ಬೀದಿ ಬೀದಿಯಲ್ಲಿ ಹೆಣ...ಹುಡುಗಿಯರ ಅಪಹರಣ! ತಾಲಿಬಾನಿಗಳ ಅಟ್ಟಹಾಸ ಬಿಚ್ಚಿಟ್ಟ ಆಫ್ಘನ್ನರು

ಕಾಬೂಲ್​: ಆಫ್ಘಾನಿಸ್ತಾನದಲ್ಲಿ ತಾಲಿಬಾನ್​ ಮತ್ತು ಆಫ್ಘಾನ್ ಸರ್ಕಾರ ಹಾಗೂ​ ಸೇನಾಪಡೆಗಳ ನಡುವೆ ಸಂಘರ್ಷ ಮುಂದುವರಿದಿದೆ. ಈಗಾಗಲೇ ತಾಲಿಬಾನ್​, ಆಫ್ಘಾನ್​ನ ಅನೇಕ ಪ್ರದೇಶಗಳನ್ನು ಆಕ್ರಮಿಸಿದ್ದು, ಎರಡು ಕಡೆಯಿಂದ ಆರೋಪ-ಪ್ರತ್ಯಾರೋಪಗಳ ಸರಣಿ ಮುಂದುವರಿದಿದ್ದು, ತಾಲಿಬಾನಿಗಳ ಅಟ್ಟಹಾಸ ಕತೆಯನ್ನು ಆಫ್ಘನ್ನರು ಎಳೆ ಎಳೆಯಾಗಿ ಬಿಚ್ಚಿಟ್ಟಿದ್ದಾರೆ.

ತಾಲಿಬಾನ್​ ಆಕ್ರಮಿತ ಉತ್ತರ ಆಫ್ಘಾನ್​ ನಗರಗಳಿಂದ ಸಾವಿರಾರು ಆಫ್ಘನ್ನರು ಫಲಾಯನ ಮಾಡಿದ್ದಾರೆ. ಓಡಿಹೋದವರು ತಾಲಿಬಾನಿಗಳ ಕ್ರೂರ ವರ್ತನೆಯ ಬಗ್ಗೆ ಹೇಳುತ್ತಿದ್ದಾರೆ. ಮೃತದೇಹಗಳು ರಸ್ತೆಯಲ್ಲೇ ಬಿದ್ದಿವೆ, ತಮ್ಮ ಕಾಮತೃಷೆಗೆ ಹುಡುಗಿಯರನ್ನು ತಾಲಿಬಾನಿಗಳು ಅಪಹರಿಸುತ್ತಿದ್ದಾರೆ ಮತ್ತು ಯುವಕರು ಗುಂಪು-ಗುಂಪಾಗಿ ಹೋರಾಡುತ್ತಿದ್ದಾರೆ ಎಂದು ಆಫ್ಘಾನ್ನರು ಹೇಳಿದ್ದಾರೆ.

ತಾಲಿಬಾನಿಗಳ ಅಟ್ಟಹಾಸ ಸಹಿಸದೇ ಅನೇಕರು ಕಳೆದ ವಾರವಷ್ಟೇ ಕಾಬೂಲ್​ಗೆ ಆಗಮಿಸಿದ್ದಾರೆ. ಅವರು ತಾಲಿಬಾನಿಗಳ ಕರಾಳತೆಯನ್ನು ಬಿಚ್ಚಿಟ್ಟಿದ್ದಾರೆ. ಜೈಲಿನ ಬಳಿ ಮೃತದೇಹಗಳನ್ನು ಬಿದ್ದಿರುವುದನ್ನು ನೋಡಿದ್ದೇವೆ. ಮೃತದೇಹಗಳ ಮಧ್ಯೆಯೇ ನಾಯಿಗಳು ಸಹ ಸತ್ತುಬಿದ್ದಿದ್ದವು ಎಂದು 36 ವರ್ಷದ ವಿಧವೆ ಫ್ರಿಬಾ ಎಂಬಾಕೆ ತಾಲಿಬಾನಿಗಳ ಕ್ರೂರ ಮುಖವಾಡವನ್ನು ಕಳಚಿದ್ದಾರೆ. ಆಕೆ ತನ್ನ ಆರು ಮಕ್ಕಳೊಂದಿಗೆ ತಾಲಿಬಾನ್​ ಆಕ್ರಮಿತ ನಗರವನ್ನು ಬಿಟ್ಟು ಕಾಬೂಲ್​ಗೆ ಬಂದಿದ್ದಾಳೆ.

ಹೀಗೆ ಅನೇಕ ಮಂದಿ ತಮಗಾದ ನೋವನ್ನು ಹೊರಹಾಕಿದ್ದಾರೆ. ಆಫ್ಘಾನ್​ ಸರ್ಕಾರದ ಪರವಾಗಿ ಕೆಲಸ ಮಾಡುತ್ತಿರುವವರನ್ನು ತಾಲಿಬಾನಿಗಳು ಗುಂಡಿಟ್ಟು ಕೊಲ್ಲುತ್ತಿದ್ದಾರೆ. ನನ್ನ ಮಗನ ತಲೆಯನ್ನು ಕುರಿ ಕಡಿಯುವ ಹಾಗೇ ಕಡಿದು ನನ್ನ ಮುಂದೆಯೇ ಬೀಸಾಡಿದರು ಎಂದು ತಾಲಿಬಾನ್​ ಆಕ್ರಮಿತ ಕುಂದ್ಜ್​ನಿಂದ ಬಂದ ವ್ಯಕ್ತಿ ಅಬ್ದುಲ್​ಮನನ್​ ಬಿಚ್ಚಿಟ್ಟಿದ್ದಾರೆ.

ದಿನನಿತ್ಯವೂ ತಾಲಿಬಾನಿಗಳ ದೌರ್ಜನ್ಯ ಮುಂದುವರಿದಿದೆ. ತಾಲಿಬಾನ್​ ಹೋರಾಟಗಾರನನ್ನು ಬಲವಂತವಾಗಿ ಮದುವೆ ಆಗುವಂತೆ ಒತ್ತಾಯಿಸಿದ್ದಕ್ಕೆ 25 ವರ್ಷ ವಿಧವೆ ಮಾರ್ವಾ ಎಂಬಾಕೆ ಅಲ್ಲಿಂದ ತಪ್ಪಿಸಿಕೊಂಡು ಕಾಬೂಲ್​ ಸೇರಿದ್ದಾಳೆ. ಆಕೆಯ 16 ವರ್ಷ ಸೋದರಸಂಬಂಧಿಯನ್ನು ಬಲವಂತವಾಗಿ ಕರೆದೊಯ್ದು ಮದುವೆ ಮಾಡಲಾಗಿದೆ ಎಂದು ತಿಳಿಸಿದ್ದಾಳೆ. ಅನೇಕ ಹುಡುಗಿಯರನ್ನು ಅಪಹರಣ ಮಾಡಲಾಗುತ್ತಿದೆ ಎಂದು ತಾಲಿಬಾನ್​ ವಿರುದ್ಧ ಆರೋಪ ಮಾಡಲಾಗಿದೆ.

ಏನಿದು ಸಂಘರ್ಷ?

ಆಫ್ಘಾನ್​ ವಲಯದಿಂದ ಅಮೆರಿಕ ತನ್ನ ಸೇನೆಯನ್ನು ಹಿಂತೆಗೆದುಕೊಂಡ ಬಳಿಕ ತಾಲಿಬಾನ್​ ಮತ್ತು ಆಫ್ಘಾನ್​ ಸರ್ಕಾರದ ನಡುವೆ ಸಂಘರ್ಷ ತಾರಕಕ್ಕೇರಿದೆ. ಕಳೆದ ಕೆಲವು ತಿಂಗಳುಗಳಿಂದ, ಯುದ್ಧ ಪೀಡಿತ ದೇಶದಲ್ಲಿ ತಾಲಿಬಾನ್ ತನ್ನ ಪ್ರಭಾವವನ್ನು ವಿಸ್ತರಿಸುತ್ತಿದೆ. ಇದೇ ಸಂದರ್ಭದಲ್ಲಿ ಭಾರತೀಯ ಆಸ್ತಿಗಳನ್ನು ಟಾರ್ಗೆಟ್​ ಮಾಡಲು ಪಾಕಿಸ್ತಾನವು ತಾಲಿಬಾನ್​ಗೆ ಸಹಕಾರ ನೀಡುತ್ತಿರುವ ಆರೋಪವು ಕೇಳಿಬಂದಿದೆ. ತೀವ್ರ ಘರ್ಷಣೆ ಹಿನ್ನೆಲೆಯಲ್ಲಿ ಜುಲೈ 11 ರಂದು ಕಂದಹಾರ್‌ನ ಕಾನ್ಸುಲೇಟ್‌ನಿಂದ ಭಾರತೀಯ ಸಿಬ್ಬಂದಿಯನ್ನು ಸ್ಥಳಾಂತರಿಸಿ ಮತ್ತೆ ಭಾರತಕ್ಕೆ ಕರೆತರಲಾಯಿತು. ಗುಪ್ತಚರ ವರದಿಗಳು ಕಂದಹಾರ್ ಮತ್ತು ಮಜಾರ್-ಎ-ಶೇರ್ಫ್‌ನಲ್ಲಿರುವ ಭಾರತೀಯ ದೂತಾವಾಸಗಳಿಗೆ ಬೆದರಿಕೆ ಹೆಚ್ಚಾಗಿದೆ ಎಂದು ಸೂಚಿಸಿದೆ. (ಏಜೆನ್ಸೀಸ್​)

https://www.vijayavani.net/r-jaipur-family-court-grants-divorce-to-ias-toppers-tina-dabi-athar-khan/

https://www.vijayavani.net/feedback-from-voters-efforts-to-know-the-minds-of-the-people-before-the-five-state-election/

https://www.vijayavani.net/continued-bickering-of-opposition-parties-in-rajya-sabha/