ಅಯೋಧ್ಯೆಗೆ ಬಂದ ಪ್ರಧಾನಿ ಮೊದಲು ಹನುಮಾನ್ ಮಂದಿರದಲ್ಲಿ ಪ್ರಾರ್ಥನೆ ಸಲ್ಲಿಸಿದರು. ಇಲ್ಲಿನ ಗುಹೆಯೊಂದರಲ್ಲಿ ಹನುಮಂತ ನೆಲೆಸಿ, ರಾಮ ಜನ್ಮಭೂಮಿ ಮತ್ತು ರಾಮ ಕೋಟ್ನ ರಕ್ಷಣೆ ಮಾಡುತ್ತಿದ್ದ ಎಂಬ ಐತಿಹ್ಯವಿದೆ. ಮೋದಿ, ಹನುಮಂತನಿಗೆ ಸಾಷ್ಟಾಂಗ ನಮಸ್ಕಾರ ಮಾಡಿ, ಪೂಜೆ ಸಲ್ಲಿಸಿದರು. ಅಯೋಧ್ಯೆಯಲ್ಲಿ ಬೇರೆ ಕಾರ್ಯಕ್ರಮಕ್ಕೆ ಮುನ್ನ ಹನುಮಂತನ ದೇವಸ್ಥಾನಕ್ಕೆ ಭೇಟಿ ನೀಡುವುದಕ್ಕೆ ಮಹತ್ವವಿದೆ ಎಂದಿರುವ ಅಲ್ಲಿನ ಅರ್ಚಕ ರಾಜು ದಾಸ್, ‘ರಾಮನ ಮಹಾನ್ ಭಕ್ತ ಹನುಮನ ಆಶೀರ್ವಾದವಿಲ್ಲದೆ ಯಾವುದೇ ಕೆಲಸ ಪೂರ್ಣಗೊಳ್ಳುವುದಿಲ್ಲ. ಅಯೋಧ್ಯೆ ಕಾಪಾಡುತ್ತಿರುವವನು ಹನುಮಂತ. ಆತನ ಶ್ರೀರಕ್ಷೆಯೂ ಮುಖ್ಯ’ ಎಂದಿದ್ದಾರೆ. ಇಲ್ಲಿ ಹನುಮನ ತಾಯಿ ಅಂಜನಿಯ ದೇಗುಲವಿದ್ದು, ಬಾಲ ಹನುಮಂತ ತನ್ನ ತಾಯಿಯ ತೊಡೆ ಮೇಲೆ ಕುಳಿತಿರುವ ವಿಗ್ರಹ ವಿಶೇಷಾಕರ್ಷಣೆಗೆ ಪಾತ್ರವಾಗಿದೆ.
