ಬೆಂಗಳೂರು: ಸಾಮಾನ್ಯವಾಗಿ ಒಂದು ಸಿನಿಮಾ ಎಂದರೆ ಎರಡೂವರೆಯಿಂದ ಮೂರು ತಾಸುಗಳ ಅವಧಿ ಇರುವುದು ಸದ್ಯದ ಅಲಿಖಿತ ನಿಯಮವಾಗಿದೆ. ಈ ಮಧ್ಯೆ, ಕೇವಲ 95 ನಿಮಿಷಗಳಲ್ಲಿಯೇ ಇಡೀ ಕಥೆ ಹೇಳಿ ಮುಗಿಸಬಹುದು ಎಂಬುದನ್ನು ನಿರೂಪಿಸಲು ಹೊರಟಿದೆ ‘ಪ್ರಕರಣ ತನಿಖಾ ಹಂತದಲ್ಲಿದೆ’ ಚಿತ್ರತಂಡ. ನಿರ್ದೇಶಕ ಸುಂದರ್ ಎಸ್.ಮೊದಲ ಬಾರಿಗೆ ಆ್ಯಕ್ಷನ್-ಕಟ್ ಹೇಳಿರುವ ಈ ಕ್ರೈಂ ಜಾನರ್ ಚಿತ್ರ ನಾಳೆ ಬಿಡುಗಡೆಯಾಗಲಿದೆ. ಚಿತ್ರದ ಅವಧಿ ಹಾಗೂ ಟ್ರೇಲರ್ ಮೂಲಕ ಕುತೂಹಲ ಮೂಡಿಸಿದ್ದು, ಈ ಬಗ್ಗೆ ಸುಂದರ್, ‘ಇದೊಂದು ಗಂಭೀರ ಕಥೆಯಾಗಿದ್ದು, ಯಾವುದೇ ಡ್ರಾಮಾ ಸೃಷ್ಟಿಸಲು ಹೋಗಿಲ್ಲ. ಸಿದ್ಧಸೂತ್ರಗಳಿಗೆ ಅಂಟಿಕೊಳ್ಳದೆ ಇರುವ ಕಥೆಯನ್ನೇ ನೇರವಾಗಿ ಹೇಳಿದ್ದೇವೆ. ಹಾಸ್ಯ, ಡಾನ್ಸ್, ಡ್ಯುಯೆಟ್ ಯಾವುದನ್ನು ಈ ಕಥೆ ಕೇಳುವುದಿಲ್ಲ. ಹಾಗಾಗಿ ಈ ಕಥೆಯನ್ನು ಕೇವಲ 95 ನಿಮಿಷಗಳಲ್ಲಿ ಹೇಳಿ ಮುಗಿಸಿದ್ದೇವೆ. ಈ ಕಥೆಗೆ ಇಷ್ಟೇ ಅವಧಿ ಸಾಕು ಎನಿಸಿತು’ ಎಂದು ಮಾಹಿತಿ ನೀಡುತ್ತಾರೆ.
