ರಿಪ್ಪನ್ಪೇಟೆ: ವಿದ್ಯಾರ್ಥಿಗಳಿಗೆ ಗುಣಮಟ್ಟದ ಶಿಕ್ಷಣ ನೀಡುವುದರಿಂದ ಭವಿಷ್ಯ ಉಜ್ವಲವಾಗಲಿದೆ ಎಂದು ಹೊಂಬುಜ ಜೈನಮಠದ ಶ್ರೀ ದೇವೇಂದ್ರಕೀರ್ತಿ ಭಟ್ಟಾರಕ ಸ್ವಾಮೀಜಿ ಹೇಳಿದರು. ಹೊಂಬುಜ ಜೈನಮಠದಲ್ಲಿ ಗುರುವಾರ ನವೋದಯ, ಮೊರಾರ್ಜಿ, ಏಕಲವ್ಯ ಶಾಲೆಗಳಿಗೆ ಆಯ್ಕೆಯಾದ ಮಕ್ಕಳು ಹಾಗೂ ತರಬೇತಿ ನೀಡಿದ ಶಿಕ್ಷಕ ವೃಂದಕ್ಕೆ ಅಭಿನಂದನೆ ಸಲ್ಲಿಸಿ ಮಾತನಾಡಿದರು. ಗ್ರಾಮೀಣ ಪ್ರದೇಶದ ಮಕ್ಕಳಿಗೆ ಮೌಲ್ಯಯುತ ಶಿಕ್ಷಣದ ಕೊರತೆಯಿದೆ. ಅಂತಹ ಕೊರತೆಯನ್ನು ನೀಗಿಸಿ, ರಾಜ್ಯದ ಪ್ರತಿಷ್ಠಿತ ಮೊರಾರ್ಜಿ, ಏಕಲವ್ಯ, ನವೋದಯ ಶಾಲೆಗಳಿಗೆ ದಾಖಲಾಗಲು ಪೂರ್ವ ತಯಾರಿ, ತರಬೇತಿ ನೀಡುತ್ತಿರುವ ಹಳೇ ನವೋದಯ ವಿದ್ಯಾರ್ಥಿಗಳ ಮಿಲನ ಅಸೋಸಿಯೇಶನ್ ಮತ್ತು ಹುಂಚ ಯುವ ಬಳಗದ ಕಾರ್ಯ ಶ್ಲಾಘನೀಯ. ಕಳೆದ ನಾಲ್ಕೈದು ವರ್ಷಗಳಿಂದ ಗ್ರಾಮೀಣ ಭಾಗದ ಮಕ್ಕಳನ್ನು ತರಬೇತಿಗೊಳಿಸುತ್ತಿದ್ದಾರೆ. ಸಂಸ್ಥೆಯ ಕಾರ್ಯ ಉತ್ತರೋತ್ತರವಾಗಿ ಬೆಳೆಯಲಿ ಎಂದು ಆಶಿಸಿದರು. ಸಂಸ್ಥೆಯ ಸಂಸ್ಥಾಪಕ ಪ್ರಕಾಶ್ ಜೋಯ್ಸ, ಶಿಬಿರದ ಶಿಕ್ಷಕರು ಇದ್ದರು.
