ಜೆಎನ್​ಯು ಹಿಂಸಾಚಾರ| ಪೊಲೀಸ್ ಠಾಣೆಯಲ್ಲಿ ಇದುವರೆಗೆ ಹನ್ನೊಂದು ದೂರು ದಾಖಲು

ನವದೆಹಲಿ: ಜವಾಹರಲಾಲ್ ನೆಹರು ವಿಶ್ವವಿದ್ಯಾಲಯದಲ್ಲಿ ಭಾನುವಾರ ನಡೆದ ಹಿಂಸಾಚಾರ ಸಂಬಂಧಿಸಿ ಇದುವರೆಗೆ 11 ದೂರುಗಳು ದಾಖಲಾಗಿವೆ ಎಂದು ದೆಹಲಿ ಪೊಲೀಸರು ತಿಳಿಸಿದ್ದಾರೆ.

ಕ್ಯಾಂಪಸ್​ನಲ್ಲಿ ಜನವರಿ 5ರಂದು ನಡೆದ ಹಿಂಸಾಚಾರದ ಕುರಿತು ವಿವಿಯ ಪ್ರೊಫೆಸರ್ ಒಬ್ಬರು ಒಂದು ದೂರು ದಾಖಲಿಸಿದ್ದರೆ, ಉಳಿದವುಗಳನ್ನು ವಿದ್ಯಾರ್ಥಿಗಳು ದಾಖಲಿಸಿದ್ದಾರೆ. ಎಲ್ಲ ದೂರುಗಳು ಕ್ರೈಂ ಬ್ರಾಂಚ್​ಗೆ ವರ್ಗಾವಣೆಗೊಂಡಿದೆ ಎಂದು ದೆಹಲಿಯ ಡಿಸಿಪಿ ದೇವೇಂದರ್ ಆರ್ಯ ತಿಳಿಸಿದ್ದಾರೆ.

ಪರಿಸ್ಥಿತಿಯ ಅವಲೋಕನಕ್ಕಾಗಿ ಪೊಲೀಸರು ಸಿವಿಲ್ ಡ್ರೆಸ್​ನಲ್ಲಿ ಕ್ಯಾಂಪಸ್ ಒಳಗೆ ಹಾಗೂ ಸಮವಸ್ತ್ರದಲ್ಲಿರುವ ಪೊಲೀಸರು ಕ್ಯಾಂಪಸ್ ಹೊರಗೂ ಇರಲಿದ್ದಾರೆ. ಕ್ರೈಂ ಬ್ರಾಂಚ್ ಮತ್ತು ಫಾರೆನ್ಸಿಕ್​ ಸೈನ್ಸ್​ ಲ್ಯಾಬ್ ಸಿಬ್ಬಂದಿ ಸ್ಥಳಕ್ಕೆ ಭೇಟಿ ನೀಡಿದ್ದು, ಸಾಕ್ಷ್ಯಗಳನ್ನು ಸಂಗ್ರಹಿಸುತ್ತಿದ್ದಾರೆ.

ಘಟನಾವಳಿಗಳಿಗೆ ಸಂಬಂಧಿಸಿದ ವಿಡಿಯೋ ಸಾಕ್ಷ್ಯಗಳಿದ್ದರೆ ಹಂಚಿಕೊಳ್ಳುವಂತೆ ಪೊಲೀಸರು ಈಗಾಗಲೇ ಸಾರ್ವಜನಿಕರಲ್ಲಿ ಮನವಿ ಮಾಡಿದ್ದಾರೆ ಎಂದು ಆರ್ಯ ತಿಳಿಸಿದರು. (ಏಜೆನ್ಸೀಸ್​)