ಪೆಟ್ರೋಲ್, ಡೀಸೆಲ್ ಎಕ್ಸೈಜ್​ ಸುಂಕ; ಕೇಂದ್ರ ಸರ್ಕಾರಕ್ಕೆ ವಾರ್ಷಿಕ 32 ಸಾವಿರ ಕೋಟಿ ರೂ. ಆದಾಯ

ನವದೆಹಲಿ: ಪೆಟ್ರೋಲ್ ಮತ್ತು ಡೀಸೆಲ್ ಮೇಲಿನ ಎಕ್ಸೆ ೖಜ್ ಸುಂಕವನ್ನು ಕೇಂದ್ರ ಸರ್ಕಾರ ಪ್ರತಿ ಲೀಟರ್​ಗೆ 2 ರೂ.ನಷ್ಟು ಹೆಚ್ಚಿಸಿದೆ. ಆದರೆ ಇದರ ಹೊರೆ ಗ್ರಾಹಕರ ಮೇಲೆ ಬೀಳುವುದಿಲ್ಲ. ತೈಲ ಕಂಪನಿಗಳು ಈ ಆರ್ಥಿಕ ಹೊರೆಯನ್ನು ಅಂತಾರಾಷ್ಟ್ರೀಯ ತೈಲ ಬೆಲೆಯ ಏರಿಳಿತ ಗಮನದಲ್ಲಿ ಇಟ್ಟುಕೊಂಡು ನಿಭಾಯಿಸಲಿವೆ.

ಪೆಟ್ರೋಲ್ ಮೇಲೆ ಲೀಟರ್​ಗೆ 11 ರೂ. ಇದ್ದ ವಿಶೇಷ ಹೆಚ್ಚುವರಿ ಎಕ್ಸೈಜ್​ ಸುಂಕವನ್ನು 13 ರೂ.ಗೆ ಏರಿಸಲಾಗಿದೆ. ಡೀಸೆಲ್ ಮೇಲೆ 8 ರೂ. ಇದ್ದದ್ದನ್ನು 10 ರೂ.ಗೆ ಹೆಚ್ಚಿಸಲಾಗಿದೆ. ಇದರಿಂದಾಗಿ ಪೆಟ್ರೋಲ್ ಮೇಲೆ ಕೇಂದ್ರ ವಿಧಿಸುತ್ತಿರುವ ತೆರಿಗೆ ಪ್ರಮಾಣ ಲೀಟರ್​ಗೆ 19.9 ರೂ. ಇದ್ದದ್ದು 21.9 ರೂ.ಗೆ ಏರಿದೆ. ಇದರಲ್ಲಿ 1.40 ರೂ. ಮೂಲ ಎಕ್ಸೈಜ್​ ಸುಂಕ, 13 ರೂ. ವಿಶೇಷ ಹೆಚ್ಚುವರಿ ಎಕ್ಸೈಜ್​ ಸುಂಕ, 2.50 ರೂ. ಕೃಷಿ ಸೆಸ್, 5 ರೂ. ರಸ್ತೆ-ಮೂಲಸೌಕರ್ಯ ಸೆಸ್ ಸೇರಿವೆ.

ಡೀಸೆಲ್ ಮೇಲಿದ್ದ ಎಕ್ಸೈಜ್​ ಸುಂಕವನ್ನು ಲೀಟರ್​ಗೆ 15.80 ರೂ. ಇದ್ದದ್ದು 17.80 ರೂ.ಗೆ ಏರಿಸಲಾಗಿದೆ. ಇದರಲ್ಲಿ 1.80 ರೂ. ಮೂಲ ಎಕ್ಸೈಜ್​ ಸುಂಕ, 10 ರೂ. ವಿಶೇಷ ಹೆಚ್ಚುವರಿ ಎಕ್ಸೆ ೖಜ್ ಸುಂಕ, 4 ರೂ. ಕೃಷಿ ಸೆಸ್, 2 ರೂ. ರಸ್ತೆ-ಮೂಲಸೌಕರ್ಯ ಸುಂಕ ಸೇರಿವೆ. ದೇಶದಲ್ಲಿ ವರ್ಷಕ್ಕೆ 16 ಸಾವಿರ ಕೋಟಿ ಲೀಟರ್ ಪೆಟ್ರೋಲ್ ಮತ್ತು ಡೀಸೆಲ್ ಬಳಕೆಯಾಗುತ್ತಿದ್ದು, 2 ರೂ. ಸುಂಕ ಹೆಚ್ಚಳದಿಂದ ಸರ್ಕಾರಕ್ಕೆ 32 ಸಾವಿರ ಕೋಟಿ ರೂ. ಆದಾಯ ದೊರೆಯಲಿದೆ. ಇದು ಮಂಗಳವಾರದಿಂದ ಜಾರಿಗೆ ಬರಲಿದೆ.

https://www.vijayavani.net/tamannaah-open-talk-about-netizens-troll