14 ದಿನಕ್ಕೆ ಸಾಯಲ್ಲ ಕರೊನಾ ವೈರಸ್​! ಸೋಂಕಿತರ ದೇಹದಲ್ಲಿ ಎಷ್ಟು ದಿನ ವೈರಸ್​ ಇರುತ್ತೆ ಗೊತ್ತಾ?

ವುಹಾನ್​: ಚೀನಾದಲ್ಲಿ ಪತ್ತೆಯಾದ ಕರೊನಾ ವೈರಸ್​ ಇದೀಗ ಪ್ರಪಂಚದಾದ್ಯಂತ ಹರಡಿದೆ. 118 ದೇಶಗಳಲ್ಲಿ ವೈರಸ್​ ಕಾಣಿಸಿಕೊಂಡಿದ್ದು ಪ್ರಪಂಚದ ಜನರು ಭಯಭೀತರಾಗಿದ್ದಾರೆ. ಇದೇ ಸಂದರ್ಭದಲ್ಲಿ ಚೀನಾದ ವೈದ್ಯರು ಮತ್ತೊಂದು ಭಯಾನಕ ಸತ್ಯವನ್ನು ಬಿಚ್ಚಿಟ್ಟಿದ್ದಾರೆ.

ಸದ್ಯ ಪ್ರಪಂಚದಾದ್ಯಂತ ಕರೊನಾ ಪೀಡಿತರನ್ನು ಮತ್ತು ಶಂಕಿತರನ್ನು 14 ದಿನಗಳ ಕಾಲ ಪ್ರತ್ಯೇಕಿಸಿಡಲಾಗುತ್ತಿದೆ. ಕರೊನಾ ವೈರಸ್​ 14 ದಿನಗಳ ಕಾಲ ಬೇರೆಯವರಿಗೆ ಹರಡಬಲ್ಲ ಶಕ್ತಿ ಹೊಂದಿರುತ್ತದೆ ಎಂದು ತಿಳಿಸಲಾಗಿದೆ. ಆದರೆ ಕರೊನಾ ಜೀವಿತಾವಧಿ 14 ದಿನಗಳಿಗಿಂತ ಹೆಚ್ಚಿದೆ ಎಂದು ಚೀನಾದ ವೈದ್ಯರು ತಿಳಿಸಿದ್ದಾರೆ. ಈ ವೈರಸ್​ 4 ವಾರಗಳ ಕಾಲ (37 ದಿನಗಳು) ಬದುಕಬಲ್ಲದು ಎಂದು ಅವರು ಮಾಹಿತಿ ನೀಡಿದ್ದಾರೆ.

ಈ ವಿಚಾರವಾಗಿ ಸಂಶೋಧನೆ ನಡೆಸಲೆಂದು ಜಿನಿಂಟನ್ ಆಸ್ಪತ್ರೆ ಮತ್ತು ವುಹಾನ್ ಪಲ್ಮನರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದ 191 ಕರೊನಾ ಸೋಂಕಿತರನ್ನು ಆಯ್ಕೆ ಮಾಡಿಕೊಳ್ಳಲಾಗಿತ್ತು. ಈ ಸೋಂಕಿತರಿಗೆ ಸೋಂಕು ತಗುಲಿ 20 ದಿನಗಳಾದ ನಂತರ ಅವರನ್ನು ಪರೀಕ್ಷಿಸಲಾಗಿದೆ. ಆ ಸಮಯದಲ್ಲಿ ಚಿಕಿತ್ಸೆಯಿಂದಾಗಿ ಅವರಲ್ಲಿ ರೋಗಲಕ್ಷಣಗಳಿರಲಿಲ್ಲವಾದರೂ ಅವರಲ್ಲಿ ವೈರಸ್​ ಇದ್ದು, ಅದು ಬೇರೆಯವರಿಗೆ ಹರಡಬಲ್ಲದ್ದಾಗಿತ್ತು ಎಂದು ವೈದ್ಯರು ತಿಳಿಸಿದ್ದಾರೆ. ಈ ವಿಚಾರ ಲ್ಯಾನ್ಸೆಟ್​ನ ವೈದ್ಯಕೀಯ ಜರ್ಬಲ್​ನಲ್ಲಿ ಪ್ರಕಟವಾಗಿದೆ.

ಗುಣಮುಖರಾಗಿರುವ ರೋಗಿಗಳ ಉಸಿರಾಟದ ಮಾದರಿಯನ್ನು ತಪಾಸಣೆ ನಡೆಸಿದಾಗ ಅದರಲ್ಲಿ ವೈರಸ್​ನ RNA ಪತ್ತೆಯಾಗಿರುವುದಾಗಿ ತಿಳಿಸಲಾಗಿದೆ. ಎಲ್ಲಾ ರೋಗಿಗಳಲ್ಲೂ ಈ ರೀತಿಯ ಸಮಸ್ಯೆ ಉಂಟಾಗುವುದಿಲ್ಲ ಆದರೆ ಮೂರನೇ ಒಂದು ಭಾಗ ರೋಗಿಗಳಲ್ಲಿ ವೈರಸ್​ ನಾಲ್ಕು ವಾರಗಳ ಕಾಲ ಉಳಿದರಿಬಲ್ಲದು ಎಂದು ಮಾಹಿತಿ ನೀಡಲಾಗಿದೆ.

ಸದ್ಯ ಕರೊನಾ ವೈರಸ್​ ಪ್ರಪಂಚದ 118 ದೇಶಗಳಲ್ಲಿ ಕಾಣಿಸಿಕೊಂಡಿದ್ದು, 1,25,000ಕ್ಕೂ ಹೆಚ್ಚು ಜನ ಸೋಂಕಿತರಾಗಿದ್ದಾರೆ. ಭಾರತದಲ್ಲಿ 74 ಜನರಲ್ಲಿ ಸೋಂಕಿರುವುದು ಪತ್ತೆಯಾಗಿದೆ. ಕರ್ನಾಟಕದಲ್ಲಿ ಐವರಲ್ಲಿ ಸೋಂಕು ಧೃಡವಾಗಿದ್ದು, ದೇಶದಲ್ಲಿ ವೈರಸ್​ನಿಂದಾಗಿ ಮೊದಲ ಸಾವು ರಾಜ್ಯದ ಕಲಬುರಗಿಯಲ್ಲಿ ಸಂಭವಿಸಿದೆ. (ಏಜೆನ್ಸೀಸ್​)

https://www.vijayavani.net/two-people-allegedly-murdered-a-man-and-had-sex-with-the-body/

https://www.vijayavani.net/government-is-in-stupor-slams-rahul-gandhi-as-covid-19-grips-d-street/