ?: ಹೊಸ ವಿಧೇಯಕವನ್ನು ಮುಂದಿನ ಅಧಿವೇಶನದಲ್ಲಿ ಮಂಡಿಸಬೇಕೋ ಅಥವಾ ತಕ್ಷಣ ಸುಗ್ರೀವಾಜ್ಞೆ ಮೂಲಕ ಜಾರಿಗೆ ತರಬೇಕೋ ಎಂಬ ಜಿಜ್ಞಾಸೆ ಇದೆ. ಈ ಕಾಯ್ದೆಯನ್ನು ಕಾರ್ವಿುಕ ಇಲಾಖೆ ಮಾತ್ರ ಜಾರಿಗೆ ತರಲು ಸಾಧ್ಯವಿಲ್ಲ. ಕೈಗಾರಿಕಾ ಇಲಾಖೆ ನೆರವು ಸಹ ಅಗತ್ಯ. ಆದ್ದರಿಂದ ಚುನಾವಣಾ ನೀತಿಸಂಹಿತೆ ಮುಗಿದ ನಂತರ ಅಂದರೆ ನ.10 ರ ನಂತರ ಈ ಎರಡು ಇಲಾಖೆಯ ಸಚಿವರಾದ ಜಗದೀಶ ಶೆಟ್ಟರ್ ಹಾಗೂ ಶಿವರಾಮ ಹೆಬ್ಬಾರ್ ಸಭೆ ನಡೆಸಿ ತೀರ್ಮಾನ ಕೈಗೊಳ್ಳಲಿದ್ದಾರೆ. ನಂತರ ಸಿಎಂ ಜತೆ ರ್ಚಚಿಸಿ ಸಂಪುಟದ ಮುಂದೆ ಮಂಡಿಸಲಾಗುತ್ತದೆ. ಸಂಪುಟದಲ್ಲಿ ಒಪ್ಪಿದರೆ ತಕ್ಷಣ ಸುಗ್ರೀವಾಜ್ಞೆ ಹೊರಡಿಸಲಾಗುತ್ತದೆ. ಇಲ್ಲದಿದ್ದರೆ ಮುಂದಿನ ಅಧಿವೇಶನದ ತನಕ ಕಾಯಲಾಗುತ್ತದೆ.

ಕಡ್ಡಾಯವಲ್ಲ, ಆದ್ಯತೆ : ಕನ್ನಡಿಗರಿಗೆ ‘ಕಡ್ಡಾಯ ಉದ್ಯೋಗ’ ಎಂದು ವಿಧೇಯಕದಲ್ಲಿ ಸೇರಿಸಿದರೆ ನ್ಯಾಯಾಲಯದಲ್ಲಿ ಬಿದ್ದುಹೋಗುವ ಅಪಾಯ ಇರುವುದರಿಂದ ‘ಆದ್ಯತೆ’ ಎಂದು ಸೇರಿಸಲಾಗಿದೆ ಎಂದು ಮೂಲಗಳು ಖಚಿತಪಡಿಸಿವೆ.

ಏನಿರುತ್ತದೆ ಶಿಕ್ಷೆ?: ಕನ್ನಡಿಗರಿಗೆ ಉದ್ಯೋಗ ನೀಡದವರಿಗೆ ಸೌಲಭ್ಯ ಬಂದ್ ಮಾಡುವ ಅಥವಾ ದಂಡ ಹಾಕುವ ಬಗ್ಗೆಯೂ ಚರ್ಚೆ ನಡೆದಿದೆ. ಸಚಿವ ಜಗದೀಶ ಶೆಟ್ಟರ್ ಜತೆ ನಡೆಯುವ ಸಭೆಯಲ್ಲಿ ಈ ವಿಚಾರ ಅಂತಿಮವಾಗಲಿದೆ. ಏಕೆಂದರೆ ಹೂಡಿಕೆಗಳು ಬರದಿದ್ದರೆ ಎಂಬ ಭಯವೂ ಇದೆ. ಆಂಧ್ರಪ್ರದೇಶದಲ್ಲಿ ನಿಯಮ ಮೀರಿದವರಿಗೆ ದಂಡ ವಿಧಿಸಲಾಗುತ್ತದೆ.

https://www.vijayavani.net/modi-didnt-accept-tea-in-9-hour-questioning/