ವಿಮಾನ ಪತನ ಮಾಡೋದಾಗಿ ಪೈಲಟ್​ ಬೆದರಿಕೆ: ಸ್ಥಳದಲ್ಲೇ ಗಿರಕಿ ಹೊಡೆಯುತ್ತಿರುವ ವಿಮಾನ, ಹೈ ಅಲರ್ಟ್​ ಘೋಷಣೆ

ನ್ಯೂಯಾರ್ಕ್​: ನಗರ ಪ್ರದೇಶದಲ್ಲೇ ವಿಮಾನ ಪತನ ಮಾಡುವುದಾಗಿ ಪೈಲಟ್​ ಓರ್ವ ಬೆದರಿಕೆ ಹಾಕಿದ ಘಟನೆ ಅಮೆರಿಕದಲ್ಲಿ ನಡೆದಿದೆ. ಪೈಲಟ್​ ಬೆದರಿಕೆಯಿಂದ ಕೆಲ ಕಾಲ ಯುಎಸ್ ನಗರದಲ್ಲಿ ಆತಂಕದ ವಾತಾವರಣ ಉಂಟಾಗಿತ್ತು. ಅಲ್ಲದೆ, ಮುನ್ನೆಚ್ಚರಿಕಾ ಕ್ರಮವಾಗಿ ಬೆದರಿಕೆ ಹಾಕಿದ ಪ್ರದೇಶದಿಂದ ಜನರನ್ನು ಸ್ಥಳಂತಾರ ಸಹ ಮಾಡಲಾಗಿತ್ತು.

ಅಂದಹಾಗೆ ಈ ಘಟನೆ ಯುನೈಟೆಡ್​ ಸ್ಟೇಟ್ಸ್​ನ ಈಶಾನ್ಯ ಮಿಸ್ಸಿಸ್ಸಿಪಿಯಲ್ಲಿರುವ ತುಪೆಲೊ ನಗರದಲ್ಲಿ ನಡೆದಿದೆ. ನಗರದ ಪಶ್ಚಿಮ ಭಾಗದಲ್ಲಿರುವ ವಾಲ್​ಮಾರ್ಟ್​ಗೆ ವಿಮಾನ ಪತನ ಮಾಡುವುದಾಗಿ ಪೈಲಟ್​ ಬೆದರಿಕೆ ಹಾಕಿದ್ದ. ಇದರ ಬೆನ್ನಲ್ಲೇ ಮಾರ್ಟ್​ನಲ್ಲಿದ್ದ ಜನರನ್ನು ಸುರಕ್ಷಿತವಾಗಿ ಬೇರೆಡೆ ಸ್ಥಳಾಂತರ ಮಾಡಲಾಯಿತು ಎಂದು ಸ್ಥಳೀಯ ಪೊಲೀಸ್​ ಇಲಾಖೆ ತನ್ನ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದೆ.

ಪೈಲಟ್​ ಜೊತೆ ಪೊಲೀಸ್​ ಅಧಿಕಾರಿಗಳು ನೇರವಾಗಿ ಮಾತುಕತೆ ಆರಂಭಿಸಿದ್ದು, ಆತನ ಮನವೊಲಿಕೆಗೆ ಮುಂದಾಗಿದೆ ಎಂದು ತಿಳಿದುಬಂದಿದೆ. ಮತ್ತೊಂದು ಸೂಚನೆ ಬರುವವರೆಗೂ ಬೆದರಿಕೆ ಪ್ರದೇಶವನ್ನು ನಿರ್ಲಕ್ಷಿಸುವಂತೆ ನಾಗರಿಕರ ಬಳಿ ಪೊಲೀಸ್​ ಇಲಾಖೆ ಮನವಿ ಮಾಡಿದೆ. ಟುಪೆಲೋ ಪೊಲೀಸ್ ಇಲಾಖೆ ಜನರನ್ನು ಚದುರಿಸಲು ಕೇಳಿದ್ದು, ಎಲ್ಲಾ ತುರ್ತು ಸೇವೆಗಳನ್ನು ಅಲರ್ಟ್ ಮಾಡಲಾಗಿದೆ ಎಂದು ಹೇಳಿದೆ. ಸದ್ಯ ಸ್ಥಳದಲ್ಲಿ ಹೈ ಅಲರ್ಟ್​ ಘೋಷಿಸಲಾಗಿದೆ.

ಎರಡು ಇಂಜಿನ್​ ಸಾಮರ್ಥ್ಯದ 9 ಆಸನ ವ್ಯವಸ್ಥೆ ಇರುವ ಬೀಚ್​ಕ್ರಾಫ್ಟ್​ ಕಿಂಗ್​ ಏರ್​ 90 ಹೆಸರಿನ ಸಣ್ಣ ವಿಮಾನವನ್ನು ತೆಗೆದುಕೊಂಡು ಹೋಗಿರುವ ಪೈಲಟ್​, ಆಗಸದಲ್ಲೇ ಒಂದು ಗಂಟೆಗೂ ಅಧಿಕ ಸಮಯದಿಂದ ಗಿರಕಿ ಹೊಡೆಯುತ್ತಿದ್ದು, ಸ್ಥಳದಲ್ಲಿ ಆತಂಕದ ವಾತಾವರಣ ಮೂಡಿದೆ. ರಾಜ್ಯದ ಕಾನೂನು ಜಾರಿ ನಿರ್ದೇಶನಾಲಯ ಮತ್ತು ತುರ್ತು ಇಲಾಖೆ ಬಹಳ ಹತ್ತಿರದಿಂದ ಪರಿಸ್ಥಿತಿಯನ್ನು ನಿಭಾಯಿಸುತ್ತಿದೆ. (ಏಜೆನ್ಸೀಸ್​)

https://www.vijayavani.net/how-do-i-know-if-i-have-a-kidney-stone-kidney-stones-symptoms-causes-types-and-treatment/

https://www.vijayavani.net/r-wanted-pics-of-modi-ji-here-kcr-partys-price-jibe-on-union-ministers-demand-in-telangana/

https://www.vijayavani.net/r-aunty-dancing-to-haryanvi-song-falls-on-little-boy-watch-what-happens-next/