ಪಬ್​ಜಿ ಬ್ಯಾನ್​ ಆದ ಬೆನ್ನಲ್ಲೇ ಟ್ವಿಟರ್​ನಲ್ಲಿ ಹರಿದುಬಂದ ಮೀಮ್ಸ್​ ನೋಡಿದ್ರೆ ನೀವು ನಗದೇ ಇರಲಾರಿರಿ!

ನವದೆಹಲಿ: ಗಡಿಯಲ್ಲಿ ಮತ್ತೆ ಕ್ಯಾತೆ ತೆಗೆದಿರುವ ಕುತಂತ್ರಿ ಚೀನಾಗೆ ಭಾರತ ಸರ್ಕಾರ ಪಬ್​ಜಿ ಸೇರಿದಂತೆ 118 ಚೀನಾ ಆ್ಯಪ್​ಗಳನ್ನು ಬ್ಯಾನ್​ ಮಾಡಿ ಶಾಕ್​ ನೀಡಿದೆ. ಇದರ ಬೆನ್ನಲ್ಲೇ ಭಾರತೀಯ ಟ್ವಿಟರ್​ ಬಳಕೆದಾರರು ಅನೇಕ ಹಾಸ್ಯಾಸ್ಪದ ಮೀಮ್ಸ್​ಗಳ ಮೂಲಕ ಸರ್ಕಾರದ ಆದೇಶದ ಬಗ್ಗೆ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ.

ಪಬ್​ಜಿ ಬ್ಯಾನ್​ ಮಾಡಿದ್ದರಿಂದ ದೇಶದಲ್ಲಿ ಪಬ್​ಜಿ ಗೇಮ್​ಗೆ ದಾಸರಾಗಿದ್ದವರು ಮತ್ತು ಅವರ ಪಾಲಕರ ಪ್ರತಿಕ್ರಿಯೆ ಈಗ ಹೇಗಿರಬಹುದು ಎಂಬುದನ್ನು ಊಹಿಸಿ ಮೀಮ್ಸ್​ಗಳ ಮೂಲಕ ನೆಟ್ಟಿಗರು ವರ್ಣಿಸಿದ್ದು ಅದರ ಝಲಕ್​ ಅನ್ನು ನೀವಿಲ್ಲಿ ಕಾಣಬಹುದಾಗಿದೆ. ಅಚ್ಚರಿಯೆಂದರೆ ಪಬ್​ಜಿ ಬ್ಯಾನ್​ ಮಾಡಿದ ಬೆನ್ನಲ್ಲೇ ಟ್ವಿಟರ್​ನಲ್ಲಿ ನಂಬರ್​ ಒನ್​ ಟ್ರೆಂಡಿಂಗ್​ನಲ್ಲಿದೆ.

ದೇಶದ ಸಾರ್ವಭೌಮತ್ವ ಮತ್ತು ಸಮಗ್ರತೆ ಹಾಗೂ ಭಾರತದ ಸುರಕ್ಷತೆ ಮತ್ತು ಭದ್ರತಾ ದೃಷ್ಟಿಯಿಂದ ಪಬ್​ಜಿ ಸೇರಿದಂತೆ 118 ಆ್ಯಪ್​ಗಳನ್ನು ಬ್ಯಾನ್​ ಮಾಡಲಾಗಿದೆ ಎಂದು ಬುಧವಾರ ಸಂಜೆ ಕೇಂದ್ರ ಸರ್ಕಾರ ಆದೇಶ ಹೊರಡಿಸಿತು.

ಇದನ್ನೂ ಓದಿ: ವಧುವಿನ ಕೆನ್ನೆಗೆ ಚುಂಬಿಸುತ್ತಿರುವುದು ಮೌಲ್ವಿಯಲ್ಲ: ವೈರಲ್​ ವಿಡಿಯೋ ಹಿಂದಿನ ಸತ್ಯಾಂಶ ಇಲ್ಲಿದೆ!

ಈ ಬಗ್ಗೆ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ ಮಾಹಿತಿ ನೀಡಿ, ತಂತ್ರಜ್ಞಾನ ಕಾಯ್ದೆಯ ಸೆಕ್ಷನ್​ 69A ಅಡಿಯಲ್ಲಿ ಮೊಬೈಲ್​ ಗೇಮ್​ ಅನ್ನು ಬ್ಯಾನ್​ ಮಾಡಲಾಗಿದೆ. ದೇಶದ ಸಾರ್ವಭೌಮತ್ವ ಮತ್ತು ಸಮಗ್ರತೆ, ದೇಶದ ಸುರಕ್ಷತೆ ಹಾಗೂ ರಾಜ್ಯ ಮತ್ತು ಸಾರ್ವಜನಿಕ ಸುವ್ಯವಸ್ಥೆಯ ಭದ್ರತೆಯೆಡೆಗೆ ಈ ಗೇಮ್​ನಲ್ಲಿ ಪೂರ್ವಾಗ್ರಹ ಪೀಡಿತ ಚಟುವಟಿಕೆಗಳು ಇರುವುದರಿಂದ ಈ ಕ್ರಮವನ್ನು ತೆಗೆದುಕೊಳ್ಳಲಾಗಿದೆ ಎಂದು ಸರ್ಕಾರ ಹೇಳಿದೆ. ಕೋಟ್ಯಾಂತರ ಭಾರತೀಯ ಮೊಬೈಲ್​ ಮತ್ತು ಅಂತರ್ಜಾಲ ಬಳಕೆದಾರರ ಸುರಕ್ಷತೆ ಮತ್ತು ಹಿತಾಸಕ್ತಿಯ ದೃಷ್ಟಿಯಿಂದಲೂ ಕ್ರಮ ತೆಗೆದುಕೊಳ್ಳಲಾಗಿದೆ ಎಂದು ಸ್ಪಷ್ಟನೆ ನೀಡಿದೆ.

ಅಂದಹಾಗೆ ಬ್ಯಾನ್​ ಆಗಿರುವ ಪಬ್​ಜಿ ಗೇಮ್​ಗೆ ಭಾರತದಲ್ಲಿ 33 ಮಿಲಿಯನ್​ ಬಳಕೆದಾರರು ಇದ್ದರು. ಅಲ್ಲದೆ, ಇದರಿಂದ ಭಾರಿ ಮೊತ್ತದ ಆದಾಯವೂ ಸಹ ಚೀನಾಗೆ ಹರಿದು ಹೋಗುತ್ತಿತ್ತು. ಇದೀಗ ಲಡಾಖ್​ ಗಡಿಯಲ್ಲಿ ಚೀನಾ ಮತ್ತೆ ತನ್ನ ಕ್ಯಾತೆ ತೆಗೆದಿರುವುದರಿಂದ ಸರ್ಕಾರ ಸರಿಯಾದ ತಿರುಗೇಟು ನೀಡಿದೆ. ಈ ಮುಂಚೆಯೂ ಟಿಕ್​ಟಾಕ್​ ಸೇರಿದಂತೆ ಅನೇಕ ಚೀನಾ ಆ್ಯಪ್​ಗಳನ್ನು ಸರ್ಕಾರ ಬ್ಯಾನ್​ ಮಾಡಿದೆ. (ಏಜೆನ್ಸೀಸ್​)

https://www.vijayavani.net/pubg-mobile-among-118-additional-chinese-apps-banned-by-government/