ಪೋರ್ಟ್​ಲ್ಯಾಂಡ್​ನಲ್ಲಿ ಕನ್ನಡಾಧಿಪತಿ; ಬೆಂಗಳೂರಿನಿಂದಲೇ ಕನ್ನಡ ಪುಸ್ತಕ ಖರೀದಿಸಿ ಬಹುಮಾನ..

ಬೆಂಗಳೂರು: ಒರೆಗನ್​ನಲ್ಲಿರುವ 'ಪೋರ್ಟ್​ಲ್ಯಾಂಡ್ ಕನ್ನಡ ಕೂಟ'ದವರು ಆಯೋಜಿಸಿದ್ದ 'ಪೋರ್ಟ್​ಲ್ಯಾಂಡ್ ಕನ್ನಡಾಧಿಪತಿ' ರಸಪ್ರಶ್ನೆ ಸ್ಪರ್ಧೆಯ ಗ್ರ್ಯಾಂಡ್​ ಫಿನಾಲೆ ಇತ್ತೀಚೆಗಷ್ಟೇ ನಡೆದಿದೆ. ಮಕರ ಸಂಕ್ರಮಣದಂದು ಆರಂಭವಾದ ಈ ಕಾರ್ಯಕ್ರಮ ಫೆ. 5ರಂದು ಗ್ರ್ಯಾಂಡ್ ಫಿನಾಲೆ ನಡೆಯುವುದರೊಂದಿಗೆ ಮುಕ್ತಾಯಗೊಂಡಿದೆ.

ಸ್ಪರ್ಧೆಯಲ್ಲಿ ಭಾಗವಹಿಸಿದ ಸ್ಪರ್ಧಿಗಳಿಗೆ ಹಾಗೂ ವಿಜೇತರಿಗೆ ನಿರ್ದೇಶಕ ನಾಗತಿಹಳ್ಳಿ ಚಂದ್ರಶೇಖರ್​ ಅವರು ಶುಭ ಹಾರೈಸಿದ್ದು, ರಸಪ್ರಶ್ನೆ ಸ್ಪರ್ಧೆಯ ಆರಂಭದಿಂದಲೂ ನಟಿ ಪದ್ಮಜಾ ರಾವ್ ಅವರು ಈ ಕಾರ್ಯಕ್ರಮಕ್ಕೆ ಶುಭಾಶಯ ಕೋರಿ ಬೆಂಬಲವನ್ನು ವ್ಯಕ್ತಪಡಿಸಿದ್ದರು.

ಕಿರಿಯರ ಹಾಗೂ ಹಿರಿಯರ ಎಂದು ಎರಡು ವಿಭಾಗಗಳಲ್ಲಿ ಈ ಸ್ಪರ್ಧೆ ನಡೆದಿದೆ. ಕಿರಿಯರ ವಿಭಾಗದಲ್ಲಿ ಇಶಾನ್ ಸೆಗವಾಳು ಹಾಗೂ ಹಿರಿಯರ ವಿಭಾಗದಲ್ಲಿ ವಿನಾಯಕ್ ಕುರುವೇರಿ ಅವರು ವಿಜೇತರಾಗಿದ್ದಾರೆ. ವಿಜೇತರಿಗೆ ಬೆಂಗಳೂರಿನಿಂದಲೇ ಕನ್ನಡ ಪುಸ್ತಕಗಳನ್ನು ಖರೀದಿಸಿ ತರಿಸಿಕೊಂಡು ಬಹುಮಾನವಾಗಿ ವಿತರಿಸಿದ್ದು ವಿಶೇಷ ಎನ್ನಲಾಗಿದೆ.