ಸಚಿವ ಕೆ.ಎಸ್.ಈಶ್ವರಪ್ಪ ಇದೇ ವಿಚಾರವಾಗಿ ಪ್ರತಿಕ್ರಿಯಿಸಿ, ಸರ್ಕಾರದ ಮಂತ್ರಿಯಾಗಿ ಈ ನಿರ್ಧಾರವನ್ನು ಸ್ವಾಗತಿಸುತ್ತೇನೆ. ಸಮಾಜದಲ್ಲಿ ಸಾಕಷ್ಟು ಚರ್ಚೆಯಾಗುತ್ತಿದೆ. ಕೆಲವರು ಸ್ವಾಗತಿಸಿದ್ದಾರೆ, ಕೆಲವರು ಟೀಕಿಸುತ್ತಿದ್ದಾರೆ. ವೀರಶೈವ ಲಿಂಗಾಯತ ನಿಗಮ ಕುರಿತು ಉದ್ಯಮಿ ವಿಜಯ ಸಂಕೇಶ್ವರ ಅವರು ಆಕ್ಷೇಪಿಸಿದ್ದಾರೆ. ಸರಿ-ತಪ್ಪು ಚರ್ಚೆ ನಡೆಯುತ್ತಿದೆ. ನಡೆಯಲಿ. ಮರಾಠ ನಿಗಮದ ಬೇಡಿಕೆ ಬಹಳ ದಿನದ್ದು, ಈಡೇರಿಸಲಾಗಿದೆ ಎಂದು ಹೇಳಿದರು. ಕುರುಬ ನಿಗಮ ಅಗತ್ಯವಿದೆಯೇ ಎಂದರೆ, ನಿಗಮದಿಂದ ಒಳಿತಾಗುತ್ತದೆ ಎಂಬ ನಂಬಿಕೆ ಇಲ್ಲ ಎಂದೇ ಹೇಳುತ್ತೇನೆ ಎಂದ ಈಶ್ವರಪ್ಪ, ಕಲಬುರಗಿ, ಬೀದರ್, ಯಾದಗಿರಿ ಜಿಲ್ಲೆ ವ್ಯಾಪ್ತಿಯಲ್ಲಿ ಗೊಂಡ ಎಂದು ಕರೆಸಿಕೊಳ್ಳುವ ಕುರುಬ ಸಮಾಜದವರಿಗೆ ಎಸ್ಟಿ ಮಾನ್ಯತೆ ಕೊಡುತ್ತಿದ್ದಾರೆ. ಉಳಿದ ಕಡೆ ಇದು ಸಿಗುತ್ತಿಲ್ಲ. ಎಲ್ಲ ಕಡೆಯೂ ಮಾನ್ಯತೆ ಸಿಗಬೇಕೆಂದು ಏಕತೆಯಿಂದ ಹೋರಾಟ ನಡೆಸುತ್ತಿದ್ದೇವೆ ಎಂದು ವಿವರಿಸಿದರು.
