ಉಳಿದಂತೆ, ನಗರ ವ್ಯಾಪ್ತಿಗೆ ಸೇರಿರುವಲ್ಲಿ, ಸಕ್ಷಮ ಪ್ರಾಧಿಕಾರದಿಂದ ನಕ್ಷೆ ಅನುಮೋದಿಸಿ ಅಭಿವೃದ್ಧಿಪಡಿಸಿರುವ ಹೊಸ ಬಡಾವಣೆಗಳ ನಿವೇಶನಗಳಿಗೆ ಪಂಚತಂತ್ರ ತಂತ್ರಾಂಶದಲ್ಲಿ ಖಾತೆ ನೀಡಬೇಕು ಎಂಬುದು ಸರ್ಕಾರದ ಸೂಚನೆ. ಇದರ ಜವಾಬ್ದಾರಿಯನ್ನು ಪಂಚಾಯತಿ ಅಭಿವೃದ್ಧಿ ಅಧಿಕಾರಿಗೆ ವಹಿಸಲಾಗಿದೆ. ಇ-ಸ್ವತ್ತು ತಂತ್ರಾಂಶದಲ್ಲಿ ಅರ್ಜಿ ಅಪ್ಲೋಡ್ ಮಾಡಿ ನಿಗದಿತ ಶುಲ್ಕ ಪಡೆಯಬೇಕು. ಹಾಗೇ, ಖಾತಾ ವಿತರಿಸಲು ಗರಿಷ್ಠ ದಿನಗಳ ಗಡುವು ಸಹ ಇದೆ. ಇವೆಲ್ಲ ಸರ್ಕಾರದ ನಿಯಮಗಳಲ್ಲಿ ಇವೆಯೇ ವಿನಾ ಜನರಿಗೆ ಸರಿಯಾಗಿ ಸೇವೆ ಸಿಗುತ್ತಿಲ್ಲ ಎಂಬ ದೂರುಗಳು ವ್ಯಾಪಕವಾಗಿವೆ. ಅದರಲ್ಲೂ, ಬೆಂಗಳೂರು ನಗರ, ಬೆಂಗಳೂರು ಗ್ರಾಮಾಂತರ, ರಾಮನಗರ, ಮೈಸೂರು, ಮಂಗಳೂರು ಮುಂತಾದ ತ್ವರಿತಗತಿ ಬೆಳವಣಿಗೆಯ ನಗರಗಳ ಸುತ್ತಮುತ್ತ ಗ್ರಾಮ ಪಂಚಾಯಿತಿಗಳಲ್ಲಿ ಇ-ಸ್ವತ್ತು ಕೊಡಲು ಹಣ ಕೇಳಲಾಗುತ್ತದೆ. ಹಣ ಕೊಟ್ಟರೆ ಸಮರ್ಪಕ ದಾಖಲೆ ಇಲ್ಲದಿದ್ದರೂ ಖಾತಾ ಮಾಡಿಕೊಡಲಾಗುತ್ತದೆ; ಹಣ ನೀಡದಿದ್ದರೆ ದಾಖಲೆ ಸರಿಯಿದ್ದರೂ ಏನಾದರೂ ಕುಂಟುನೆಪ ಹೇಳಿ ಸತಾಯಿಸಲಾಗುತ್ತದೆ; ನಿಯಮ ಪ್ರಕಾರ ನಿರ್ದಿಷ್ಟ ದಿನಗಳಲ್ಲಿ ಆಗಬೇಕಾದ ಕೆಲಸಕ್ಕೆ ವರ್ಷಗಟ್ಟಲೇ ತೊಂದರೆ ಕೊಡುತ್ತಾರೆ ಎಂಬ ದೂರುಗಳು ಸಾರ್ವಜನಿಕ ವಲಯದಿಂದ ಕೇಳಿಬರುತ್ತಿದೆ.
