ತಾಳ್ಮೆ, ಅಹಂ, ಶಕ್ತಿಯ ಸಂದೇಶ: ಥ್ರಿಲ್ಲಿಂಗ್​ ಅಂಶದೊಂದಿಗೆ ಬೆಕ್ಕಸ ಬೆರಗು ಮೂಡಿಸುತ್ತೆ ತ್ರಿಕೋನ ಟ್ರೇಲರ್​

ಬೆಂಗಳೂರು: ಚಂದ್ರಕಾಂತ್​ ನಿರ್ದೇಶನದ “ತ್ರಿಕೋನ’ ಚಿತ್ರದ ಟ್ರೇಲರ್​ ಇಂದು (ಮಾ.25) ಬಿಡುಗಡೆಯಾಗಿದೆ. ಜೀವನದ ಸಂದೇಶದ ಜತೆಗೆ ಮಿಸ್ಟರಿ, ಥ್ರಿಲ್ಲರ್ ಅಂಶವಿರುವ ಚಿತ್ರದ ಟ್ರೇಲರ್​ ಭರವಸೆ ಮೂಡಿಸಿದೆ.

ಶಕ್ತಿ ಇದ್ದ ಕಡೆ ಕೋಪ, ವಿದ್ಯ ಇದ್ದ ಕಡೆ ಅಹಂ ಮತ್ತು ಅನುಭವ ಇದ್ದ ಕಡೆ ತಾಳ್ಮೆ ಎಂಬ ಸಂದೇಶವುಳ್ಳ ಡೈಲಾಗ್​ನೊಂದಿಗೆ ಟ್ರೇಲರ್​ ಆರಂಭವಾಗುತ್ತದೆ. ಇಡೀ ಟ್ರೇಲರ್​ನಲ್ಲಿ ನಿಗೂಢತೆ ಆವರಿಸಿದ್ದು, ಹಿನ್ನಲೆ ಧ್ವನಿ ಪ್ರೇಕ್ಷರನ್ನು ಸೆಳೆಯುತ್ತದೆ. 2.32 ನಿಮಿಷದ ಟ್ರೇಲರ್​ನಲ್ಲೇ ಪ್ರೇಕ್ಷಕರನ್ನು ಸೆಳೆಯುವಂತಹ ಅಂಶಗಳಿದ್ದು, ಇಡೀ ಚಿತ್ರ ಅದ್ಭುತವಾಗಿ ಮೂಡಿಬಂದಿರುವುದಾಗಿ ಸುಳಿವು ನೀಡಿದೆ. A2 ಮ್ಯೂಸಿಕ್​ ಚಾನೆಲ್​ನಲ್ಲಿ ಟ್ರೇಲರ್​ ಬಿಡುಗಡೆಯಾಗಿದ್ದು, ಅದ್ಭುತ ಪ್ರತಿಕ್ರಿಯೆ ಪಡೆದುಕೊಳ್ಳುತ್ತಿದೆ.

ತ್ರಿಕೋನ ಚಿತ್ರ ಏ.1ರಂದು ಬಿಡುಗಡೆಯಾಗುತ್ತಿದೆ. ಈ ಚಿತ್ರವು ರಾಜ್ಯಾದ್ಯಂತ 200ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ. ಚಿತ್ರದ ಕುರಿತು ಈಗಾಗಲೇ ಮಾತನಾಡಿರುವ ಚಂದ್ರಕಾಂತ್​, ‘ಮೂರು ವಿಭಿನ್ನ ತಲೆಮಾರು ಮತ್ತು ವಯೋಮಾನದ ಜನರ ಮೂಲಕ ಈ ಕಥೆ ಹೇಳುತ್ತಿದ್ದೇವೆ. ಒಂದು ನಟನೆಯನ್ನು ಈ ಮೂರು ತಲಮಾರಿನವರು ಹೇಗೆ ಎದುರಿಸುತ್ತಾರೆ ಮತ್ತು ಒಂದು ಸಮಸ್ಯೆಯನ್ನು ತಾಳ್ಮೆ, ಅಹಂ ಮತ್ತು ಶಕ್ತಿಯಿಂದ ಎದುರಿಸಿದಾಗ ಏನೆಲ್ಲ ಆಗುತ್ತದೆ ಎಂದು ಹೇಳುವ ಪ್ರಯತ್ನ ಇದು’ ಎನ್ನುತ್ತಾರೆ ಚಂದ್ರಕಾಂತ್​.

ಈ ಚಿತ್ರದಲ್ಲಿ ಸುರೇಶ್​ ಹೆಬ್ಳೀಕರ್​, ಲಕ್ಷ್ಮೀ, ಅಚ್ಯುತ್​ ಕುಮಾರ್​, ಸುಧಾರಾಣಿ, ರಾಜವೀರ್​, ಮಾರುತೇಶ್, ಸಾಧು ಕೋಕಿಲ​ ಮುಂತಾದವರು ನಟಿಸಿದ್ದಾರೆ. ಸಾಧು ಕೋಕಿಲ ಒಂದು ವಿಶೇಷ ಪಾತ್ರದಲ್ಲಿ ನಗಿಸಲಿದ್ದಾರೆ. ಇದಕ್ಕೂ ಮುನ್ನ ‘ಪೆರೋಲ್​’, ‘ಬರ್ಫಿ’ ಮತ್ತು ‘ಅಮೃತವಾಣಿ’ ಚಿತ್ರಗಳನ್ನು ನಿರ್ಮಿಸಿದ್ದ ರಾಜಶೇಖರ್​ ಈ ಚಿತ್ರಕ್ಕೆ ಕಥೆ ಬರೆಯುವುದರ ಜತೆಗೆ ನಿರ್ದೇಶಿಸಿದ್ದಾರೆ.

ಈಗಾಗಲೇ ‘ತಗ್ಗಿ ನಡಿ ಸುಮ್ಮನೆ …’, ‘ಗುಡಿಯಲ್ಲಿರೋ ದೇವ …’ ಮುಂತಾದ ಲಿರಿಕಲ್​ ವಿಡಿಯೋಗಳ ಜತೆಗೆ, ಟೀಸರ್​ ಸಹ ಬಿಡುಗಡೆಯಾಗಿದೆ. ಚಿತ್ರಕ್ಕೆ ಸುರೇಂದ್ರನಾಥ್​ ಸಂಗೀತ ಮತ್ತು ಶ್ರೀನಿವಾಸ್​ ವಿನ್ನಕೋಟ ಛಾಯಾಗ್ರಹಣವಿದೆ.