ಸರ್ಕಾರಿ ಸಿಬ್ಬಂದಿಗೆ ನಡತೆ ಚೌಕಟ್ಟು ಪ್ರಕಟ

ಬೆಂಗಳೂರು: ಬಡ್ಡಿ, ಸಟ್ಟಾ (ಷೇರು, ಸೆಕ್ಯುರಿಟಿ ವಗೈರೆ) ವ್ಯವಹಾರಕ್ಕೆ ಆಸ್ಪದವಿಲ್ಲ. ಪ್ರತಿ ವರ್ಷ ಕುಟುಂಬ ಸದಸ್ಯರ ಸಹಿತ ಚರ-ಸ್ಥಿರಾಸ್ತಿ ವಿವರ ಸಲ್ಲಿಕೆ. ಕರ್ತವ್ಯಕ್ಕೆ ಗೈರಾಗಿ ಮುಷ್ಕರ ಹೂಡುವಂತಿಲ್ಲ. ಇವು, ಸರ್ಕಾರಿ ಸಿಬ್ಬಂದಿಗೆ ಅಳವಡಿಸಲು ಉದ್ದೇಶಿತ ನಡತೆ ಚೌಕಟ್ಟಿನ ಪ್ರಮುಖಾಂಶಗಳು.

ಆಡಳಿತ ವ್ಯವಸ್ಥೆಯಲ್ಲಿ ಸುಧಾರಣೆ, ಅಧಿಕಾರಿಗಳು ಮತ್ತು ಸಿಬ್ಬಂದಿ ವರ್ಗದ ಕಾರ್ಯಕ್ಷಮತೆ ಹೆಚ್ಚಳ, ಜನಸ್ನೇಹಿ ಕರ್ತವ್ಯ ನಿರ್ವಹಣೆ, ಪಾರದರ್ಶಕತೆ ಇತ್ಯಾದಿ ಕ್ರಮಗಳಿಗೆ ಅನುವು ಮಾಡಿಕೊಡಲೆಂದು ನಿಯಮಾವಳಿಗಳ ಕರಡು ಪ್ರಕಟಿಸಲಾಗಿದೆ.

ಕರ್ನಾಟಕ ರಾಜ್ಯ ನಾಗರಿಕ ಸೇವಾ (ನಡತೆ) ನಿಯಮಗಳು, 2020ರ ಕರಡನ್ನು ಸಿಬ್ಬಂದಿ ಮತ್ತು ಆಡಳಿತ ಸುಧಾರಣಾ ಇಲಾಖೆಯಿಂದ ಮಂಗಳವಾರ ಅಧಿಸೂಚನೆ ಹೊರಡಿಸಲಾಗಿದೆ. ಹಾಗೆಯೇ ಇಲಾಖೆ ಕಾರ್ಯದರ್ಶಿಗೆ ಸಲಹೆ ಮತ್ತು ಆಕ್ಷೇಪಣೆಗಳನ್ನು 15 ದಿನಗಳೊಳಗೆ ಸಲ್ಲಿಸಲು ಅವಕಾಶ ಕಲ್ಪಿಸಿದೆ.

ಕರಡಿಗೆ ಸಂಬಂಧಿಸಿದಂತೆ ಸಲಹೆ ಇಲ್ಲವೇ ಆಕ್ಷೇಪಣೆಗಳು ಸ್ವೀಕಾರ ಯೋಗ್ಯವಾದವುಗಳನ್ನು ಸರ್ಕಾರ ಪರಿಗಣಿಸಲಿದ್ದು, ನಿಗದಿತ ಗಡುವು ಮುಗಿದ ಬಳಿಕ ರಾಜ್ಯಪತ್ರದಲ್ಲಿ ಅಂತಿಮವಾಗಿ ಪ್ರಕಟಗೊಂಡ ದಿನಾಂಕದಿಂದ ಸೇವಾ ನಿಯಮಗಳು ಜಾರಿಗೆ ಬರಲಿವೆ.

ನಿಯಮಿಸಿದ ಪ್ರಾಧಿಕಾರಿ: ಪೂರ್ವಾನುಮತಿ ನೀಡಲು, ವರದಿ ಪಡೆಯಲು ಇತ್ಯಾದಿ ನಿಯಮಾನುಸಾರ ಕ್ರಮಗಳಿಗೆ ಪ್ರಾಧಿಕಾರಿಯನ್ನು ನೇಮಿಸಲಾಗುತ್ತದೆ. ನ್ಯಾಯಿಕ ಸೇವೆಗೆ ಸಂಬಂಧಿಸಿದ ವ್ಯಕ್ತಿಗೆ ಹೈಕೋರ್ಟ್ ನಿಯಮಿಸಿದ ಪ್ರಾಧಿಕಾರಿಯಾಗುತ್ತದೆ.

ಗ್ರೂಪ್ ಎ, ಗ್ರೂಪ್ ಬಿ ಯಲ್ಲಿ ತಹಸೀಲ್ದಾರ್ ದರ್ಜೆ-2 ಹೊಂದಿರುವ ಸಿಬ್ಬಂದಿಗೆ ಸರ್ಕಾರವೇ ನಿಯಮಿಸಿದ ಪ್ರಾಧಿಕಾರವಾಗಲಿದ್ದರೆ, ಗ್ರೂಪ್-ಬಿ, ಸಿ ಮತ್ತು ಡಿ ದರ್ಜೆಯ ನೌಕರರಿಗೆ ಆಯಾ ಇಲಾಖೆ ಮುಖ್ಯಸ್ಥರು ನಿಯಮಿಸಿದ ಪ್ರಾಧಿಕಾರಿಯಾಗಲಿದ್ದಾರೆ.

ಮುಖ್ಯಾಂಶಗಳು

• ತಾತ್ಕಾಲಿಕ, ಗುತ್ತಿಗೆ, ಕಾರ್ಯಭೃತ, ದಿನಗೂಲಿ ಸಿಬ್ಬಂದಿಗೆ ಈ ನಿಯಮಗಳು ಅನ್ವಯಿಸುವುದಿಲ್ಲ.
• ವೈದ್ಯರು, ವೈದ್ಯಕೀಯ ಅಧಿಕಾರಿಗಳು ಖಾಸಗಿಯಾಗಿ ನರ್ಸಿಂಗ್ ಹೋಮ್ ಆಸ್ಪತ್ರೆ, ರೋಗ ನಿರ್ಧಾರ ಪ್ರಯೋಗಾಲಯ, ಔಷಧಾಲಯ ನಡೆಸುವಂತಿಲ್ಲ. 
• ಸಾರ್ವಜನಿಕರೊಂದಿಗೆ ವ್ಯವಹರಿಸುವಾಗ ಉದ್ದೇಶಪೂರ್ವಕವಾಗಿ ವಿಳಂಬ ಮಾಡುವಂತಿಲ್ಲ.
• ಮೇಲಧಿಕಾರಿಯು ತನ್ನ ಅಧೀನ ಅಧಿಕಾರಿ/ಸಿಬ್ಬಂದಿಗೆ ಯಾವುದೆ ಪ್ರಸ್ತಾವನೆಯನ್ನು ಒಂದು ನಿರ್ದಿಷ್ಟ ಮಾದರಿಯಲ್ಲಿ ಮಂಡಿಸಲು ಆಜ್ಞಾಪಿಸುವಂತಿಲ್ಲ.
• ಕುಟುಂಬ ಸದಸ್ಯನಿಗೆ ಖಾಸಗಿ ಕಂಪನಿ ಉದ್ಯೋಗ ಕೊಡಿಸಲು ಪ್ರಭಾವಬೀರುವಂತಿಲ್ಲ.
• ದೇಶದ ಸಾರ್ವಭೌಮತ್ವ, ಅಖಂಡತೆ, ಸಾರ್ವಜನಿಕ ಸುವ್ಯವಸ್ಥೆಗೆ ಧಕ್ಕೆ ತರುವಂತಹ ಸಂಘ-ಸಂಸ್ಥೆಗಳಲ್ಲಿ ಸೇರಿಕೊಳ್ಳಬಾರದು.
• ನಿಯಮಿಸಿದ ಪ್ರಾಧಿಕಾರಿಯಿಂದ ಪೂರ್ವಾನುಮತಿಯಿಲ್ಲದೆ ಖಾಸಗಿ ವಿದೇಶ ಪ್ರವಾಸ ಕೈಗೊಳ್ಳುವಂತಿಲ್ಲ.
• ಸಕ್ಷಮ ಪ್ರಾಧಿಕಾರದ ಅನುಮತಿಯಿಲ್ಲದೆ ಸಿನಿಮಾ, ಧಾರಾವಾಹಿಗಳಲ್ಲಿ ನಟಿಸುವುದು ನಿಷಿದ್ಧ 
• ಪತಿ/ ಪತ್ನಿ ಜೀವಂತವಿರುವಾಗ 2ನೇ ಮದುವೆಯಾಗಕೂಡದು. ನಿಯಮಿಸಿದ ಪ್ರಾಧಿಕಾರಿಗೆ ಸಿಂಧು ಎಂದು ಮನವರಿಕೆಯಾದಲ್ಲಿ ಅನುಮತಿ ಕೊಡಬಹುದು.
• ಕರ್ನಾಟಕ, ಇತರ ರಾಜ್ಯ ಹಾಗೂ ಕೇಂದ್ರ ಸರ್ಕಾರಗಳ ನೀತಿ, ಕ್ರಮಗಳ ಕುರಿತು ವ್ಯತಿರಿಕ್ತ ಟೀಕೆ- ಟಿಪ್ಪಣೆ ಸಲ್ಲದು. ಮಾಹಿತಿ ಹಕ್ಕು ಕಾಯ್ದೆಯಡಿ ಸಲ್ಲಿಸಿದ ಅರ್ಜಿಗೆ ಮಾಹಿತಿ ಕೊಡಬಹುದು. ಆದರೆ, ನಿರ್ದಿಷ್ಟ ಸೂಚನೆಗಳಿಲ್ಲದ ಹೊರತು ಕಚೇರಿ ದಸ್ತಾವೇಜು, ರಹಸ್ಯ ದಾಖಲೆಗಳನ್ನು ಪ್ರತ್ಯಕ್ಷ, ಪರೋಕ್ಷವಾಗಿ ನೀಡುವಂತಿಲ್ಲ.