ಪಾಸ್​ಬುಕ್​ ಮೇಲೆ ಡೆತ್​ ನೋಟ್​ ಬರೆದಿಟ್ಟ; ನೇಣಿಗೆ ಕೊರಳು ಕೊಟ್ಟ..!

ನವದೆಹಲಿ: ನೇಣುಗಂಬಕ್ಕೆ ಹಾಕುವವರಿಗೆ ಒಂದು ಸಲ ಕೊನೆಯ ಆಸೆ ಏನು ಎಂದು ಕೇಳುತ್ತಾರೆ. ಆದರೆ ಸ್ವತಃ ನೇಣು ಹಾಕಿಕೊಳ್ಳುವವರು ತಮ್ಮ ಕೊನೆಯ ಆಸೆ ಏನಾದರೂ ಇದ್ದರೆ ಡೆತ್​ನೋಟ್​ನಲ್ಲಿ ಬರೆದಿಟ್ಟು ಸಾಯುತ್ತಾರೆ. ಹಾಗೆ ತನ್ನ ಕೊನೆಯ ಆಸೆಯೊಂದನ್ನು ಬರೆದಿಟ್ಟು ವ್ಯಕ್ತಿಯೊಬ್ಬ ಸಾವಿಗೆ ಶರಣಾಗಿದ್ದಾನೆ.

ಅಷ್ಟಕ್ಕೂ ಆತ ಡೆತ್​ನೋಟ್ ಬರೆಯಲು ಬಳಸಿದ ಕಾಗದವೇ ಗಮನ ಸೆಳೆದಿದೆ. ಏಕೆಂದರೆ ನೇಣು ಹಾಕಿಕೊಂಡು ಮೃತಪಟ್ಟ ಈ ವ್ಯಕ್ತಿಯ ಕಿಸೆಯಲ್ಲಿ ಬ್ಯಾಂಕ್​ ಪಾಸ್​ಬುಕ್​ ಹಾಗೂ ಪೆನ್ ಪತ್ತೆಯಾಗಿದೆ. ಅದರಲ್ಲೂ ಆತ ಪಾಸ್​ಬುಕ್​ ಮೇಲೇ ಡೆತ್​ನೋಟ್ ಬರೆದಿಟ್ಟು ನೇಣು ಹಾಕಿಕೊಂಡಿದ್ದಾನೆ. ಕುಟುಂಬವನ್ನು ಚೆನ್ನಾಗಿ ನೋಡಿಕೊಳ್ಳಬೇಕು ಎಂಬ ತನ್ನ ಕೊನೆಯ ಆಸೆಯನ್ನು ಆತ ಡೆತ್​ನೋಟ್​ನಲ್ಲಿ ಹೇಳಿಕೊಂಡಿದ್ದು, ಆ ಆಸೆ ಈಡೇರಿಸುವಂತೆ ಡೆತ್​ ಮೂಲಕ ಸೋದರ ಮಾವನಲ್ಲಿ ಕೋರಿಕೊಂಡಿದ್ದಾನೆ.

ನವದೆಹಲಿಯ ಆಜಾದ್ ಕಾಲನಿಯ ಬುದ್ಧ ವಿಹಾರ್ 2ನೇ ಹಂತದ ನಿವಾಸಿ, ರಾಜೀವ್ ಗಾಂಧಿ ಆಸ್ಪತ್ರೆಯಲ್ಲಿ ಭದ್ರತಾ ಸಿಬ್ಬಂದಿ ಆಗಿದ್ದ ಸುಬೋಧ್​ (40) ದೆಹಲಿ ರೋಹಿಣಿ ಏರಿಯಾದ ಟಿ ಪಾಯಿಂಟ್​ನ ಪಾರ್ಕ್​ನಲ್ಲಿನ ಮರಕ್ಕೆ ನೇಣು ಹಾಕಿಕೊಂಡು ಆತ್ಯಹತ್ಯೆ ಮಾಡಿಕೊಂಡಿದ್ದಾನೆ. ದೆಹಲಿ ಪೊಲೀಸರು ಆತ್ಮಹತ್ಯೆ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. (ಏಜೆನ್ಸೀಸ್​)