ವಿದ್ಯುತ್ ಶಾಕ್​ಗೆ ಒಣಗುತ್ತಿವೆ ಬೆಳೆ!; ದಿನಕ್ಕೆ 4 ಗಂಟೆ ಮಾತ್ರ ತ್ರಿಪೇಸ್

ಚಿಕ್ಕಬಳ್ಳಾಪುರ : ಬೇಸಿಗೆ ಆರಂಭವಾಗುತ್ತಿದ್ದಂತೆ ಬಯಲುಸೀಮೆ ಜಿಲ್ಲೆಯಲ್ಲಿ ಕುಡಿಯುವ ನೀರಿನ ಹಾಹಾಕಾರದ ಜತೆಗೆ ಬೆಳೆಗಳನ್ನು ಉಳಿಸಿಕೊಳ್ಳಲು ರೈತರು ಹರಸಾಹಸಪಡುವಂತಾಗಿದೆ. ಅಸಮರ್ಪಕ ವಿದ್ಯುತ್ ಪೂರೈಕೆಯಿಂದ ಬೆಳೆಗಳು ನೀರಿಲ್ಲದೆ ಒಣಗುತ್ತಿದ್ದು, ಫಸಲಿನ ನಿರೀಕ್ಷೆಯಲ್ಲಿದ್ದವರಿಗೆ ಶಾಕ್ ತಗುಲಿದಂತಾಗಿದೆ.

ಇತ್ತೀಚೆಗೆ ಕೃಷಿ ಪಂಪ್​ಸೆಟ್​ಗಳಿಗೆ 7 ಗಂಟೆಯ ಬದಲಿಗೆ 4 ಗಂಟೆ ತ್ರಿಪೇಸ್ ವಿದ್ಯುತ್ ಪೂರೈಸಲಾಗುತ್ತಿದೆ. ಇದರ ನಡುವೆ ಲೋಡ್ ಶೆಡ್ಡಿಂಗ್, ಸಿಂಗಲ್ ಪೇಸ್, ಕಾಮಗಾರಿ ನಿರ್ವಹಣೆ ನೆಪದಲ್ಲಿ ಕರೆಂಟ್ ಕಟ್ ಮಾಡಲಾಗುತ್ತಿದೆ. ಇದರಿಂದಾಗಿ ಕೊಳವೆಬಾವಿ ಮೂಲಕ ಬೆಳೆಗಳಿಗೆ ಸಮರ್ಪಕವಾಗಿ ನೀರು ಹರಿಸಲು ಸಾಧ್ಯವಾಗುತ್ತಿಲ್ಲ.

ಬಿಸಿಲಿಗೆ ಉಷ್ಣಾಂಶ ಹೆಚ್ಚಾಗಿ ಭೂಮಿ ಒಣಗುತ್ತಿದೆ. ಈ ವೇಳೆ ಪ್ರತಿನಿತ್ಯ ಬೆಳಗ್ಗೆ ಮತ್ತು ಸಂಜೆ ಎರಡು ಬಾರಿ ನೀರು ಹಾಯಿಸಬೇಕು. ಆದರೆ ನೀರಿಲ್ಲದೆ ಬೆಳೆಗಳು ಕಪು್ಪ ಇಲ್ಲವೇ ಕಂದು ಬಣ್ಣಕ್ಕೆ ತಿರುಗಿ ನಶಿಸುತ್ತಿವೆ. ಮತ್ತೊಂದೆಡೆ ವೋಲ್ಟೇಜ್ ವ್ಯತ್ಯಾಸದಿಂದ ಮೋಟಾರ್​ಗಳು ಸುಡುತ್ತಿದ್ದು, ಬೆಳೆ ನಷ್ಟದ ಜತೆಗೆ ಆರ್ಥಿಕ ಹೊರೆಯೂ ರೈತರ ಬೆನ್ನುಹತ್ತಿದೆ.

ಜಿಲ್ಲೆಯು ಕಳೆದ 11 ವರ್ಷಗಳಲ್ಲಿ 8 ಬಾರಿ ಬರಕ್ಕೆ ತುತ್ತಾಗಿದೆ. ಬೇಸಿಗೆ ಪ್ರಾರಂಭವಾಗುತ್ತಿದ್ದಂತೆ ಅಂತರ್ಜಲಮಟ್ಟ ಪಾತಾಳ ಸೇರುವ ಜತೆಗೆ ಅಲ್ಪಸ್ವಲ್ಪ ನೀರು ಇರುವ ಬೋರ್​ವೆಲ್​ಗಳು ಬತ್ತುತ್ತಿದ್ದು, ಇಂತಹ ದುಸ್ಥಿತಿಯ ಪರಿಸ್ಥಿತಿಯಲ್ಲೂ ರೈತರು ಧೃತಿಗೆಡದೆ ಬೆಳೆಗಳನ್ನು ಬೆಳೆದಿದ್ದಾರೆ, ಆದರೆ ಅಸಮರ್ಪಕ ವಿದ್ಯುತ್ ಪೂರೈಕೆಯಿಂದ ಈ ಬೆಳೆಗಳನ್ನು ಉಳಿಸಿಕೊಳ್ಳುವುದೇ ಸವಾಲಾಗಿದೆ.

ಬೆಳೆ ಉಳಿಸಿಕೊಳ್ಳುವ ಆತಂಕ : ಜಿಲ್ಲೆಯ ರೈತರು ಬಗೆಬಗೆಯ ಹೂವು, ಹಣ್ಣು ಮತ್ತು ತರಕಾರಿ ಬೆಳೆದಿದ್ದಾರೆ, ಈಗಾಗಲೇ ಬಹುತೇಕ ಅರ್ಧ ಫಸಲಿಗೆ ಬಂದಿದೆ. ಈ ವೇಳೆ ಸಮರ್ಪಕವಾಗಿ ನೀರು ಹರಿಸದಿದ್ದಲ್ಲಿ ಬೆಳೆ ಒಣಗಿ ನಷ್ಟವಾಗುತ್ತದೆ. ಬೇಸಿಗೆಯಲ್ಲಿ ಸೀಡ್​ಲೇಸ್, ಕೃಷ್ಣ ಶರತ್ತು, ಸೊನೆಕಾ, ರೆಡ್ ಗ್ಲೊಬ್, ಸೂಪರ್ ಸೊನೆಕಾ, ದಿಲ್​ಕುಷ್, ಅನಾಭಿಶ್, ಕಾಬೂಲ್, ಕಪ್ಪು ದ್ರಾಕ್ಷಿ , ಚಾಮಂತಿ, ಚೆಂಡು, ಗುಲಾಬಿ, ಟೊಮ್ಯೊಟೊ, ಮಾವು, ಸಪೋಟ, ಕ್ಯಾರೆಟ್ ಸೇರಿ ಇತರ ಬೆಳೆಗಳಿಗೆ ಹೆಚ್ಚಿನ ನೀರು ಪೂರೈಸಬೇಕು. ಆದರೆ, ವಿದ್ಯುತ್ ಪೂರೈಕೆ ಸಮಸ್ಯೆಯಿಂದ ನೀರಿನ ಅಭಾವ ಉಂಟಾಗಿದ್ದು ರೈತರಿಗೆ ದಿಕ್ಕೆ ತೋಚದಾಗಿದೆ.

ವಿದ್ಯುತ್ ಪೂರೈಕೆ ಸಮಸ್ಯೆ : ಜಿಲ್ಲೆಗೆ ದಿನಕ್ಕೆ ಕನಿಷ್ಠ 35 ಯೂನಿಟ್ ವಿದ್ಯುತ್ ಅಗತ್ಯವಿದೆ. ಆದರೆ, ಬೇಸಿಗೆಯಲ್ಲಿ ವಿದ್ಯುತ್ ಸ್ಥಾವರಗಳಲ್ಲಿ ಉತ್ಪಾದನೆ ಪ್ರಮಾಣ ಕುಸಿದು ಪೂರೈಕೆಯಲ್ಲಿ ವ್ಯತ್ಯಯವಾಗಿದೆ ಎನ್ನಲಾಗುತ್ತಿದೆ, ಇದರ ಜತೆಗೆ ಬೇಡಿಕೆ ಹೆಚ್ಚಳವಾಗಿರುವುದು ಸಮಸ್ಯೆಗೆ ಪ್ರಮುಖ ಕಾರಣವಾಗಿದ್ದು, ಟ್ರಾನ್ಸ್​ಫಾರ್ಮರ್​ಗಳು ಸುಡುತ್ತಿರುವುದು, ಲೈನ್ ಟ್ರಿಫ್ ಮತ್ತು ಇತರ ಕಾರಣಗಳಿಂದ ಸಮಸ್ಯೆ ಹೆಚ್ಚಾಗಿದೆ ಎನ್ನುವುದು ಬೆಸ್ಕಾಂ ಅಧಿಕಾರಿಗಳ ಸಮಜಾಯಿಷಿ.